އިންޑިއާގައި ފަރުބަދަމަތިން ދަތުރުކުރަމުންދިޔަ ބަހެއް ފުރޮޅާލައި ހިނގި އެކްސިޑެންޓެއްގައި 26 މީހުން މަރުވެއްޖެ އެވެ.
މި ހާދިސާ ހިނގީ އުތުރު އިންޑިއާގެ ސްޓޭޓެއް ކަމަށްވާ އުއްތަރުޚަންދުގަ އެވެ. އެއީ ހިންދޫން އަޅުކަން ކުރަންދާ ހާއްސަ ތަނެއް ހުންނަ ސްޓޭޓެކެވެ.
ފަރުބަދަމަތިން ފުރޮޅާލިއިރު އެ ބަސް ދަތުރުކުރަމުންދިޔައީ އެތަނަށް ޒިޔާރަތްކުރަން ދިޔަ 30 މީހުންނާ އެކު އެވެ. އެކްސިޑެންޓުންޓު ހިނގީ އެ ސްޓޭޓުގެ މައި ސިޓީ ކަމަށްވާ ޑަމްޓާ ގެ 160 ކިލޯމީޓަރު ދުރުންނެވެ.
ސަލާމަތީ ހިދުމަތްތަކުން ދަނީ ގެއްލުނު މީހެއް ހޯދުމުގެ މަސައްކަތް އަދިވެސް ކުރަމުންނެވެ. ކުރިއަށް އޮތް ތަނުގައި މަރުވި މީހުންގެ އަދަދު އިތުރުވުމަކީ ވެސް އެކަށީގެންވާ ކަމެއް ކަމަށް އިދާރާތަކުން ބުނެ އެވެ.
ބޮޑުވަޒީރު ނަރެންދުރަ މޯދީ ވަނީ މަރުވި ކޮންމެ މީހެއްގެ އާއިލާއަށް 200،000 ރުޕީސް ދިނުމަށް ނިންމަވާފަ އެވެ. އަދި، އަނިޔާވި ކޮންމެ މީހަކަށް 50،000 ރުޕީސް ވެސް ދޭން ވަނީ ނިންމާފަ އެވެ.
ހިންދޫންގެ އެތައް މިލިއަން ބަޔަކު އެތަނަށް ކޮންމެ އަހަރަކު ވެސް ޒިޔާރަތްކުރެ އެވެ. ނަމަވެސް، އެތަނަށް ދިޔުމަށް ރައްކާތެރި މަގުތަކެއް ނުހުރެ އެވެ.
