ލޯކަލް ކައުންސިލްތަކުން ތައްޔާރު ކުރާ ތަރައްގީގެ ޕްލޭނާއި ބިން ބޭނުން ކުރާނެ ގޮތުގެ ޕްލޭން ނުވަތަ ލޭންޑް ޔޫޒް ޕްލޭން ހެދުމަށް އޮތް ދަތިތައް ފިލުވަން ގާނޫނު އިސްލާހު ކުރަން ޖެހޭ ކަމަށް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
ރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނު މިހާރު އޮންނަ ގޮތުން ރަށު ކައުންސިލްތަކުން ހަދަން ޖެހޭ ޕްލޭންތައް ފާސްނުވެ، އެކަން މިހާރު ވެފައި އޮތީ މުޅި ލާމަރުކަޒީ ނިޒާމަށް ކުރި ތަސައްވުރަށް ބޮޑު ހުރަހަކަށެވެ. ރަށުގައި އާ މަޝްރޫއުތައް ހިންގާނެ ބިން ހޯދުން ވެސް ހުއްޓިފައިވާއިރު, ޕްލޭނިން މިނިސްޓްރީއަށް ވެސް އޭގެ އުނދަގޫ ވަނީ ފޯރާފަ އެވެ.
މިހާތަނަށް ގާނޫނުގައިވާ ގޮތުން, ފާސްކުރެވިފައިވަނީ އެންމެ ހަތް ރަށެއްގެ ޕްލޭނެވެ. މިހާތަނަށް 55 ރަށަކުން ޕްލޭން ހަދާފައިވީ ނަމަވެސް, އޭގައި މައްސަލަތައް ހުރުމުން ފާސްކުރެވިފައެއް ނުވެ އެވެ. ބައެއް ޕްލޭންތައް އަނބުރާ ވަނީ ފޮނުވާ ވެސްލާފަ އެވެ.
ގާނޫނުގައި ބަޔާންކުރާ ގޮތުން، އެ ޕްލޭންތަކަކީ ވަށާޖެހޭ ގޮތަށް ފަންނީ ގިނަ މައުލޫމާތުތަކެއް ހިމަނަންޖެހޭ ކަރުދާހެކެވެ. އެކަމަކު ކައުންސިލުތަކުގެ ގާބިލުކަމަށް ބަލާއިރު ގާނޫނުގައި ބަޔާންކުރާ މިންވަރަށް އެ ޕްލޭންތައް ފުރިހަމަ ކުރަން ގިނަ ގޮންޖެހުންތައް ހުރި ކަމަށް އެލްޖީއޭގެ ސީއީއޯ އަފްޝަން ލަތީފް ވަނީ ވިދާޅުވެފަ އެވެ.
އެކަމާ ގުޅޭ ހައްލުތައް ހޯދުމާ ގުޅޭ ގޮތުން މަޝްވަރާ ކުރުމަށް މިއަދު ކުރިއަށްދާ "ވިއަވަތި ރާއްޖެ" ކޮންފަރެންސްގައި ލޭންޑް ޔޫސް ޕްލޭން ހެދުމާ ގުޅޭ ސެޝަނެއް ވަނީ ބާއްވާފަ އެވެ. އެ ސެޝަންގައި ވާހަކަ ދައްކަވަމުން ރައީސް ސޯލިހު ވިދާޅުވީ, އެ ޕްލޭން ނުހެދިގެން އުޅޭތީ, ގާނޫނީ މައްސަލަތަކެއް ހުރިކަން އެބަ އެނގޭ ކަމަށެވެ. އެހެންވެ, އެކަންކަން ހައްލުކުރުމަށް ގާނޫނީ ބަދަލުތައް ސަރުކާރުން ގެންނާނެ ކަމަށް ރައީސް ވިދާޅުވި އެވެ.
ނަމަވެސް, އެ އިސްލާހުތަކުގެ ތަފްސީލަކަށް ރައީސް ވަޑައިނުގަންނަވަ އެވެ.
