ހެލްސިންކީ، ފިންލޭންޑް (މޭ 15) - ރަޝިއާގެ ސިފައިން ޔޫކްރެއިނަށް އަރައި ހަނގުރާމަ ފެށުމުގެ ނަތީޖާއެއްގެ ގޮތުން، ފިންލޭންޑުން ނޭޓޯގެ މެމްބަރު ކަމަށް އެދި ހުށަހަޅަން ނިންމައިފި އެވެ.
"މިއަދު، ޖުމްހޫރިއްޔާގެ ރައީސާއި ސަރުކާރުގެ ހާރިޖީ ސިޔާސަތާ ގުޅޭ ކޮމިޓީއިން ނިންމީ ޕާލިމެންޓުގެ ލަފާގެ މަތިން ފިންލޭންޑުން ނޭޓޯގެ މެމްބަރު ކަމަށް އެދި ހުށަހަޅަން. މިއީ ތާރީހީ ދުވަހެއް. މި ހުޅުވިގެން ދަނީ އާ ޒަމާނެއް،" ރައީސް ސައުލީ ނީނިސްޓޯ ވިދާޅުވި އެވެ.
އެ ނިންމުމާ އެކު ފިންލޭންޑުގެ ޕާލިމެންޓުން ހޯމަ ދުވަހު ޖަލްސާއެއް ބާއްވައި، ނޭޓޯގެ މެމްބަރު ކަމަށް އެދި ހުށަހެޅުމާ މެދު ދެކޭ ގޮތް ސާފު ކުރަން ބަހުސް ބާއްވާނެ އެވެ. ލަފާ ކުރެވޭ ގޮތުގައި ޕާލިމެންޓުގެ 200 މެމްބަރުންގެ ތެރެއިން ބޮޑު މެޖޯރިޓީއެއް އެކަމަށް ތާއީދު ކުރެ އެވެ.
"ޖުމްހޫރިއްޔާގެ ރައީސާއި ސަރުކާރު ގުޅިގެން ކުރި މަޝްވަރާއަށް ފަހު މިއަދު މި އާދެވުނީ މުހިއްމު ނިންމުމަކާ ހަމައަށް."
"އަޅުގަނޑުމެންގެ އުއްމީދަކީ ކުރިއަށް އޮތް ދުވަސްތަކުގައި ޕާލިމެންޓުން އެ ނިންމުން ކަށަވަރުކޮށްދިނުން. އެ ނިންމުން ބިނާ ވަނީ ވަރުގަދަ ވިސްނުންތަކެއްގެ މައްޗަށް،" ބޮޑު ވަޒީރު ސަންނާ މަރިން ވިދާޅުވި އެވެ.
ރަޝިއާއާ އެކު 1،300 ކިލޯމީޓަރުގެ ބޯޑަރެއް ހިއްސާ ކުރާ ފިންލޭންޑް ފާއިތުވި 75 އަހަރު އަސްކަރީ ގޮތުން ވަކި އަތަކަށް ޖެހިފައެއް ނުވެ އެވެ.
ފެބްރުއަރީ 24 ވަނަ ދުވަހު ރަޝިއާގެ ސިފައިން ޔޫކްރެއިނަށް އެރުމުން، ނޭޓޯއާ ގުޅުމާ މެދު ފިންލޭންޑް ރައްޔިތުން ދެކޭ ގޮތް ބަދަލުވި އެވެ. އޭގެ ކުރިން އެ ހިޔާލާ ދެކޮޅުވި ނަމަވެސް، މިހާރު ގިނަ ބަޔަކު އެކަމަށް ތާއީދު ކުރެ އެވެ.
މިދިޔަ ބުރާސްފަތި ދުވަހު ރައީސް އާއި ބޮޑު ވަޒީރު ވެސް ވިދާޅުވީ "ލަސް ކުރުމެއް ނެތި" ނޭޓޯއާ ގުޅެން ޖެހޭ ކަމަށެވެ. ފިންލޭންޑުން ނޭޓޯއާ ގުޅިއްޖެ ނަމަ ނަތީޖާ ހިތިވާނެ ކަމުގެ އިންޒާރު ރަޝިއާއިން ތަކުރާރުކޮށް ދީފައިވެ އެވެ.
