ސޯލް، ދެކުނު ކޮރެއާ (2 ޖޫން) - އދ. އިން އުތުރު ކޮރެއާ އާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް ތަންފީޒު ކުރުމަށް އެހީތެރިކަން ފޯރުކޮށްދެމުންދާ ކެނަޑާގެ ސަވައިލެންސް ފްލައިޓުތަކަށް ޗައިނާގެ އަސްކަރިއްޔާ އިން ހުރަސް އަޅަމުންދާ ކަމަށް ކެނަޑާ އިން ބުނެފި އެވެ.
ކެނަޑާގެ އަސްކަރިއްޔާ އިން ވަނީ ޗައިނާގެ އަސްކަރީ ބޯޓުތައް އެގައުމުގެ ފްލައިޓުތަކާ ވަރަށް ގާތުން ދަތުރުކުރާ ކަމަށާއި އަދި ދެ ފްލައިޓުގައި ތިބޭ މީހުންނަށް އެއްބަޔަކު އަނެއް ބަޔަކު ފެންނަ ކަމަށް ވެސް ބުނެފަ އެވެ.
ދެ ފްލައިޓު ޖެހި ނުރައްކާތެރި އެކްސިޑެންޓެއް ހިނގައިފާނެތީ ކެނެޑާގެ ފްލައިޓުތަކުގެ ރާސްތާ ވެސް ބަދަލުކުރަން ޖެހުނު ކަމަށް ކެނަޑާގެ އަސްކަރިއްޔާ އިން ހާމަކޮށްފައިވެ އެވެ.
ވައިގެ ތެރޭގައި ބައްދަލުވާ ވަގުތުތަކުގައި ޗައިނާގެ އެއާ ފޯސް އިން ބައިނަލްއަގްވާމީ ވައިގަދަތުރުފަތުރުގައި އަމަލުކުރާ ގަވާއިދުތަކަށް އަމަލުކޮށްފައި ނުވާ ކަމުގެ ކަންބޮޑުވުން ވެސް ކެނަޑާ އިން ފާޅުކުރި އެވެ. އޭގެ ސަބަބުން ކެނަޑާގެ ފްލައިޓުގައި ތިބި މީހުންގެ ފުރާނަ ނުރައްކަލަށް ހުށަހެޅުނު ކަމަށް ވެސް ހާމަކޮށްފައިވެ އެވެ.
ކެނަޑާ އިން ވަނީ ޑިޕްލޮމެޓިކް ޗެނަލްތަކުގެ ތެރެއިން މި މައްސަލަ ބެއިޖިން އާ ހިސާބަށް ގެންގޮސްފަ އެވެ. އެކަމާ ގުޅިގެން ޗައިނާ އިން މިހާތަނަށް އެއްވެސް ކޮމެންޓެއް ކޮށްފައެއް ނުވެ އެވެ.
