ބާންލީ (މެއި 26) - މި ސީޒަނުގައި އިނގިރޭސި ޕްރިމިއާ ލީގުން ރެލިގޭޓްވި ބާންލީ އަލުން ލީގަށް ޕްރޮމޯޓްވުމަށް ކުރާ މަސައްކަތުގައި އެ ޓީމުން ކޯޗެއް ހޯދަން ޖެހިފައިވާއިރު، އެ ޓީމުން ފާލަރާ ކޯޗުންގެ ތެރޭގައި މެންޗެސްޓާ ސިޓީގެ ކުރީގެ ޑިފެންޑަރު ވިންސެންޓް ކޮމްޕެނީ ހިމެނޭ ކަމަށް ރިޕޯޓްތައް ބުނެފި އެވެ.
ހަތް އަހަރަށް ފަހު ބާންލީ ޕްރިމިއާ ލީގުން ރެލިގޭޓްވީ ލީގުގެ ފަހު ދުވަހު އަމިއްލަ ދަނޑުގައި ނިއުކާސަލް ޔުނައިޓެޑް އަތުން ބަލިވުމުންނެވެ. ބާންލީ އަށް 10 އަހަރު ދުވަހު ކޯޗުކޮށްދިން ޝޯން ޑައިޝް ވަނީ މިދިޔަ އޭޕްރީލް މަހު މަގާމުން ވަކިކޮށްފަ އެވެ.
އޭގެ ފަހުން ވަގުތީ ކޯޗެއްގެ ގޮތުގައި ބާންލީ އަށް އިރުޝާދުދިނީ މައިކް ޖެކްސަން އެވެ. ނިސްބަތުން ރަނގަޅު މަސައްކަތެއް ޖެކްސަން ކުރި ނަމަވެސް އެ ޓީމު ރެލިގޭޓްވުމުން ސަލާމަތް ނުކޮށްދެވުނެވެ.
ސިޓީ އަށް 11 އަހަރު ކުޅެދިން ކޮމްޕެނީ، ވަނީ 2019 ވަނަ އަހަރު ކުޅުންތެރިއަކާ ކޯޗެއްގެ ވަޒީފާއާ އެކު އަލުން އަންޑަލެކްޓަށް ބަދަލުވެފަ އެވެ. ފުލް ޓައިމް ކޯޗެއްގެ ގޮތުގައި 2020 ވަނަ އަހަރުގެ އޮގަސްޓް މަހުން ފެށިގެން މި ސީޒަނުގެ ނިޔަލަށް އަންޑަލެކްޓަށް ކޮމްޕެނީ ކޯޗުކޮށްދިނެވެ.
ބެލްޖިއަމް ލީގުގެ ތިން ވަނަ އަށް އަންޑަލެކްޑް ދިޔައިރު، އެ ޓީމު ވަނީ ބެލްޖިއަމް ކަޕް ފައިނަލުން ބަލިވެފަ އެވެ. އުމުރުން 36 އަހަރުގެ ކޮމްޕެނީ ވަނީ ބެލްޖިއަމްގެ ކޯޗުކަން ދޫކޮށްލައިފަ އެވެ. ރިޕޯޓްތައް ބުނާގޮތުން އަންނަ ހަފްތާގައި ކޮމްޕެނީ އާއި ބާންލީއާ ދެމެދު މަޝްވަރާ ބައްދަލުވުންތަކެއް ކުރިއަށްދާނެ އެވެ.
