މެނީލާ، ފިލިޕީންސް (މޭ 23) - ފިލިޕީންސްގެ ފެރީއެއްގައި ރޯވެ ހަތް މީހުން މަރުވެފައިވާ ކަމަށް އެ ގައުމުގެ ކޯސްޓުގާޑުން ބުނެފި އެވެ.
މާކްރާފްޓް-2 ފެރީގައި ރޯވީ ހޯމަ ދުވަހުގެ ހެނދުނު 06:30 ހާއިރު 134 ޕަސެންޖަރުންނާއި ކްރޫއާ އެކު ދަތުރު ކުރަނިކޮށެވެ. ފެރީ ދަތުރު ކުރަމުން ދިޔައީ ޕޮލިލޯ ރަށުން ރިއާލް ރަށަށެވެ.
ފިލިޕީންސް ކޯސްޓުގާޑުގެ ތަރުޖަމާނު އާމަންޑޯ ބަލީލޯ ވިދާޅުވީ ހަތް މީހުން މަރުވި އިރު، 120 މީހުން ސަލާމަތްކޮށްފައިވާ ކަމަށެވެ. އިތުރު ހަތް މީހުން ގެއްލިގެން ހޯދުމުގެ އޮޕަރޭޝަނެއް ދަނީ ކުރިއަށެވެ.
ކޯސްޓުގާޑުން އާއްމު ކުރި ފޮޓޯތަކުން ފެންނަނީ ފެރީގެ ތެރެއިން ބޯ، ކަޅު ދުންތައް އަރާ މަންޒަރެވެ. ލައިފް ޖެކެޓާއި ރިންގު ހިފައިގެން ބައެއް މީހުން ކަނޑަށް ފުއްމާލި އެވެ.
އިތުރު މީހުން ސަލާމަތްވީ އިންފްލޭޓަބަލް ބޯޓާއި އެހީ ވާން ކައިރިވި އެހެން ފެރީތަކަށް އަރައިގެންނެވެ. ބަލީލޯ ވިދާޅުވީ އެންމެ ފުރަތަމަ އަލިފާން ރޯވީ އިންޖީން ކޮޓަރީގައި ކަމަށެވެ.
އަލިފާން ރޯވާން ދިމާވި ސަބަބު ދެނެގަންނަން ތަހުގީގީ ޓީމަކުން ވަނީ މަސައްކަތް ފަށާފަ އެވެ.އެ ހާދިސާގައި 23 މީހުންނަށް އަނިޔާވި އިރު، އޭގެ ތެރޭގައި ބޯޓުގެ ކެޕްޓަން ވެސް ހިމެނެ އެވެ.
ހަތް ހާހަށް ވުރެ ގިނަ ރަށްތަކުން އުފެދިފައި އޮންނަ ޖަޒީރާ ގައުމެއް ކަމަށްވާ ފިލިޕީންސްގެ ކަނޑު ދަތުރުފަތުރު ކުރުމުގެ ނިޒާމު ބަލިކަށިވުމުން ނުރައްކާތެރި ހާދިސާތައް ވަރަށް ގިނައިން ހިނގަ އެވެ.
