ބެއިޖިން، ޗައިނާ (މޭ 26) - ކޮވިޑްގެ ސަބަބުން އިގްތިސާދަށް ކުރާ އަސަރާ މެދު ކަންބޮޑުވުން ފާޅުކޮށް، އާދައިގެ ހާލަތަކަށް ރުޖޫއަ ވާން ޖެހޭ ކަމަށް ޗައިނާގެ ޕްރިމިއާ ލީ ކެކިއާންގް ވިދާޅުވެއްޖެ އެވެ.
ކޮވިޑާ ގުޅިގެން އަޅާފައިވާ ހަރުކަށި ފިޔަވަޅުތަކެއް ލުއި ނުދީ އޮތް ހަމައެކަނި ބޮޑު ގައުމަކީ މިހާރު ޗައިނާ އެވެ. އެ ގައުމުގައި ދަނީ ލޮކްޑައުންތައް ތަންފީޒުކޮށް، ގިނަ ބަޔަކު އެއް ފަހަރާ ޓެސްޓު ކުރަމުންނެވެ.
އުފެއްދުންތެރިކަމުގެ މައި ދެ މަރުކަޒުގެ ގޮތުގައިހިމެނޭ ޝެންޒެން އަދި ޝަންހާއީ ލޮކްޑައުން ކުރުމުގެ ސަބަބުން ސަޕްލައި ޗެއިނަށް އަސަރުކޮށް، އިގްތިސާދީ ހާލަތު ވަނީ ދަށަށް ދާން ފަށާފަ އެވެ.
"އަޅުގަނޑުމެން މިހާރު މި ތިބި ހިސާބަކީ މި އަހަރުގެ ބާކީ ބައިގައި އިގްތިސާދީ ޓްރެންޑް އޮންނާނެ ގޮތް ބިނާ ކުރާނެ ހިސާބު،" ސްޓޭޓް ކައުންސިލް ބައްދަލުވުމެއްގައި ކެކިއާންގް ވިދާޅުވި އެވެ.
"އެހެންވީމާ މި ވަގުތާއި ހިސާބުގެ ބޭނުން ހިފައި އިގްތިސާދު އަލުން އަނބުރާ އާދައިގެ ހާލަތަކަށް ރުޖޫއަ ކުރަން ގަދަ އަޅާ މަސައްކަތް ކުރަން ޖެހޭ."
ކޮވިޑް ކޮންޓްރޯލް ކުރަން އަޅާ ފިޔަވަޅުތަކާއި އިގްތިސާދީ ކުރިއެރުން ދެމެހެއްޓުމުގެ މަސައްކަތުގައި ބެލެންސެއް ގެންގުޅުމަށް ޗައިނާގެ ބައެއް އިސް އޮފިޝަލުން ދަނީ ބާރު އަޅަމުންނެވެ.
މި އަހަރުގެ އެޕްރީލް މަހުގެ ނިޔަލަށް ޗައިނާ ރީޓެއިލް ސޭލްސް 11.1 ޕަސެންޓް ދަށްވި އިރު، ފެކްޓްރީ އުފެއްދުންތެރިކަން 2.9 ޕަސެންޓް ދަށްވި އެވެ.
