ގުވަހަޓީ، އިންޑިއާ (މޭ 19) - އިންޑިއާގެ ދެކުނުގެ ބައެއް ހިސާބުތަކަށް އާދަޔާ ހިލާފަށް ބޯކޮށް ވާރޭ ވެހުމުގެ ސަބަބުން ހިނގި ފެންބޮޑުވުމާއި ބިންގަނޑު ކަނޑައިގެން ދިޔުމުގެ ހާދިސާތަކުގައި 10 މީހުން މަރުވެއްޖެ އެވެ.
މަރުވި މީހުންގެ ތެރޭގައި ހަތަރު އަހަރު ކުއްޖަކު ވެސް ހިމެނެ އެވެ. ބުދަ ދުވަހު މޫސުމާ ބެހޭ އިދާރާއިން ބުނީ ދެކުނުގެ ސަރަހައްދުތަކަށް އަދިވެސް ބޯކޮށް ވާރޭ ވެހޭނެ ކަމަށް ލަފާ ކުރެވޭ އިރު، ފެންބޮޑުވުމާއި ބިންގަނޑު ކަނޑައިގެން ދިޔުމުގެ ހާދިސާތައް ކުރިމަތިވެދާނެ ކަމަށެވެ.
ތަޖުރިބާކާރުން ބުނާ ގޮތުގައި ދުނިޔޭގެ އެކި ހިސާބުތަކުގައި ވާރޭ ވެހުމާއި ހޫނު ގަދަވުން ފަދަ ކަންކަން އާދަޔާ ހިލާފަށް ބާރުގަދަވަމުން ދަނީ ދުނިޔެ ހޫނުވުމުން ކުރިމަތިވެފައިވާ މޫސުމީ ބަދަލާ ހެދި އެވެ. ދެކުނު އޭޝިއާގައި އެކަން އިތުރަށް ގޯސް ވަނީ ބޮޑެތި މަޝްރޫއުތައް ހިންގަން ޖަންގަލިތަކުން ގަސް ކަނޑައި، ކޯރުތަކުން ފެން ދަރުވުން ހުއްޓުވާތީ އެވެ.
އިންޑިއާގެ މީޓިއޮރޮލޮޖިކަލް ޑިޕާޓްމަންޓުން ދިން އިންޒާރުގައި ބުނީ މޫސުމީ އަސަރުތައް އާދަޔާ ހިލާފަށް ބޮޑަށް ކުރާނެ ކަމަށެވެ. އެގޮތުން ދެކުނަށް އާދަޔާ ހިލާފަށް ބޯކޮށް ވާރޭ ވެހޭ އިރު، އުތުރުގެ ހިސާބުތަކަށް އާދަޔާ ހިލާފަށް ހޫނު ގަދަ އެވެ.
ނިއު ދިއްލީ އާއި އުތުރުގެ އެހެން ހިސާބުތަކަށް "ހީޓްވޭވް" ކުރިމަތިވެފައިވާ އިރު، އޭގެ ސަބަބުން ފެނުގެ ދަތިކަމާއި ކަރަންޓު ކެނޑުން ފަދަ މައްސަލަތައް ކުރިމަތިވެ އެވެ. ރިޕޯޓުތައް ބުނާ ގޮތުން ނިއު ދިއްލީގެ ފިނިހޫނުމިން ވަނީ 39 ޑިގްރީ ސެލްސިއަސްއަށް މައްޗަށް ގޮސްފަ އެވެ.
ދެކުނާއި އިރުއުތުރުގެ ބައެއް ހިސާބުތަކަށް ބޯކޮށް ވާރޭ ވެހޭނެ ކަމަށް ލަފާކޮށްފައިވާ އިރު، އައްސާމް، ޓެމިލް ނާޑޫ، ކަރްނާޓަކާ އަދި ކެރަލާއިން ސަމާލުވުމަށް އަންގާފައިވެ އެވެ.
ރިޕޯޓުތައް ބުނާ ގޮތުން ބުދަ ދުވަހު ފެންބޮޑުވުމުގެ ސަބަބުން އައްސާމް ސްޓޭޓުން އަށް މީހުން މަރުވެ، 400،000 އަށް ވުރެ ގިނަ މީހުން ހާލުގައި ޖެހުނެވެ. އޭގެ އިތުރުން ކަރްނާޓަކާ ސްޓޭޓުން ވެސް ދެ މީހުން މަރުވެފައިވެ އެވެ.
