ހުޅުމާލެ ދެ ވަނަ ފިޔަވަހީގައި އިމާރަތްކުރަމުންދާ ސަރުކާރު ހިއްސާވާ ކުންފުނިތަކުގެ ފްލެޓުތަކަށް އަންނަ ސެޕްޓެމްބަރު ކަރަންޓު ދެވޭނެ ކަމަށް ހައުސިން ޑިވޮލޮޕްމެންޓް ކޯޕަރޭޝަން (އެޗްޑީސީ)ން މިއަދު ބުނެފި އެވެ.
ހުޅުމާލެ ދެވަނަ ފިޔަވަހީގެ ކަރަންޓު ނެޓްވޯކް އެޅުމުގެ މަޝްރުއާ ގުޅޭ ގޮތުން އެޗްޑީސީން މިއަދު ބުނީ އެ މަޝްރޫއު ކުރިއަށް ދަނީ ބްރައުންސް-ސީއެމްއީސީ ކުންފުންޏާ ހަވާލުކޮށްގެން، ސްޓެލްކޯގެ އެއްބާރުލުމާއެކުގައި ކަމަށެވެ.
"މި މަޝްރޫއުގައި ސްޓެލްކޯގެ މަސްއޫލިއްޔަތަކީ، މި ކޯޕަރޭޝަނާއެކު ވެފައިވާ އެއްބަސްވުމުގައި ވާ ގޮތަށް، މި މަޝްރޫއުގެ ޑިޒައިންތައް ބަލާ ފާސްކޮށް، ޓެކްނިކަލް ކޮންސަލްޓެންސީ ދިނުމެވެ. މި މަޝްރޫއުގައި މިވަގުތު ކުރިއަށް ދަނީ ޑިޒައިންތައް ބަލާ ފާސްކުރުމާއި އަދި މައި ސަބްސްޓޭޝަންގެ އަމަލީ މަސައްކަތެވެ." އެޗްޑީސީން ބުންޏެވެ.
ބްރައުންސް-ސީއެމްއީސީ ކުންފުންޏާއި ސްޓެލްކޯއާއެކު ވެފައިވާ އެއްބަސްވުމުގެ ދަށުން ފޭސް ދޭއްގައި އަޅަން ފަށާފައިވާ ސަރުކާރު ކުންފުނިތަކުގެ ފްލެޓުތަކަށް ކަރަންޓު ދިނުމުގެ މަސައްކަތް ކުރަމުން އަންނަ ކަމަށާއި އެ މަސައްކަތް ސެޕްޓެމްބަރަށް ނިމޭނެ ކަމަށް އެޗްޑިސީން ނެރުނު ބަޔާނުގައި ބުނެފައިވެ އެވެ.
އެޗްޑސީން ނުނީ ދެ ވަނަ ފިޔަވަހީގައި މީހުން ދިރިއުޅެން ފެށުމާއެކު، ވަގުތީގޮތުން ކަރަންޓު ފޯރުކޮށްދޭން ސްޓެލްކޯއާއެކު މަޝްވަރާތައް ކުރެވިފައިވާ ކަމަށެވެ. އެގޮތުން ދެ ވަނަ ފިޔަވަހީގައި އަމިއްލަ ފަރާތްތަކުން ދިރިއުޅޭ ތަންތަނަށް ކަރަންޓު ދީފައިވާކަން ފާހަގަކުރި އެވެ.
ހުޅުމާލެ ދެވަނަ ފިޔަވަހީގައި ކުރީ ސަރުކާރުން ހިންގި "ހިޔާ" މަޝްރޫއުގެ ތެރެއިން ސަރުކާރު ހިއްސާވާ ކުންފުނިތަކަށް ފްލެޓު އިމާރާތް ކުރުމަށް ބިން ދޫކޮށްފައިވާއިރު، ސްޓެލްކޯ އާއި މޯލްޑިވްސް ވޯޓާ އެންޑް ސުވަރޭޖް ކޮމްޕެނީ (އެމްޑަބްލިއުއެސްސީ) އާއި މޯލްޑިވްސް ޕޯޓްސް ލިމިޓަޑް (އެމްޕީއެލް) އަދި މޯލްޑިވްސް އެއާޕޯޓްސް ކޮމްޕެނީ ލިމިޓަޑް (އެމްއޭސީއެލް) އިން ވަނީ ފްލެޓު އިމާރާތްކޮށްފަ އެވެ.
