ނިއު ދިއްލީ، އިންޑިއާ (މޭ 25) - އިންޑިއާއިން ގޮދަން ފުށް އެކްސްޕޯޓް ކުރިތާ މާ ގިނަސް ދުވަސްތަކެއް ނުވަނީސް ހަކުރު އެކްސްޕޯޓް ކުރުން ވެސް ލިމިޓުކޮށްފި އެވެ.
އިންޑިއާއިން ބުނީ ހަކުރު އެކްސްޕޯޓް ކުރުން ލިމިޓު ކުރީ، އެ ގައުމުގެ އެތެރޭގައި ހަކުރުގެ ދަތިކަން ކުރިމަތިވެދާނެތީ ސަޕްލައި ރައްކާތެރި ކުރުމަށް ކަމަށެވެ.
އިންޑިއާއަކީ ދުނިޔޭގައި އެންމެ ގިނައިން ހަކުރު އުފައްދާ އަދި ބްރެޒިލްއަށް ފަހު ދެ ވަނައަށް އެންމެ ގިނައިން ހަކުރު އެކްސްޕޯޓް ކުރާ ގައުމެވެ.
އެ ގައުމުގެ ސަރުކާރުން އަންގާރަ ދުވަހު ބުނީ އަންނަ ސެޕްޓެމްބަރު މަހާ ހަމައަށް އެކްސްޕޯޓް ކުރެވޭނީ 10 މިލިއަން ޓަނުގެ ހަކުރު ޝިޕްމަންޓްގެ ގޮތުގައި ކަނޑައަޅާފައިވާ ކަމަށެވެ.
"މިގޮތަށް ނިންމީ އިންޑިއާގެ އެތެރޭގައި ހަކުރުގެ ސަޕްލައި ހުންނާނެކަން ޔަގީންކޮށް އަގު އެއްވަރެއްގައި ހިފެހެއްޓުމަށް،" ކާބޯތަކެއްޗާ ބެހޭ މިނިސްޓްރީން ނެރުނު ބަޔާނުގައި ބުންޏެވެ.
ކުރިން އެނެލިސްޓުން އަންދާޒާ ކުރި ގޮތުގައި މި އަހަރުގެ ތެރޭގައި ހަކުރުގެ އެކްސްޕޯޓް ރެކޯޑް މިންވަރަށް މަތި ވާނެ އެވެ. މިހާތަނަށް ނުވަ މިލިއަން ޓަނުގެ އެއްބަސްވުމުގައި ސޮއިކޮށްފައިވާ އިރު، 7.8 މިލިއަން ޓަން މިހާރު ވެސް އެކްސްޕޯޓްކޮށްފައިވެ އެވެ.
އިންފްލޭޝަނާޢި ކާބޯތަކެތީގެ ރައްކާތެރިކަން ކަށަވަރު ކުރުމަށް ބުނެ، މޭ މަހުގެ މެދު ތެރޭގައި އިންޑިއާއިން ވަނީ ސަރުކާރުގެ ހުއްދަ ނެތި ގޮދަން އެކްސްޕޯޓް ކުރުން ވެސް މަނާކޮށްފަ އެވެ. އެ ނިންމުމާ އެކު ދުނިޔޭގެ މާކެޓުގައި ކާބޯތަކެތީގެ އަގު އިތުރަށް އުފުލުނެވެ.
އިންޑިއާގެ އިތުރުން، އޭޝިއާގެ އެހެން ބައެއް ގައުމުތަކުން ވެސް ވަނީ އެތެރޭގެ ކާބޯތަކެތީގެ ރައްކާތެރިކަން ކަށަވަރު ކުރުމަށް ބައެއް ފިޔަވަޅުތައް އަޅާފަ އެވެ. އެގޮތުން އިންޑޮނީޝިއާއިން ޕާމް އޮއިލް އެކްސްޕޯޓް ކުރުން ވަގުތީ ގޮތުން މަނާ ކުރިއިރު، މެލޭޝިއާއިން ވަނީ ކުކުޅު އެކްސްޕޯޓް ކުރުން މަނާކޮށްފަ އެވެ.
ކާބޯތަކެއްޗާ ގުޅިގެން މިފަދަ ފިޔަވަޅުތަކެއް ގައުމުތަކުން އަޅަން ފެށީ ރަޝިއާގެ ސިފައިން މިދިޔަ ފެބްރުއަރީ މަހު ޔޫކްރެއިނަށް އަރައި ހަނގުރާމަ ކުރަން ފެށުމުންނެވެ.
ކޮވިޑް ބަލިމަޑުކަމުގެ އަސަރުން ގައުމުތައް ރަނގަޅަށް އަރައިނުގަނެވިގެން އުޅެނިކޮށް، ޔޫކްރެއިންގައި ހަނގުރާމަ ފެށުމުން، ދުނިޔޭގެ ބާޒާރުގައި ތަކެތީގެ އަގުތައް ވަރަށް ބޮޑަށް އުފުލެން ފެށި އެވެ. އެހެންވެ، ކާބޯތަކެތީގެ އެކްސްޕޯޓް ލިމިޓް ނުކުރުމަށް ވެސް ބޮޑެތި ގައުމުތަކުން ގޮވާލާފައިވެ އެވެ.
