ގައުމުތަކުގެ އެންމެ ފަގީރު ރައްޔިތުންނަށް ކާބޯތަކެއްޗާއި ކަރަންޓުގެ ސަބްސިޑީ ދިނުމަށް އިންޓަނޭޝަނަލް މަނިޓަރީ ފަންޑް (އައިއެމްއެފް) އިން ސަރުކާރުތަކަށް ގޮވާލައިފި އެވެ.
އައިއެމްއެފްގެ ވެރިޔާ ކްރިސްޓަލީނާ ޖޯޖިއޭވާ ބީބީސީއަށް ދެއްވި އިންޓަވިއުއެއްގައި ވިދާޅުވީ ހުރިހާ ގައުމެއްގައި ވެސް ދިރިއުޅުމުގެ ހަރަދު މަތިވަމުން ދާތީ ގިނަ ބަޔަކަށް ގޮންޖެހުން ދިމާވާ ކަމަށެވެ.
އޭނާ ވިދާޅުވީ ސަރުކާރުތަކުން ރައްޔިތުންނަށް އެހީ ފޯރުކޮށްދޭން ވާނީ "ޓާގެޓްކޮށްގެން، ސީދާ ރައްޔިތުންގެ އަތަށް ސަބްސިޑީ ދެވޭނެ ގޮތަކަށް" ކަމަށެވެ.
ގިނަ ގައުމުތަކެއްގެ ސަރުކާރުން މިހާރު ވެސް އެކި ކަންކަމަށް ސަބްސިޑީ ފޯރުކޮށްދެ އެވެ. ނަމަވެސް އެގޮތަށް ފޯރުކޮށްދޭ އެހީއިން ނުފުދޭ ކަމަށް ބައެއް ފަރާތްތަކުން ބުނެ އެވެ.
"އިސްކަންދޭންވީ ފުރަތަމަ ކަމަކީ އެންމެ ފަގީރު މީހުން. އެއީ ކާބޯތަކެއްޗާއި ކަރަންޓުގެ އަގު އުފުލޭތީ އެންމެ ހާލުގައި އުޅެން ޖެހޭ މީހުން،" އޭނާ ވިދާޅުވި އެވެ.
ދެ ވަނަ ކަމެއްގެ ގޮތުން އިސްކަންދޭންވީ ޔޫކްރެއިންގައި ކުރާ ހަނގުރާމައިގެ ސަބަބުން އަސަރުކޮށް "އެންމެ ބޮޑަށް ގެއްލުންވެފައިވާ" ވިޔަފާރިތަކަށް އެހީވުން ކަމުގައި ވެސް އޭނާ ވިދާޅުވި އެވެ.
ބައިނަލްއަގްވާމީ އެހީދޭ އިދާރާއެއް ކަމަށްވާ އައިއެމްއެފްގެ ރޯލަކީ ސަރުކާރުތަކާ ގުޅިގެން މުޅި ދުނިޔޭގެ އިގްތިސާދު އެއް ހަމައެއްގައި ހިފަހައްޓައި ކުރިއެރުން ހޯދޭނެ ގޮތްތައް މަގުފަހި ކުރުމެވެ.
ނަމަވެސް މި އަހަރު ކާބޯތަކެތީގެ އަގު ރެކޯޑް މިންވަރަށް މަތިވެ، ތެލާއި ގޭހުގެ އަގު ވެސް ވަރަށް ބޮޑަށް އުފުލިފައި ވާތީ، އައިއެމްއެފްގެ މަސައްކަތަށް ވަނީ ބޮޑެތި ގޮންޖެހުންތަކެއް ކުރިމަތިވެފަ އެވެ.
އެގޮތަށް ދިމާވީ ކޮވިޑް ބަލިމަޑުކަމުން އަރައިނުގަނެވިގެން އުޅެނިކޮށް ޔޫކްރެއިންގައި ހަނގުރާމަ ފެށުމުންނެވެ. ރަޝިއާ އާއި ޔޫކްރެއިނަކީ ދަނޑުވެރި އުފެއްދުންތަކާއި ހަކަތަ އެންމެ ގިނައިން އެކްސްޕޯޓް ކުރާ ގައުމުތަކުގެ ތެރޭގައި ހިމެނޭ ދެ ގައުމެވެ.
