ރައްޔިތުންގެ މަޖިލީހުގެ މިއަދުގެ ޖަލްސާގައި ވެސް ޕްލޭނިން މިނިސްޓަރު މުހައްމަދު އަސްލަމާ މެމްބަރުން ސުވާލުކުރެއްވި އެވެ. ނަވާރަ ވަނަ ރައްޔިތުންގެ މަޖިލީހުގައި އެންމެ ގިނަ ސުވާލަށް ޖަވާބު ދެއްވި މިނިސްޓަރަކަށް މިހާރު ވެވަޑައިގެންފައިވާ އަަސްލަމާ މިދިޔަ ހަފްތާގައި ވެސް މެމްބަރުންގެ ސުވާލުތައް އަމާޒުކުރި އެވެ.
މީގެ ކުރިން ސުވާލުކުރި ފަހަރުތައް ފަދައިން މިއަދު ވެސް ބައެއް މެމްބަރުންގެ ނުރުހުމާއި އުނދަގޫ ސުވާލުތައް އަސްލަމާ ކުރިމަތިވެވަޑައިގެންނެވި އެވެ. އެއާ އެކު މިނިސްޓަރު ވެސް މިއަދު ވާހަކަތައް ބައްޓަން ކުރެއްވީ ވަރަށް ބޮޑަށް ދިފާއުއަށް އަމާޒުކުރައްވައިގެންނެވެ.
މިދިޔަ މަހުގެ 25 ވަނަ ދުވަހު މަޖިލީހުގައި ބޭއްވި ޖަލްސާގައި މެމްބަރެއްގެ ސުވާލަށް އަސްލަމް ދެއްވި ޖަވާބަކާ ގުޅިގެން މީހުންގެ ފާޑުކިއުން ވަރަށް ބޮޑަށް އަމާޒުވެފައި ވާއިރު އޭނާ މިއަދު ވިދާޅުވީ އެ ދުވަހު ދެއްކެވި ވާހަކަ މީޑިއާގައި "އެކި ގޮތް ގޮތަށް" ރިޕޯޓްކޮށްފައިވާ ކަމަށެވެ. އެ ވާހަަކަ އެކި ގޮތްގޮތަށް ޓިކް ޓޮކްގައި އުޅޭކަން އެނގިވަޑައިގަންނަވާ ކަމަށް ވެސް ވިދާޅުވި އެވެ.
"ތިން ހަތަރު އާޓިކަލް އަޅުގަނޑު ވެސް ކިޔައިފިން، ދެން އެހެން ނަމަވެސް އެހެން އަދި މީޑިއާގައި އާޓިކަލެއްގައި އޮންނަ އެއްޗަކަށް ރެސްޕޮންޑްކުރުމަކީ އަޅުގަނޑު ކޮށްއުޅޭ ކަމަކަށް ނުވާތީ އެކަމެއް އަޅުގަނޑު ނުކުރަން،" އަސްލަމް ވިދާޅުވި އެވެ.
މަޖިލީހުގެ ހާޒިރީ
- ހާޒިރުވެވަޑައިގެންނެވީ: 26 މެމްބަރުން (ފެށި އިރު)
- ވީގޮތެއް ނޭނގޭ: 61 މެމްބަރުން
މިދިޔަ މަހުގެ 25 ވަނަ ދުވަހު ބޭއްވި ޖަލްސާގައި ދެއްކެވި ވާހަކައާ ގުޅިގެން އަމާޒުވި ފާޑުކިއުންތަކާ މެދު އޭނާ ނުރުހުން ފާޅުކުރެއްވި އިރު މިއަދުގެ ޖަލްސާގައި އޭނާގެ ދިފާއުގައި މަޖިލީހުގެ ރިޔާސަތުން، ރައީސް މުހައްމަދު ނަޝީދު ވާހަކަފުޅު ދެއްކެވި އެވެ.
