އިސްލާމްއާބާދް، ޕާކިސްތާން (މޭ 24) - ޕާކިސްތާނުގައި މަގާމުން ވަކިކޮށްފައިވާ ކުރީގެ ބޮޑު ވަޒީރު އިމްރާން ހާންގެ ސަޕޯޓަރުންގެ ބޮޑު މުޒާހަރާއަކާ ދިމާކޮށް ގިނަ ބަޔަކު ހައްޔަރު ކުރަމުންދާ ކަމަށް އިދިކޮޅު ޕާޓީއިން ތުހުމަތުކޮށްފި އެވެ.
އިތުބާރު ނެތް ކަމުގެ ވޯޓެއް ނަގައި އިމްރާން ހާން މަގާމުން ވަކިކުރީ މިދިޔަ މަހު އެވެ. އެމަނިކުފާނު ގެންދަވަނީ ޕާކިސްތާނުގެ އެކި ކަންކޮޅުތަކުގައި އާ ކޯލިޝަން ސަރުކާރާ ދެކޮޅަށް ތަކުރާރުކޮށް ބޮޑެތި އެއްވުންތައް ބާއްވަމުންނެވެ.
އިމްރާން ހާން ތުހުމަތު ކުރައްވާ ގޮތުގައި އިތުބާރު ނެތް ކަމުގެ ވޯޓު ނެގީ "ބޭރު ގައުމެއްގެ ނުފޫޒު" އޮވެގެންނެވެ. ބުދަ ދުވަހު ބާއްވަން މަސައްކަތް ކުރާ މުޒާހަރާ ފަށަނީ ޕެޝާވަރުންނެވެ. އެ ހިސާބުން ވެރިރަށް އިސްލާމްއާބާދްއާ ހަމައަށް ހިނގާލުމެއް ބާއްވަން ރާވާފައިވެ އެވެ.
"މާދަމާ އަޅުގަނޑު ހުންނާނީ ޕާކިސްތާނުގެ ތާރީހުގައި ބާއްވާ އެންމެ ބޮޑު ހިނގާލުމުގެ ކުރީ ސަފުގައި. މިއީ ސިޔާސީ ކަމެއްގެ ގޮތުގައި އަޅުގަނޑު ނުދެކެން، މިއީ ޖިހާދު ކުރުން،" އިމްރާން ހާން ވިދާޅުވި އެވެ.
މުޒާހަރާއާ ގުޅިގެން ޕާކިސްތާނުގެ އެކި ހިސާބުގައި ސެކިއުރިޓީ ވަރުގަދަކޮށްފައިވާ އިރު އިސްލާމްއާބާދުގެ ބޮޑެތި މަގުތަކުގައި ރޯޑްބްލޮކް ބަހައްޓާފައިވެ އެވެ. ސަރުކާރުގެ އިމާރާތްތައް ހިމެނޭ ސަރަހައްދު ވަނީ ލޮކްޑައުންކޮށްފަ އެވެ.
"މި މުޒާހަރާގެ ބޭނުމަކީ ގައުމު ބައިބައިކޮށް ހަމަނުޖެހުމަށް ހިތްވަރު ދިނުން،" އިންޓީރިއާ މިނިސްޓަރު ރަނާ ސަނާއުﷲ ވިދާޅުވި އެވެ.
"މި ހިނގާލުން ބާއްވަން ފުރުސަތު ދީގެން ނުވާނެ،" އިންފޮމޭޝަން މިނިސްޓަރު މަރިޔުމް އޯރަންގްޒެބް ވިދާޅުވި އެވެ.
ފުލުހުންގެ އޮފިޝަލުން ބުނީ އިމްރާން ހާންގެ ޕާކިސްތާން ތެހްރީކޭ އިންސާފް (ޕީޓީއައި) ޕާޓީއަށް ނިސްބަތްވާ 200 އަށް ވުރެ ގިނަ މީހުން ހައްޔަރުކޮށްފައިވާ ކަމަށެވެ. ކުރީގެ އިންފޮމޭޝަން މިނިސްޓަރު ފަވާދް ޗައުދަރީ ވިދާޅުވީ ހައްޔަރު ކުރި މީހުންގެ އަދަދު 400 އަށް ވުރެ މަތި ވާނެ ކަމަށާއި މީހުން ހައްޔަރު ކުރަމުން ދަނީ އެއްވެސް ސަބަބެއް ނެތި ކަމަށެވެ.
"ރޭ ދަންވަރު 1،110 އަށް ވުރެ ގެޔަށް ފުލުހުން ވަނީ އަމުރެއް ނެތ. ގެތަކުގައި ތިބި އަންހެނުންނާއި ކުދިންނަށް ބިރު ދައްކައި ފުރައްސާރަ ކުރި،" އޭނާ ޓްވީޓް ކުރެއްވި އެވެ.
އާ ބޮޑު ވަޒީރު ޝެހްބާޒް ޝަރީފްގެ ޕާކިސްތާން މުސްލިމް ލީގް-އެން ގެ އިސް މެމްބަރެއް ކަމަށްވާ އަތާއުﷲ ތަރާރް ވިދާޅުވީ އިދިކޮޅު ސަޕޯޓަރުން ރާވައިގެން އުޅެނީ ހަތިޔާރާ އެކު މުޒާހަރާއަށް ނުކުތުމަށް ކަމަށެވެ.
