ލަންޑަން، އިނގިރޭސިވިލާތް (މޭ 26) - އިނގިރޭސިވިލާތުގައި ހޮލީވުޑްގެ އެކްޓަރު ކެވިން ސްޕޭސީއަށް ޖިންސީ ގޯނާ ކުރުމުގެ ދައުވާ އުފުލައިފި އެވެ.
ކެވިން ސްޕޭސީ ވަނީ "ދަ ޔޫޝުއަލް ސަސްޕެކްޓްސް" އަދި "އެމެރިކަން ބިޔުޓީ" އިން އޮސްކާ އެވޯޑް ހާސިލްކޮށްފަ އެވެ. އޭނާއަކީ 2004 އިން 2015 އަށް ލަންޑަންގެ ދަ އޯލްޑް ވިކް ތިއޭޓަރުގެ އާޓިސްޓިކް ޑިރެކްޓަރެވެ.
ކެވިން ސްޕޭސީއާ ގުޅޭ ތުހުމަތުތަކެއް އެންމެ ފުރަތަމަ ފެންމަތިވީ "މީޓޫ" ހަރަކާތް ފެށިގެން އައި ދުވަސްވަރު އެވެ. އެއާއެކު ލަންޑަން މެޓްރޮޕޮލިޓަން ފުލުހުން ތަހުގީގެއް ފެށި އެވެ.
ރިޕޯޓުތައް ބުނާ ގޮތުން ޖިންސީ ގޯނާ ކުރުމުގެ ދައުވާ އުފުލީ ތަފާތު ތިން ފިރިހެނަކު ހިމެނޭ މައްސަލަތަކެއްގައި ކަމަށެވެ. އެއީ 2005 ވަނަ އަހަރުގެ މައްސަލައަކާއި، 2008 ވަނަ އަހަރު ހިނގި މައްސަލައަކާއި، 2013 ވަނަ އަހަރު މައްސަލަ އެކެވެ.
މީގެ ފަސް އަހަރު ކުރިން ތުހުމަތުތައް ފެންމަތިވުމާ އެކު އޭނާ ކުޅެމުން ދިޔަ ހިޓް ސީރީޒް "ދަ ހައުސް އޮފް ކާޑްސް" ގެ ޕްރޮޑަކްޝަން ހުއްޓާލަން ޖެހުނެވެ.
ރިޕޯޓުތައް ބުނާ ގޮތުން އޭނާ މިހާރު ދަނީ ފިލްމެއްގެ ރޯލަށް ތައްޔާރުވަމުންނެވެ. އެ ފިލްމުން ކެވިން ސްޕޭސީ ފެނިގެން ދާނީ މީހުން މަރާ މީހެއްގެ ރޯލުންނެވެ.
