ނިއު ދިއްލީ، އިންޑިއާ (މޭ 18) - އިންޑިއާގެ ކުރީގެ ބޮޑު ވަޒީރު ރަޖީވް ގާންދީ އަވަހާރަކޮށްލުމުގައި ބައިވެރިވި މީހަކު ޖަލުން މިނިވަން ކުރަން ސުޕްރީމް ކޯޓުން އަންގައިފި އެވެ.
އުމުރުން 50 އަހަރުގެ އޭޖީ ޕެރަރިވަލަން ހައްޔަރު ކުރީ މީގެ 30 އަހަރު ކުރިންނެވެ. އޭނާއަށް ޕެރޯލް ލިބުނީ މިދިޔަ މާޗް މަހު އެވެ. ފަނޑިޔާރު އެލް ނާގޭސްވަރަ ރިޔާސަތު ބެލެހެއްޓެވި ބެންޗުން އަމުރު ކުރީ އޭނާ މިނިވަން ކުރުމަށެވެ.
ރަޖީވް ގާންދީ އަވަހާރަވީ މޭ 21، 1991 ވަނަ އަހަރު އިންޑިއާގެ ދެކުނުގައި އޮންނަ ޓަމިލް ނާޑޫ ސްޓޭޓުގައި ދިން ބޮމުގެ ހަމަލާއެއްގަ އެވެ. ޕެރަރިވަލަންގެ މައްޗަށް ސާބިތުވީ ބޮމުގައި ބޭނުން ކުރި ބެޓެރި ފޯރުކޮށްދިން ކަމަށެވެ.
އެ ހަމަލާ ދިނީ ސްރީލަންކާގެ ހަނގުރާމަވެރި ގްރޫޕް ލިބެރޭޝަން ޓައިގާޒް އޮފް ޓެމިލް އީލާމް (އެލްޓީޓީއީ) ނުވަތަ ތަމަޅަ ޓައިގަރުންނެވެ.
އަމިއްލައަށް މަރުވެގެން ދިން އެ ހަމަލާއަކީ 1987 ވަނަ އަހަރު އިންޑިއާއިން ތަމަޅަ ޓައިގަރުންނާ ދެކޮޅަށް މަސައްކަތް ކުރުމަށް ސްރީލަންކާ ސަރުކާރާ އެކު އެއްބަސްވުމަކަށް އައުމުން ދިން ހަމަލާއެކެވެ.
އިންޑިއާގެ ގިނަ އަދަދެއްގެ ސިފައިން ތަމަޅަ ޓައިގަރުންނާ ދެކޮޅަށް ހަނގުރާމަ ކުރަން ސްރީލަންކާއަށް ފޮނުވި އެވެ. ނަމަވެސް 1،200 އަށް ވުރެ ގިނަ އިންޑިއާ ސިފައިން މަރުވުމުން، ސިފައިން އަނބުރާ ގައުމަށް ގެންދިޔަ އެވެ.
ނަވާރަ ސަތޭކަ ނުވަދިހަ އެއް ވަނަ އަހަރު ޕެރަރިވަލަން ހައްޔަރު ކުރި އިރު އޭނާގެ އުމުރުން 19 އަހަރެވެ. އެންމެ ފުރަތަމަ މަރަން ހުކުމް ކުރި ނަމަވެސް، ފަހުން ނިންމީ އުމުރަށް ޖަލަށް ލުމަށެވެ.
ޕެރަރިވަލަން މިނިވަން ކުރި އިރު، މައްސަލައިގައި ކުށް ސާބިތުވި އިތުރު ހަ މީހުން އަދިވެސް ތިބީ ޖަލުގަ އެވެ.
އިންޑިއާގެ އެންމެ ޒުވާން ބޮޑު ވަޒީރުގެ ގޮތުގައި ރަޖީވް ގާންދީ އިންތިހާބުވެވަޑައިގެންނެވީ، އެމަނިކުފާނުގެ މަންމާފުޅު ކުރީގެ ބޮޑު ވަޒީރު އިންދިރާ ގާންދީ އޮކްޓޯބަރު 1984 ގައި އަވަހާރަކޮށްލުމުންނެވެ.
