ބެއިޖިން، ޗައިނާ (މޭ 21) - ޗައިނާގެ ވެރިރަށް ބެއިޖިންގައި ކޮވިޑަށް ނެގެޓިވްވި ނަމަވެސް އެތައް ހާސް ބަޔަކު ހޮޓަލްތަކުގައި ކަރަންޓީނުކޮށްފި އެވެ.
ކޮވިޑް ބަލިމަޑުކަން ފެށުނު ފަހުން ބެއިޖިންގައި ކޭސްތައް މަތި ނުވާ ވަރަށް މިހާރު ވަނީ މަތިވެފަ އެވެ. ހަލުވިކަމާ އެކު ފެތުރޭ އޮމިކްރޯން ވޭރިއެންޓްގެ ސަބަބުން އެޕްރީލް މަހުގެ ފަހުކޮޅުން ފެށިގެން މިހާތަނަށް އެ ސިޓީން 1،300 އަށް ވުރެ ގިނަ ކޭސް ރިޕޯޓުކޮށްފައިވެ އެވެ.
އޭގެ ސަބަބުން ސިޓީގެ ރެސްޓޯރެންޓްތަކާއި، ސްކޫލްތަކާއި، ފަތުރުވެރިން ޖަމާވާ ސަރަހައްދުތައް ވަނީ ވަކި މުއްދަތެއް ނެތް ގޮތަށް ބަންދުކޮށްފަ އެވެ.
ޗައިނާއިން ގެންގުޅޭ ޒީރޯ ކޮވިޑް ސިޔާސަތުގެ ދަށުން ބޯޑަރުތައް ބަންދު ކުރުމާއި، ދިގު މުއްދަތަކަށް ކަރަންޓީނުގައި ތިބެން ޖެހުމާއި، އެއް ފަހަރާ ގިނަ ބަޔަކު ޓެސްޓު ކުރުމާއި، ވަކި ސަރަހައްދުތައް ލޮކްޑައުން ކުރުން ހިމެނެ އެވެ.
ބެއިޖިންގެ އިރުދެކުނުގައި އޮންނަ ނަންޝިންޔުއާން ރެޒިޑެންޝަލް ކޮމްޕައުންޑުން 13،000 މީހުން ހުކުރު ދުވަހުގެ ރޭ ހޮޓަލްތަކުގައި ކަރަންޓީން ކުރި އެވެ. އެއީ އެ ތަނުގެ 26 ކޭސް ފެނުމުންނެވެ.
"ތަޖުރިބާކާރުން ނިންމީ ނަންޝިންޔުއާންގެ ހުރިހާ އެންމެން މޭ 21 ވަނަ ދުވަހުން ފެށިގެން ހަތް ދުވަހަށް ކަރަންޓީނުގައި ތިބުމަށް،" ޗާއޯޔާންގް ޑިސްޓްރިކްޓުގެ އިދާރާތަކުން ބުންޏެވެ.
މިދިޔަ މަހު ޝަންހާއީގައި ވެސް ކޮވިޑަށް ނެގެޓިވް އެތައް ހާސް ބަޔަކު ކަރަންޓީނު ކުރި އެވެ. ޗައިނާގެ ސޯޝަލް މީޑިއާގައި ހިޔާލު ފާޅު ކުރާ ބައެއް މީހުން ވަނީ އެކަމާ މެދު ކަންބޮޑުވުން ފާޅުކޮށްފަ އެވެ.
