މަގުކޮނުމުގެ މަޝްރޫއުތަކުގެ ސަބަބުން ވަޅުލެވިފައި ހުންނަ އާސާރީ ބިނާތަަކަށް ގެއްލުން ވަމުންދާ ކަމަށް އެންވާރްމެންޓް ފްރޮޓެކްޝަން އެޖެންސީ (އީޕީއޭ) އިން ބުނެފި އެވެ.
އީޕީއޭން ބުނީ ރާއްޖޭގެ އެކި ކަންކޮޅުތަކުގައި ކުރިއަށް ގެންދާ ތަރައްގީގެ ގިނަ މަޝްރޫއުތަކުގެ ތެރެއިން، މަގުކޮނުން ހިމެނޭ މަޝްރޫއުތަކުގެ މަސައްކަތް ކުރިއަށް ގެންދާއިރު ވަޅުލެވިފައިވާ ސާރީ ބިނާތަކަށާއި ތަކެއްޗަށް ގެއްލުން ލިބެމުންދާކަމުގެ ޝަކުވާ ލިބެމުން އަންނަ ކަމަށެވެ.
އެފަދަ މަޝްރޫއުތަކުގެ މަސައްކަތް ކުރުމަށް ބިން ކޮންނަމުންދާއިރު ފެންނަ ވަޅުލެވިފައި ހުންނަ އާސާރީ ބިނާތަކަށް ރައްކާތެރިވުމަށާއި އެފަދަ ތަކެތި ފެނިންޖެނަމަ، ވަގުތުން އެކަން ސަގާފީ ތަރިކަ ރައްކާތެރިކުރާ ގައުމީ މަރުކަޒަށް އެންގުމަށްވެސް އީޕީއޭން ވަނީ އެދިފަ އެވެ.
"ހެރިޓޭޖް މިނިސްޓްރީން ލަފާދޭ ގޮތަށް އެތަކެއްޗާއިމެދު އަމަލު ކުރެއްވުމަށް ދަންނަވަން.،" އީޕީއޭން ބުންޏެވެ.
ތިމާވެށްޓަށް އަސަރު ފޯރާނެ މިންވަރު ބަޔާންކުރާ ރިޕޯޓު ހަދައި އީޕީއޭން ތިމާވެށީގެ ކްލިއަރެންސް ލިބިގެން ކުރިއަށްގެންދާ މަޝްރޫއުތަކުގެ މަސައްކަތް ކުރުމުގައި ރާއްޖޭގެ ސަގާފީ ތަރިކައިގެ ގާނޫނާއި އަދި އެހެނިހެން ގާނޫނާއި ގަވައިދުތަކާއި ހިލާފު ނުވާނެހެން މަސައްކަތްތައް ކުރުމަށްވެސް އީޕީއޭން ވަނީ އިލްތިމާސް ކޮށްފަ އެވެ.
އާސާރުތަކަށް ގެއްލުންވާ ގޮތަށް މަސައްކަތްކުރާ ކަމަށް ބުނެ ސަގާފީ ތަރިކަ ރައްކާތެރިކުރާ ގައުމީ މަރުކަޒުން ވެސް ދާދި ފަހުން ބަޔާނެއް ނެރުނެވެ. މިދިޔަ އޭޕްރިލްމަހު އެ މަރުކަޒުން ނެރުނު ބަޔާނުގައި ބުނީ ބައެއް ކައުންސިލްތަކުން ތަރައްގީގެ މަޝްރޫއުތައް ކުރިއަށް ގެންދާ އިރު ތަރިކަތަކަށް ކޮށްފާނެ އަސަރު ނުބަލާ ކަން ފާހަގަކުރެވިފައިވާ ކަމަށެވެ. އެފަދަ ތަންތަނާ ގުޅޭ މަސައްކަތްތައް ކުރުމުގައި އެ މަރުކަޒުން ހޯދަން ޖެހޭ ހުއްދަ ނުހޯދާ ކަން ފާހަގަކުރެވިފައިވާ ކަމަށާއި އެގޮތަށް ކަންތައް ކުރާ ފަރާތްތަކާ ދެކޮޅަށް ގާނޫނީ ފިޔަވަޅު އަޅާނެ ކަމަށް ވެސް އޭރު ބުންޏެވެ.
