ހުޅުމާލެ ފޭސް 2 ހިޔާ ފްލެޓު ސަރަހައްދުގައި ލަކުޑި އާއި ޕެލެޓާއި އުކާލާ ސާމާނު ބޭނުންކޮށްގެން ހަދާފައި ހުރި ވަގުތީ ކެފޭތަކާއި ސްޓޯލްތައް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ން ނަގަން ފަށައިފި އެވެ.
ފްލެޓުތަކުގެ ތަޅުދަނޑިތައް މީހުންނާ ހަވާލުކުރި ދުވަހުން ފެށިގެން ހިޔާ ސަރަހައްދުން ފެންނަން ފެށި މި ކެފޭތައް ނަގަން އެޗްޑީސީން މަސައްކަތްކުރާތާ ދުވަސްތަކެއް ވެއްޖެ އެވެ. އެންމެ ފުރަތަމަ މިގޮތަށް ތަންތަން ހަދައިގެން ހިދުމަތް ދޭން ފެށުމުން ވެސް އެޗްޑީސީން އެކަމާ ދެކޮޅު ހެދި އެވެ.
އެކަމަކު ހިޔާ ސަރަހައްދުގައި އޭރު އެއްވެސް ފިހާރައެއް ނެތުމުން އެތަންތަން ނުނަގާ، ޒާތެއްގެ ވަގުތީ ހުއްދައެއްގެ ދަށުން ބެހެއްޓީ އެވެ.
އެ ނިންމުން ބަދަލުކޮށް މިތަންތަން ނަގާ، ތަން ހުސްކުރަން އެޗްޑީސީން ހަފުތާއެއްގެ މުހުލަތު ދިނެވެ. އެއީ ހުސްވި އޭޕްރީލް މަހުގެ ފުރަތަމަ ހަފުތާގެ ތެރޭގަ އެވެ. އެކަމަކު މިއަދާ ހަމައަށް ވެސް އެއިން އެއްވެސް ތަނެއްގެ "ވެރިފަރާތުން" އެތަންތަނެއް ނުނަގަ އެވެ.
މިކަމާ ރައްޔިތުންގެ ހިތްހަމަނުޖެހިގެން ކަންބޮޑުވުން ފާޅުކުރަން ފެށުމުން އޭރު އެޗްޑީސީން ބުނީ ވަރަށް އަވަހަށް ނަގާނެ ކަމަށެވެ. މައުލޫމާތު ލިބޭ ގޮތުގައި އެތަންތަން ނަގާ ހިސާބަށް ކަންކަން ދިޔައީ އަމިއްލައަށް އެތަންތަން ނަގަން ދިން ފުރުސަތުތަކަށް ތަކުރާރުކޮށް ގޮންޖަހާ، ނުނަގަން ތިބީމާ އިތުރު ގޮތެއް ނެތިގެންނެވެ.
އެޗްޑީސީގެ މީޑިއާ އޮފިޝަލް އަލީ މަޝާރު "އަދަދު" އަށް މިރޭ ވިދާޅުވީ އެތަންތަން ނަގަން ކުރިން ވެސް އަންގާފައިވާނެ ކަމަށާއި ނެގުމުގެ މަސައްކަތް ވެސް ކުރިއްސުރެ އައީ ކުރަމުން ކަމަށެވެ. އެ މަސައްކަތް ރޯދަމަހަށް މެދުކަނޑައިލުމަށް ފަހު އަލުން ފެށީ މިއަދު ކަމަށް ވެސް އޭނާ ވިދާޅުވި އެވެ.
"އެތަނަށް ދާއިމީ ހައްލެއް ހޯދާނެ ގޮތެއް އިއުލާނުކުރެވިގެންދާނެ،" އޭނާ ވިދާޅުވި އެވެ.
އެނގިފައިވާ ގޮތުގައި ދާއިމީ ހައްލެއްގެ ގޮތުން ކުރާނެ ކަމަކީ ކިއޯސްކްތަކެއް ބެހެއްޓުމެވެ.
ސޯޝަލް މީޑިއާގައި ދައުރުވަމުންދާ ވީޑިއޯއަކުން ފެންނަ ގޮތުގައި އެޗްޑީސީން ދަނީ އެކްސްކެވޭޓަރު ބޭނުންކޮށްގެން މިތަންތަން ބިމާ ހަމަކުރަމުންނެވެ.
ކުރިން އަންގާފައި އޮތް އެންގުންތަކާ ހިލާފުވުމާ ގުޅިގެން އިތުރު ފުރުސަތެއް ނުދީ ތަން ތަޅާލި ނަމަވެސް، އެންމެ ފަހު ވަގުތާ ޖެހެންދެން ވެސް ތަން ހުސްކުރާށާއި ތަނުގައި ހުރި އެއްޗެއް ވެއްޖިއްޔާ ގެންދަން އެޗްޑީސީން ފުރުސަތު ދިން ކަމަށް ވެ އެވެ.
އެޗްޑީސީގެ މީޑިއާ އޮފިޝަލް ޖަވާބު ނުދޭތީ މިކަމާ ގުޅިގެން އެ ކޯޕަރޭޝަނުގެ ބަހެއް ހޯދަން ކުރި މަސައްކަތް ވަނީ ނާކާމިޔާބުވެފަ އެވެ.
