ހުޅުމާލެ ޖަލުގައި ހުކުމް ތަންފީޒު ކުރަމުން ދިޔަ ގައިދީއަކަށް ނޭވާލާން އުނދަގޫވެ، ސިއްހަތު ގޯސްވެގެން އެމަޖެންސީގައި ހުޅުމާލެ ހޮސްޕިޓަލަށް ގެންގޮސް ފަރުވާ ދެނިކޮށް މިއަދު މަރުވެއްޖެ އެވެ.
ޖަލުތައް ބެލެހެއްޓުމުގެ ޒިންމާ އޮންނަ ކަރެކްޝަންސް އިން ބުނީ މަރުވީ އއ. ހިމަންދޫ ހެޕީ ރެސްޓް އަލީ މުހައްމަދު، 58، ކަމަށެވެ. އެއީ ކުޑަ ކުއްޖަކާއެކު ޖިންސީ އަމަލު ހިންގުމުގެ ކުށުގައި 10 އަހަރު ދުވަހުގެ ހުކުމެއް ތަންފީޒު ކުރަމުން ދިޔަ މީހެކެވެ.
އަލީ މުހައްމަދު ޖަލުގެ އޭނާ ހުންނަ ޔުނިޓު ތެރޭގައި ހުއްޓައި ނޭވާލުމުގައި އުނދަގޫތަކެއް އިހްސާސް ކުރުމުން ފުރަތަމަ ފަރުވާ ދިނީ ޖަލުގެ މެޑިކަލް ސެންޓަރުން ކަމަށް ކޮަރެކްޝަންސް އިން ބުނެ އެވެ. ހުޅުމާލެ ހޮސްޕިޓަލަށް އަލީ މުހައްމަދު ގެންދިޔައީ އޭނާގެ ހާލަތު އިތުރަށް ގޯސްވާން ފެށުމުން ކަމަށް ކަރެކްޝަންސްގެ ބަޔާނުގައި ބުނެފައިވެ އެވެ.
އަލީ މުހައްމަދަށް ހުޅުމާލެ ހޮސްޕިޓަލުގައި ފަރުވާދެނިކޮށް މަރުވީ ހަވީރު 3:20 ހާއިރެވެ.
"އަލީ މުހައްމަދު ހުޅުމާލެ ހޮސްޕިޓަލަށް ގެންދިއުމާ ގުޅިގެން މިސަރވިސްއިން ވަނީ ވަގުތުން އެކަން އޭނާގެ ޢާއިލާއަށާއި އިންސްޕެކްޓާ އޮފް ކަރެކްޝަނަލް ސާވިސްއަށާއި މޯލްޑިވްސް ޕޮލިސް ސަރވިސްއަށާއި ހިއުމަން ރައިޓްސް ކޮމިޝަން އޮފް ދަ މޯލްޑިވްސްއަށާއި ނެޝަނަލް އިންޓެގްރިޓީ ކޮމިޝަން އަށް އަންގާފަ،" އެ ބަޔާނުގައިވެ އެވެ.
