ބެއިޖިން، ޗައިނާ (މޭ 24) - އދ. ގެ އިންސާނީ ހައްގުތަކާ ބެހޭ އިސްވެރިޔާ ޗައިނާއަށް ކުރައްވާ ދަތުރުގެ ސަބަބުން އެ ގައުމާ ގުޅޭ ގޮތުން ދޮގު މައުލޫމާތު ފެތުރުން ހުއްޓޭނެ ކަމަށް އުއްމީދު ކުރާ ކަމަށް ފޮރިން މިނިސްޓަރު ވާންގް ޔީ ވިދާޅުވެއްޖެ އެވެ.
ވާންގް ޔީ އާއި މިޝޭލް ބެޝެލެޓް ހޯމަ ދުވަހު ބެއިޖިންގައި ބައްދަލުކުރެއްވި އެވެ. ޗައިނާ ފޮރިން މިނިސްޓްރީން ބުނީ ބެޝެލެޓްގެ ދަތުރުގެ ސަބަބުން ޗައިނާއާ ބެހޭ ދޮގު މައުލޫމާތު ހަގީގަތް ހާމަވެ، އެކުގައި މަސައްކަތް ކުރުމުގެ ރޫހު އާލާ ކުރުމުގެ ޝައުގު ވާންގް ޔީ ފާހަގަކުރެއްވި ކަމަށެވެ.
ވާންގް ވިދާޅުވީ މައިނޯރިޓީންގެ ހައްގުތައް ރައްކާތެރި ކުރުމަށާއި އާއްމު ރައްޔިތުންގެ ފުރާނަ ރައްކާތެރި ކުރުމަކީ ޗައިނާ ސަރުކާރުން ބޮޑު އިސްކަމެއް ދޭ ދެ ކަންތައް ކަމަށެވެ.
"ބައިނަލްއަގްވާމީ ގޮތުން އިންސާނީ ހައްގުތައް ކުރިއަރުވަން ބޭނުން ނަމަ، އަޅުގަނޑުމެން އެންމެ ފުރަތަމަ ވެސް ޖެހޭނީ އިންސާނީ ހައްގުތައް ސިޔާސީ ކުރުން ހުއްޓާލަން،" އޭނާ ވިދާޅުވި އެވެ.
ބެޝެލެޓްގެ ހަ ދުވަހުގެ ދަތުރުގައި ޝިންޖިއާންގެ އުރުމްގީ އަދި ކަޝްގަރް ސިޓީއަށް ވަޑައިގަންނަވާނެ އެވެ. މިއީ އދ. ގެ އިސް އޮފިޝަލަކު 2005 ވަނަ އަހަރަށް ފަހު ޗައިނާއަށް ކުރައްވާ ފުރަތަމަ ދަތުރެވެ.
ޗައިނާގެ ވެރިކަން ކުރާ ކޮމިއުނިސްޓް ޕާޓީއަށް ތުހުމަތު ކުރެވޭ ގޮތުގައި މިލިއަނަކަށް ވުރެ ގިނަ އުއިގާ ދަރިކޮޅުގެ މުސްލިމުން ޝިންޖިއާންގެ ރެފިއުޖީ ކޭމްޕުތަކުގައި ބަންދުކޮށްފައިވެ އެވެ. ނަމަވެސް ޗައިނާއިން ތުހުމަތު ދޮގުކޮށް ބުނަނީ އެއީ ހުޅަނގުން "މި ގަރުނުގައި ހެދި އެންމެ ބޮޑު ދޮގު" ކަމަށެވެ.