ދުވަހުގެ ފޮޓޯ
ދުވަހުގެ ކޯޓޭޝަން
މިއީ އަޅުގަނޑުމެން ވިސްނުންތެރިކަމާ އެކީގައި ތިބެންވީ ވަގުތެއް. އަޅުގަނޑު ދެކޭ ގޮތުގައި ޕްރޮޖެކްޓްތައް މަޑުޖައްސައިލުމަކީ ބޭނުންތެރި ކަމެއް--ރައީސް މުހައްމަދު ނަޝީދު
އެމަނިކުފާނު ވިދާޅުވީ ސަރުކާރުގެ ވައުދުތައް ފުއްދަވަން މިނިސްޓަރު އަސްލަމް މަސައްކަތްކުރައްވާ ކަމާ މެދު ޝައްކެއް ނުކުރައްވާ ކަމަށެވެ.
އަސްލަމާ މެމްބަރަކު ކުރެއްވި ސުވާލަކާ ގުޅުވައި ނަޝީދު ވިދާޅުވީ ސަރުކާރުގެ ވައުދުތައް ފުއްދުމުގެ ގޮތުން ހިންގާ މަޝްރޫއުތައް މިވަގުތު މަޑުޖައްސައިލަން ޖެހޭ ކަމަށެވެ. އެއީ އެމަނިކުފާނު ވިދާޅުވި ގޮތުގައި ރާއްޖޭގެ މާލީ ހާލަތާއި ދުނިޔޭގެ ކަންކަމަަށް ބަދަލުތަކާ ހެދި އެވެ.
"މިއީ އަޅުގަނޑުމެން ވިސްނުންތެރިކަމާ އެކީގައި ތިބެންވީ ވަގުތެއް. އަޅުގަނޑު ދެކޭ ގޮތުގައި ޕްރޮޖެކްޓްތައް މަޑުޖައްސައިލުމަކީ ބޭނުންތެރި ކަމެއް،" ނަޝީދު ވިދާޅުވި އެވެ.
އެމަނިކުފާނު ވިދާޅުވީ ޕްރޮޖެކްޓްތައް މަޑުޖައްސައިލާ ވާހަކަ ދައްކަން ދައްކަން މަޖިލީހުގެ މެމްބަރުންނާއި ސަރުކާރަށް ވެސް ދަތިވާނެ ކަން އެނގިވަޑައިގަންނަވާ ކަމަށެވެ. އެހެން ނަމަވެސް އެ ވާހަކަ އެމަނިކުފާނު ވިދާޅުވާން ޖެހިވަޑައިގަންނަވާ ކަމަށް ވެސް ވިދާޅުވި އެވެ.
"މީކީއެއް ބާރަށް، ކޮންކްރީޓްގެ ޕްރޮޖެކްޓްތައް ހިންގާވީ ވަގުތު ކަމަކަށެއް އަޅުގަނޑަކަށް ނުފެނޭ،" ނަޝީދު ވިދާޅުވި އެވެ.
ދުނިޔޭގެ އިގުތިސާދަށް ބޮޑެތި މައްސަލަތައް ކުރިމަތިވެފައިވާ ކަމަށް ވިދާޅުވެ، އޭގެ މިސާލެއްގެ ގޮތުގައި އެމަނިކުފާނު ދެއްކެވީ ތެލުގެ އަގު އުފުލެމުން ދިއުމެވެ. އިގުތިސޯދީ މައްސަލަތަކުގެ މިސާލެއްގެ ގޮތުގައި އެމަނިކުފާނު ދެއްކެވީ އަވަށްޓެރި ސްރީލަންކާއަށް މެދުވެރިވެފައިވާ މައްސަލަތަކެވެ.
އަސްލަމާ ސުވާލުކުރުމުގެ އިތުރުން މިއަދުގެ ޖަލްސާގައި އޮތީ ސަރުކާރުން ހުށަހަޅާފައިވާ، ކުނި މެނޭޖްކުރުމުގެ ބިލުގެ ބަހުސްކުރުމާއި ދަނގެތި ދާއިރާގެ އެމްއެންޕީ މެމްބަރު މުހައްމަދު ނާޒިމު ލާމަރުކަޒީ ގާނޫނަށް ހުށަހެޅުއްވި އިސްލާހުގެ ބަހުސެވެ. އެ ދެ ބަހުސްގައި ވެސް ބައިވެރިވެވަޑައިގެންނެވީ މަދު މެމްބަރުން ތަކެކެވެ.
