ސިލްހެތް، ބަންގްލަދޭޝް (މޭ 21) - އާދަޔާ ހިލާފަށް ބޯކޮށް ވާރޭ ވެހުމުގެ ސަބަބުން ބަންގްލަދޭޝް އާއި އިންޑިއާގެ ބައެއް ހިސާބުތަކުގައި ފެންބޮޑުވެ، އެތައް މިލިއަން ބަޔަކު ހާލުގައި ޖެހި، 57 މީހުން މަރުވެއްޖެ އެވެ.
ފާއިތުވި 20 އަހަރު ތެރޭގައި ބަންގްލަދޭޝްގެ އިރުއުތުރުގައި ދިމާވި އެންމެ ބޮޑު ފެންބޮޑުވުމާ އެކު ގާތްގަނޑަކަށް ދެ މިލިއަން މީހުންގެ ގެދޮރި ގެއްލި ހާލުގައި ޖެހިފައިވާ ކަމަށް އޮފިޝަލުން ބުނެ އެވެ.
ސިލްހެތް ސަރަހައްދުގެ ސަރުކާރުގެ ޗީފް އެޑްމިނިސްޓްރޭޓަރު މުޝައްރަފު ހުސެން ވިދާޅުވީ ބާރަކް ކޯރު ފުރިގެން ބަންޑުންވެ، ޒަކިގާންޖްގައި 100 އަށް ވުރެ ގިނަ އަވަށް އެއްކޮށް ފެންބޮޑުވެފައިވާ ކަމަށެވެ.
"ފެންބޮޑުވުމުގެ ސަބަބުން މިހާތަނަށް ގާތްގަނޑަކަށް ދެ މިލިއަން މީހުން ހާލުގައި ޖެހިފައިވޭ،" މިދިޔަ ހަފްތާގައި 10 މީހުން މަރުވިކަން ފާހަގަކުރައްވަމުން އޭނާ އޭއެފްޕީއަށް ވިދާޅުވި އެވެ.
ބަންގްލަދޭޝްގެ ބޮޑެތި ސަރަހައްދުތަކާއި އަވައްޓެރި އިންޑިއާގެ ބައެއް ހިސާބުތަކުގައި އާއްމުކޮށް ވެސް ވިއްސާރަ މޫސުމުގައި ފެންބޮޑުވެ އެވެ. ނަމަވެސް ތަޖުރިބާކާރުން ބުނާ ގޮތުގައި ފެންބޮޑުވުން އަވަސްވެ، ކުރިއަށް ވުރެ ހާލަތު ގޯސް ވާން މެދުވެރިވެފައި ވަނީ މޫސުމީ ބަދަލުގެ ސަބަބުންނެވެ.
އިންޑިއާގެ ޑިޒާޒްޓާ މެނޭޖްމަންޓް އޮތޯރިޓީތަކުން ބުނީ ފާއިތުވި ހަފްތާގައި އެ ގައުމުގައި ބޯކޮށް ވާރޭ ވެހި، ފެންބޮޑުވެ، ބިންގަނޑު ކަނޑައިގެން ގޮސް އަދި ހޮނު އެޅުން ފަދަ ހާދިސާތަކުގައި 47 މީހުން މަރުވި ކަމަށެވެ.
ބަންގްލަދޭޝްގެ ބޯޑަރާ ޖެހިގެން އޮންނަ އައްސާމް ސްޓޭޓުން އެކަނިވެސް 14 މީހުން މަރުވި އެވެ. އެ ސްޓޭޓުން ބުނީ ފެންބޮޑުވުމުގެ އަސަރު 3،200 އަވަށާއި 850،000 މީހުންނަށް ކޮށްފައިވާ ކަމަށެވެ. ގެދޮރަށް ގެއްލުން ލިބުމުގެ ސަބަބުން 90،000 އެއްހާ މީހުން ތިބީ ވަގުތީ ހިޔާތަކުގަ އެވެ.
އައްސާމްގެ ހުޅަނގުން އޮންނަ ބިހާރް ސްޓޭޓުގައި 33 މީހުން މަރުވެ، 40 މީހުންނަށް އަނިޔާވި އެވެ. ފާއިތުވި ހަފްތާގެ ކުރީކޮޅު ބިހާރް ސްޓޭޓަށް އާދަޔާ ހިލާފަށް ހޫނު ގަދަވެ، ހޫނުމިން 40 ޑިގްރީ ސެލްސިއަސްއަށް އެރި އެވެ.
