ސިޑްނީ، އޮސްޓްރޭލިއާ (މޭ 28) - މޫސުމީ ބަދަލާ ގުޅިގެން ވަނުއަޓޫއަށް ކުރާ އަސަރުތަކުން ރައްކާތެރިވުމަށް 1.2 ބިލިއަން ޑޮލަރު ބޭނުންވާ ކަމަށް ކަނޑައަޅައި، މޫސުމީ ބަދަލާ ގުޅޭ ކުއްލި ނުރައްކަލުގެ ހާލަތު އިއުލާނުކޮށްފި އެވެ.
ވަނުއަޓޫ އަކީ ޕެސިފިކް ކަނޑުގައި އޮންނަ ކުޑަ، ޖަޒީރާ ގައުމެކެވެ. ރާއްޖެއާ އެއް ގޮތަށް، ވަނުއަޓޫއަކީ ކަނޑުގެ ލޮނުގަނޑު އުފުލުމުގެ ނުރައްކާ އެންމެ ބޮޑަށް ކުރިމަތިވެފައިވާ އެއް ގައުމެވެ.
ހުކުރު ދުވަހު ޕާލިމެންޓުގައި ވާހަކަ ދައްކަވަމުން ބޮޑު ވަޒީރު ބޮބް ލޯމޭން ވިދާޅުވީ ކަނޑުގެ ލޮނުގަނޑު އުފުލުމާއި މޫސުމީ އަސަރުތައް ވަރުގަދަވުމުން ޕެސިފިކް ސަރަހައްދަށް މިހާރު ވެސް ގެއްލުންތަކެއް ވަމުންދާ ކަމަށެވެ. އެގޮތުން ފާއިތުވި 10 އަހަރުގެ ތެރޭގައި ކުރިމަތިވި ދެ ތޫފާނަކާއި އާދަޔާ ހިލާފަށް ހޫނުގަދަވި ދުވަސްވަރެއް ފާހަގަކުރެއްވި އެވެ.
"މިހާރު ވެސް ދުނިޔެ މާ ބޮޑަށް ހޫނު، ނުރައްކާތެރި ވެއްޖެ. އަޅުގަނޑުމެން މިހާރު ވެސް މި ތިބީ ނުރައްކަލަށް ހުށަހެޅިފައި، ނުރައްކާ އޮތީ މުސްތަގްބަލުގައެއް ނޫން،" ލޯމޭން ވިދާޅުވި އެވެ.
މޫސުމީ ބަދަލާ ގުޅިގެން ކުއްލި ނުރައްކަލުގެ ހާލަތު އިއުލާން ކުރަން ޕާލިމެންޓްގެ ހުރިހާ މެމްބަރުން ތާއީދު ކުރެއްވި އެވެ. މީގެ ކުރިން އިނގިރޭސިވިލާތް، ކެނެޑާ އަދި ފިޖީ ފަދަ ގައުމުތަކުން ވެސް މޫސުމީ ބަދަލާ ގުޅިގެން ކުއްލި ނުރައްކަލުގެ ހާލަތު އިއުލާނުކޮށްފައިވެ އެވެ.
މޫސުމީ ބަދަލުގެ ސަބަބުން ކުރާ އަސަރާ ގުޅޭ ގާނޫނީ ލަފަޔެއް ހޯދުމަށް ވަނުއަޓޫ އިން އދ. ގެ އެންމެ މަތީ ކޯޓަށް ދާން މިދިޔަ އަހަރު ނިންމި އެވެ. އެހެންކަމުން، ކުއްލި ނުރައްކަލުގެ ހާލަތު އިއުލާނު ކުރީ އެ މަސައްކަތާ ގުޅިގެން ކަމަށް ބެލެވެ އެވެ.
ވަނުއަޓޫގެ އަމާޒަކީ މޫސުމީ ބަދަލުގެ ސަބަބުން އުފެދިފައިވާ ކާރިސާގެ ބޮޑުކަން ދުނިޔޭގެ އެންމެ މަތީ ގާނޫނީ އިދާރާ މެދުވެރިކޮށް ހާމަކުރުމެވެ.
ނަމަވެސް އެ ކޯޓުން ނެރޭ ގާނޫނީ ލަފަޔަކީ އެއަށް އަމަލު ކުރުން ކޮންމެހެން މަޖުބޫރު އެއްޗެއް ނޫނެވެ. ނަމަވެސް ވަނުއަޓޫ އިން އުއްމީދު ކުރަނީ އެ ލަފާގެ މައްޗަށް ބިނާކޮށް، ދުނިޔޭގެ މުސްތަގްބަލަށް ބޭނުންވާ ބައިނަލްއަގްވާމީ ގާނޫނުތައް ހެދުމުގެ މޫސުމީ ބަދަލުން އިންސާނީ ހައްގު ގެއްލޭ ގޮތުގެ މައްޗަށް ބަލާނެ ކަމަށެވެ.
