ޓޯކިއޯ (18 މެއި) - ކޮވިޑް-19އާ ގުޅިގެން އޭޝިއަން ކަޕް ހޯސްޓް ނުކުރަން ޗައިނާ އިން ނިންމުމާ ގުޅިގެން، އެ މުބާރާތް ހޯސްޓްކުރުމުގެ ފުރުސަތު ޖަޕާނަށް ދިނުމަށް އޭޝިއަން ފުޓްބޯލް ކޮންފެޑަރޭޝަން (އޭއެފްސީ) އިން ވިސްނަމުންދާ ކަމަށް މީޑިއާ ރިޕޯޓްތަކުން ބުނެފި އެވެ.
އަންނަ އަހަރުގެ ޖޫން/ޖުލައި ގައި ޗައިނާގެ 10 ސިޓީއެއްގައި އޭޝިއަން ކަޕް ބޭއްވުމަށް ހަމަޖެހިފައި އޮތް ނަމަވެސް، އެ މުބާރާތް ނުބޭއްވޭނެކަން އެ ގައުމުން އިއުލާންކުރީ މިދިޔަ ހަފުތާގަ އެވެ. ޗައިނާ އިން މުބާރާތް ހޯސްޓް ނުކުރުމަށް ނިންމީ ކޮވިޑް-19އާ ގުޅިގެން އަޅާފައިވާ ރައްކާތެރިކަމުގެ ފިޔަވަޅުތަކާ ގުޅިގެންނެވެ.
މި އަހަރުގެ ސެޕްޓެމްބަރު މަހު ޗައިނާގައި ބޭއްވުމަށް ހަމަޖެހިފައި އޮތް އޭޝިއަން ގޭމްސް ވެސް ވަނީ ފަސްކޮށްފަ އެވެ.
ޗައިނާގެ ނިންމުމާ ގުޅިގެން، 2023 ވަނަ އަހަރުގެ އޭޝިއަން ކަޕް ބާއްވާނެ ގައުމެއް ކަނޑައެޅުމަށް އޭއެފްސީން މަސައްކަތް ކުރަމުންދާއިރު، ޖަޕާނާށް އެ ފުރުސަތު ދިނުމަށް އޭއެފްސީން ޝައުގުވެރިވާ ކަމަށް މީޑިއާ ރިޕޯޓްތަކުން ބުނެ އެވެ.
ޖަޕާން ފުޓްބޯލް އެސޯސިއޭޝަންގެ ޗެއާމަން ކޯޒޯ ޓަޝީމާ ވިދާޅުވީ އޭޝިއަން ކަޕް ހޯސްޓްކުރުމުގެ ފުރުސަތު ޖަޕާނަށް ދިނުމަށް ޝައުގުވެރިވާ ކަމަށް އޭއެފްސީން ބުނެފައިވާ ކަމަށެވެ. އިތުރު ތަފްސީލެއް ނުދެއްވަ އެވެ.
"ހަމަ ޔަގީނުން ވެސް، ވަރަށް ވެސް އުފާވެރިކަމަކަށް ވާނެ އޭޝިއަން ކަޕް ހޯސްޓްކުރުމުގެ ފުރުސަތު ލިބިއްޖެއްޔާ،" ޓަޝީމާ ވިދާޅުވި އެވެ.
ޖަޕާނުގައި އެންމެ ފަހުން އޭޝިއަން ކަޕް ބޭއްވީ 1992 ވަނަ އަހަރެވެ. އޭގެ ފަހުން، 2002 ވަނަ އަހަރު ދެކުނު ކޮރެއާއާ ގުޅިގެން ފީފާ ވޯލްޑް ކަޕް ވަނީ އެ ގައުމުގައި ބާއްވައިފަ އެވެ.
ކޮވިޑް-19ގެ އުނދަގޫ ހާލަތުގެ ތެރޭގައި މިދިޔަ އަހަރު ޖަޕާނުން ވަނީ ދުނިޔޭގެ އެންމެ ބޮޑު ކުޅިވަރު ހަރަކާތް، އޮލިމްޕިކްސް ވެސް ކުރިއަށް ގެންގޮސްފަ އެވެ. އޮލިމްޕިކްސް އެންމެ ފުރަތަމަ ބާއްވަން ނިންމާފައި އޮތީ 2020 ވަނަ އަހަރު ކަމުގައި ވިޔަސް، އޭގެ އެއް އަހަރު ފަހަތަށް ފަސްކުރަން ޖެހުނީ ކޮވިޑާ ހެދި އޭރު މުޅި ދުނިޔޭގެ އެކި ހަރަކާތްތައް ހުއްޓިފައި އޮތުމާއި ދަތުރުފަތުރުކުރުމުގެ ކަންކަން އެންމެ ރައްކާތެރިކަމާ އެކު ކަށަވަރުވެފައި ނެތުމުންނެވެ.