ޕްލޭނިން މިނިސްޓަރު މުހައްމަދު އަސްލަމް ވިދާޅުވި ގޮތުގައި, ޕްލޭން ހެދުމާ ގުޅޭ ގޮތުން އޮތް ދަތިތައް ފިލުވުމަށް އޮތީ ކުރަން ޖެހޭ ދެ ކަމެއް ކަމަށެވެ. ފުރަތަމަ ކަމަކީ, ގާނޫނަށް ގެންނަން ޖެހޭ ބަދަލުތައް ގެނައުން ކަމަށާއި ދެން އޮތީ ގާނޫނު މާނަކުރުން ކަމަށެވެ. އެގޮތުން, މިނިސްޓަރު ވަނީ ލޭންޑް ޔޫސް ޕްލޭންގައި ހިމަނަން ޖެހޭ ބައެއް ކަންކަން ފުރިހަމަ ކުރުމަށް ފަސޭހަ ގޮތްތަކެއް ކިޔައިދެއްވާފަ އެވެ.
ރަށުގެ މެޕް ކުރެހުމާއި, ގަހާއި ރުކުގެ އަދަދު ހިމެނުން ފަދަ ކަންކަމުގައި އަމަލުކުރަންވީ މިނިސްޓަރު އަސްލަމް ވިދާޅުވެދެއްވައި, އެކަން ކުރުމަށް ކައުންސިލްތަކަށް އެހީތެރިކަން ފޯރުކޮށްދެއްވާނެ ކަމަށް ވިދާޅުވި އެވެ.
ވިއަވަތި ކޮންފަރެންސްގެ ތެރެއިން --
ގާނޫނު އިސްލާހުކުރުމުގެ ވާހަކަ ރައީސް މިއަދު ވިދާޅުވި ނަމަވެސް, މީގެކުރިން މަޖިލީހުގެ ލާމަރުކަޒީ ކޮމިޓީގެ މުގައްރިރު އަދި ހުޅުމާލެ ދާއިރާގެ މެމްބަރު އަލީ ނިޔާޒް "އަދަދު"އަށް ވިދާޅުވީ ކަމެއް ނުކުރެވިގެން ގާނޫނު އިސްލާހުކުރުމަކީ އެންމެ ފަހު ކަމެއްގެ ގޮތުގައި އޮންނަންޖެހޭ ކަމަށް ގަބޫލުކުރައްވާ ކަމަށެވެ.
"ދެން ގާނޫނު އިސްލާހު ކޮށްގެން އޭގައި ބަޔާންކުރާ މައުލޫމާތު ލޭންޑް ޔޫސް ޕްލޭނުން އުނިކޮށްފިނަމަ އެކަން ކުރުމުގެ މަގުސަދު ގެއްލިގެން އެބަދޭ،" އަލީ ނިޔާޒް ވިދާޅުވެފައިވެ އެވެ.
އޭނާ ވިދާޅުވި ގޮތުގައި މި މައްސަލައިގެ ހައްލަކީ ފަންނީ މައުލޫމާތު ހިމަނަން މުއްދަތެއް ދިނުމަށްފަހު އެ ޕްލޭންތައް މިވަގުތަށް ފާސްކޮށްދިނުމެވެ. ކައުންސިލްތައް ހިނގައިގަނެ، ހަގީގީ މަސައްކަތްތައް ފަށައިގަނެވޭނީ އަލީ ނިޔާޒް ވިދާޅުވި ގޮތުގައި އެ މަސައްކަތް ނިންމައިގެނެވެ.
ނަމަވެސް, ގާނޫނުން ލާޒިމުކުރާ ކަމަކަށް ލުޔެއްދީގެން ޕްލޭންތައް ފާސްކޮށް ނުދެވޭނެ ކަމަށް ޕްލޭނިން މިނިސްޓްރީން އޮތީ ބުނެފަ އެވެ. މިނިސްޓަރު އަސްލަމް މަޖިލީހުގައި މީގެކުރިން ވިދާޅުވި ގޮތުގައި ވަޒީރުންނަކީ ގާނޫނުގެ މަތީގައި ތިބޭ ބައެއް ނޫނެވެ. އަދި ލޭންޑް ޔޫސް ޕްލޭންތައް ނުހެދިގެން އުޅުމަކީ އެކަން ނުކޮށް ދޫކޮށްލެވޭނެ ޒާތުގެ ކަމެއް ނޫން ކަމަށް ގަބޫލުކުރައްވާ ކަމުގައި އަސްލަމް ވިދާޅުވެފައިވެ އެވެ.
