މާލޭގައި ކަރަންޓް ފޯރުކޮށްދޭ މައި ކޭބަލަކަށް (ފީޑަރަކަށް) ދިމާވި މައްސަލަ ހައްލުކުރުމަށް އާ ކޭބަލެއް އަޅައި، ކަރަންޓު ކެނޑުމުގެ މައްސަލަ މާލެއަށް ކަރަންޓު ފޯރުކޮށްދޭ ސްޓޭޓް އިލެކްޓްރިކް ކޮމްޕެނީ (ސްޓެލްކޯ) އިން ހައްލުކޮށްފި އެވެ.
މި މަހުގެ 24 ވަނަ ދުވަހުގެ ފަތިހު، 10 ސަބްސްޓޭޝަނަކަށް ކަރަންޓް ފޯރުކޮށްދޭ މައި ކޭބަލެއް ހަލާކުވެ، މުޅި މާލެއިން ކަރަންޓު ކެނޑުނެވެ. ސްޓެލްކޯއިން ބުނީ މައްސަލަ ހައްލު ކުރަން އެޅި އާ ކޭބަލް ސަބްސްޓޭޝަނާ ގުޅާލުމުގެ މަސައްކަތް މިހާރު ކުރިއަށްދާ ކަމަށެވެ. އަދި މި މަސައްކަތް ކުރިއަށްދާ ވަގުތުތަކުގައި ބައެއް ސަރަހައްދުތަކުން ކަރަންޓު ކެނޑޭނެ ކަމަށެވެ.
"މި ކުންފުނީގެ ޑިސްޓްރިބިއުޝަން ނެޓްވޯކްގެ ގެއްލުންވެފައިވާ ކޭބަލްގެ ބަދަލުގައިއަލަށް އަޅާފައިވާ ކޭބަލް ސަބްސްޓޭޝަނާއި ގުޅާލައި، އެނާޖައިޒް ކުރުމަށް މިއަދު ހަވީރު 4:00ގައި ގާކޮށި ފްލެޓްތައް ހިމެނޭ ސަރަހައްދުން 20 މިނެޓަަށް ކަރަންޓު ކެނޑިގެންދާނެ،" ސްޓެލްކޯއިން ސޯޝަލް މީޑިއާގައި ބުނެފައިވެ އެވެ.
ހަލާކުވި ކޭބަލްގެ ބަދަލުގައި އާ ކޭބަލެއް ވަޅުލާން ސްޓެލްކޯއިން ނިންމީ މަރާމާތު ކުރުމަކީ ރިސްކު އޮތް ކަމަކަށް ވާތީ ކަމަށް ސްޓެލްކޯއިން މީގެ ކުރިން ބުނެފައިވެ އެވެ.
