އައްމާން، އުރުދުން (މޭ 19) - މިދިޔަ އަހަރު ބަގާވާތެއް ހިންގަން ރޭވުމުގައި ބައިވެރިވި ކަމަށް ތުހުމަތު ކުރެވޭ އުރުދުންގެ އަމީރު ހަމްޒާ ހުންނެވީ "ހަގީގަތް އޮޅިފައިވާ" ހާލަތެއްގައި ކަމަށާއި އެމަނިކުފާނު ދެމިހުންނަވާނީ ގޭބަންދުގައި ކަމަށް ރަސްގެފާނު އަބްދުﷲ ދެ ވަނަ ވިދާޅުވެއްޖެ އެވެ.
އުރުދުންގައި ހަމަނުޖެހުން އުފައްދައި ބަގާވާތެއް ހިންގައި އުޅެނިކޮށް، އެކަން ހުއްޓުވާފައިވާ ކަމަށް އިއުލާނު ކުރީ މިދިޔަ އަހަރުގެ އެޕްރީލް މަހު އެވެ. އަމީރު ހަމްޒާއަކީ ރަސްގެފާނު އަބްދުﷲ އާ އެއް ބަފާ ކޮއްކޮ އެވެ. ހަމްޒާ އޭރު ހާމަކުރި ވީޑިއޯއެއްގައި ވަނީ ގައުމުގެ ވެރިންނަށް ކޮރަޕްޝަނުގެ ތުހުމަތު ކުރައްވާފަ އެވެ.
ޝާހީ ގަނޑުވަރުގެ ކުރީގެ ވެރިޔާ ބައްސާމް އަވާދުﷲ އާއި ސައުދީ އަރަބިއްޔާގެ ކުރީގެ މަންދޫބު ޝާރިފް ހަސަން ބިން ޒައިދަށް ބަގާވާތުގެ މައްސަލައިގައި 15 އަހަރުގެ ޖަލު ހުކުމެއް އިއްވީ މިދިޔަ ޖުލައި މަހު އެވެ. ހަމްޒާއާ ދެކޮޅަށް ދައުވާ އުފުލާފައެއް ނުވެ އެވެ. ނަމަވެސް ހުންނަވަނީ ގޭބަންދުގަ އެވެ.
ރަސްގެފާނު ނެރުއްވި ބަޔާނެއްގައި ވިދާޅުވީ ހަމްޒާ ދެމިހުންނަވާނީ ގޭބަންދުގައި ކަމަށާއި ހަމްޒާއާ ދެކޮޅަށް އިތުރު ފިޔަވަޅުތައް އަޅާނެ ކަމަށެވެ.
ބަގާވާތް ހިންގަން އުޅުނު މައްސަލައިގައި ހަމްޒާ މައާފަށް އެދިވަޑައިގެންނެވި ކަމަށް ޝާހީ ގަނޑުވަރުން އިއުލާނު ކުރިތާ މަހެއް ފަހުން، މިދިޔަ އެޕްރީލް މަހު އެމަނިކުފާނު ޓްވިޓާގައި އާއްމު ކުރި ބަޔާނެއްގައި ވިދާޅުވީ "އަމީރުކަމުގެ ލަގަބު ދޫކޮށްލަން" ނިންމާފައިވާ ކަމަށެވެ.
ނަމަވެސް ރަސްގެފާން އަބްދުﷲ ބުރާސްފަތި ދުވަހު ވިދާޅުވީ "ރަނގަޅު މަގަށް އެނބުރި އަންނަން ލިބުނު ފުރުސަތު ބޭކާރުކޮށްފައިވާ" ކަމަށާއި ހަމްޒާ ދިރިއުޅުއްވާ "ހަގީގަތެއް ނެތް ހިޔާލީ ދުނިޔެއަކީ" މިހާރު އާ ކަމެއް ނޫން ކަމަށެވެ.
"ކުރީގެ ގޮތް ދޫކޮށްލައި، އިސްލާހް ވާން ވައުދުވެވަޑައިގެންނެވިތާ މާ ގިނަ ދުވަސްތަކެއް ނުވެ، ވައުދާ ހިލާފުވެ، އަހަރުތަކެއް ކުރިން އިހްތިޔާރު ކުރި މަގަށް އެނބުރި ދަތުރުކޮށް، ގައުމުގެ މަސްލަހަތަށް ވުރެ އަމިއްލަ މަސްލަހަތު އިސްކުރަމުން ދޭ."
އުރުދުންގެ ވަލީ އަހުދު ކަމަށް ހަމްޒާ އައްޔަނު ކުރެއްވީ 1999 ވަނަ އަހަރު ރަސްގެފާނު އަބްދުﷲ ދެ ވަނަ އެވެ. އެގޮތަށް ނިންމެވީ ދެ ބޭފުޅުންގެ ބައްޕާފުޅު އަދި ކުރީގެ ރަސްގެފާނު ހުސެންގެ އެދިވަޑައިގެންނެވުމަކަށެވެ.
ނަމަވެސް އޭގެ ފަހުން 2004 ވަނަ އަހަރު ހަމްޒާ ވަލީ އަހުދުކަމުން ވަކި ކުރައްވައި، އެ މަގާމަށް އައްޔަން ކުރެއްވީ ރަސްގެފާނު އަބްދުﷲ ގެ ފިރިހެން ދަރިކަލުން، އަމީރު ހުސެން އެވެ.
