އެމެރިކާ އަދި އިނގިރޭސި ވިލާތް ގުޅިގެން އަސްކަރީ މަރުކަޒެއް ހިންގަމުން އަންނަ ޑިއޭގޯ ގާސިއާގައި ހިފަހައްޓާފައި ތިބި ސްރީ ލަންކާގެ ތަމަޅައިންގެ ބަޔަކު ސިޔާސީ ހިމާޔަތް ދިނުމަށް ގޮވާލައި ބަނޑުހައި ހޫނުކަމުގެ ހަޅުތާލެއް ފަށައިފި އެވެ.
ރާއްޖޭގެ ދެކުނުން އޮންނަ ޑިއޭގޯ ގާސިއާގައި 89 ތަމަޅައިން ހިފަހައްޓާފައި އެބަ ތިއްބެވެ. އެމީހުން ހިފެހެއްޓީ ކެނެޑާ އިން ސިޔާސީ ހިމާޔަތް ހޯދުމުގެ އުންމީދުގައި ބޯޓެއްގައި ފުރައިގެން ދަނިކޮށް އިންޑިއާ ކަނޑުންނެވެ. އެ ބޯޓަށް މައްސަލަތަކެއް ދިމާވި ފަހުން ކަނޑުމަތިން އިނގިރޭސި ސިފައިން އެ މީހުން ހުއްޓުވުމަށް ފަހު ގެންދިޔައީ ޑިއޭގޯ ގާސިއާށެވެ.
މިދިޔަ އަހަރުގެ އޮކްޓޯބަރު 3، އިން ފެށިގެން އެ މީހުން ތިބީ އެ މަރުކަޒުގައި ހިފަހައްޓާފަ އެވެ. އެހެން ގައުމަކަށް ދެވޭނެ ދުވަހެއް އަދި އެތަނުގައި އެމީހުން ބައިތިއްބާނެ ދުވަހެއް އަންގާފައެއް ނުވެ އެވެ. އޭގެ ތެރޭގައި 20 ކުޑަކުދިން ވެސް ހިމެނޭއިރު ބައެއް މީހުން ވަނީ ބަނޑުހައި ހޫނުކަމުގެ ހަޅުތާލެއް ފަށާފަ އެވެ.
ހަތް މީހަކު އެ ހަޅުތާލުގައި ބައިވެރިވެފައިވާއިރު އެމީހުން ޑިމާންޑު ކުރަމުން ދަނީ އަލުން އަނބުރާ އެ މީހުން ލަންކާއަށް ނުވަތަ އިންޑިއާއަށް ފޮނުވާ ނުލުމަށެވެ. އަދި، އިނގިރޭސިވިލާތް ނޫން އެހެން ގައުމަކުން ސިޔާސީ ހިމާޔަތް ދިނުމަށެވެ.
ޑިއޭގޯ ގާސިއާގައި ވެސް އެ މީހުން ހިފަހައްޓާފައި ތިބީ އެއްވެސް ވަރަކަށް މިނިވަންކަމެއް ނުލިބޭ ގޮތަށް ކަމަށް ބުނެ އޭގެ ތެރެއިން ބައެއް މީހުންގެ އާއިލާތަކުން ވަނީ ކަންބޮޑުވުން ފާޅުކޮށްފަ އެވެ.
ހިމާޔަތް ހޯދުމަށް މަސައްކަތްކުރަމުންދާ 89 މީހުންގެ ތެރެއިން 81 މީހަކު ތަމްސީލުކުރާ އިނގިރޭސި ލޯ ފާމުން ވަނީ ރެފީއުޖީންނާ ގުޅޭ ބައިނަލްއަގްވާމީ މުއާހަދާގެ ދަށުން އެމީހުންނަށް ހިމާޔަތް ދިނުމަށް އިނގިރޭސި ސަރުކާރުން ކުރަމުންދާ މަސައްކަތްތައް ހާމަކުރުމަށް ގޮވާލާފަ އެވެ.
ހަމައެހެންމެ، ބައެއް މީހުންނަށް ދިމާވެފައިވާ ސިއްހީ މައްސަލަތަކަށް ފަރުވާ ކުރެވޭނެ ގޮތެއް ވެސް ޑިއޭގޯ ގާސިއާގައި ނެތުމަކީ ވެސް އެ މީހުންގެ ކަންބޮޑުވުމެކެވެ. އޭގެ ތެރެއިން ބައެއް މީހުންނަށް ބަހްރައިންގައި ފަރުވާ ދިނުމަށް ފަހު އަލުން އަނބުރާ ގެންދިޔައީ ހަމަ ޑިއޭގޯ ގާސިއާއަށެވެ.
އިނގިރޭސި ސަރުކާރުން "އަލްޖަޒީރާ" އަށް ބުނެފައިވާ ގޮތުގައި އެ އެންމަނަށް ވެސް އެއްވެސް ހުރަހެއް ނެތި އާއިލާއަށް ގުޅުމަށް ފުރުސަތު ވަނީ ފަހިކޮށްދީފަ އެވެ.
ބައިނަލްއަގްވާމީ މުއާހަދާތަކާއި ގާނޫނުތަކާއި އެއްގޮތަށް އެ މީހުންނާ މެދު އަމަލުކުރުމަށް އދ. ގެ ރެފިއުޖީންގެ އޮފީހުން ވަނީ އިނގިރޭސި ސަރުކާރަށް ގޮވާލާފަ އެވެ.
