އެމްޑީޕީގެ ޗެއާޕާސަން ހޮވަން އިއްޔެ ބޭއްވި އިންތިހާބަށް ކުރި ކެމްޕޭނުގެ މާ ކުރިން ވެސް އެ ޕާޓީގެ އެންމެ އިސް ދެ ލީޑަރުންގެ މެދުގައި އޮތީ ނުތަނަވަސްކަމެއް އުފެދިފަ އެވެ. އެ ނުތަނަވަސްކަމުގެ ބޮޑު ސަބަބަކީ އަންނަ އަހަރު ބާއްވާ ރިޔާސީ އިންތިހާބުގެ ޓިކެޓް، ރައީސް އިބްރާހީމް މުހައްމަދު ސޯލިހަށް ދޫކޮށްލެއްވުމުގެ ބަދަލުގައި ރައްޔިތުންގެ މަޖިލީހު ރައީސް އަދި ރާއްޖޭގެ ކުރީގެ ރައީސް މުހައްމަދު ނަޝީދު ވެސް ވާދަކުރައްވަން ބޭނުންފުޅުވުމެވެ.
ޗެއާޕާސަން ހޮވުމުގެ އިންތިހާބުގެ ކެމްޕޭނާ އެކު ދެލީޑަރުންގެ މި ނުތަވަސްކަން އިތުރަށް ބޮޑުވެ، ރައީސް މުހައްމަދު ނަޝީދު ސީދާ ގޮތެއްގައި ރައީސް ސޯލިހަށް އެކިއެކި ތުހުމަތުތައް ވެސް ކުރައްވަން ފެއްޓެވީ އެވެ. އެމްޑީޕީގެ ސުޕަމެޖޯރިޓީ އޮންނަ ރައްޔިތުންގެ މަޖިލީހުގެ މަސައްކަތުގެ ތެރެއިން ވެސް އެކަން ފެނުނެވެ. ސަރުކާރު ޖަވާބުދާރީ ކުރުވުމުގެ ނަމުގައި މަޖިލީހުގެ އިދިކޮޅު މެމްބަރުން ހުށަހެޅި ބައެއް ގަރާރުތަކާ ދެކޮޅަށް އެމްޑީޕީގެ ޕާލަމެންޓްރީ ގްރޫޕުން ނެރުނު ވިޕްލައިންތަކާ ހިލާފުވާން މެމްބަރުންނަށް ނަޝީދު ބާރު އެޅުއްވުމަކީ މީގެ މިސާލެކެވެ.
އެމްޑީޕީގެ އިންތިހާބުގައި އިއްޔެ އުފެދުނު ހިޔާލުތަފާތުވުންތަކެއް ހައްލުކުރަން ބަޔަކު މަޝްވަރާކުރަނީ. ފޮޓޯ: މުހައްމަދު ޝާބިން/އަދަދު
މެމްބަރުން އުއްމީދުކުރީ ބައިބައިވުން ނިމޭނެ ކަމަށް
ޗެއާޕާސަން އިންތިހާބުގެ ކެމްޕޭނުގައި ހިނގި އެހުރިހާ ޒުވާބަކަށް ފަހު ވެސް އެމްޑީޕީގެ އާއްމު މެމްބަރުންގެ އުއްމީދަކަށްވީ ޕާޓީ ބައިބައިނުވެ އޮތުމެވެ. އިއްޔެ ވޯޓްލާން ނުކުމެ ތިބި ބައެއް މީހުން، "އަދަދު" އަށް ދިން އިންޓަވިއުތަކުގައި އެންމެ ބާރުލާފައި ބުނި އެއް ވާހަކައަކީ އެ އެވެ.
"އަޅުގަނޑުމެންގެ ލީޑަޝިޕަށް އަންނަ އިތުރު ކުރިއެރުމެއް، ނިމިގެން އަޅުގަނޑުމެން ތިބޭނީ ހަމަ އެކަތިގަނޑެއް ގޮތުގައި،" ވިއްސާރަ ކޯޓެއް ލައިގެން ވޯޓު ލާން ވޯޓުލާ މަރުކަޒަށް އައިސް ހުރި އެމްޑީޕީގެ ދުވަސްވީ ސަޕޯޓަރު އަބްދުﷲ ހުސައިން ބުންޏެވެ.
އެމްޑީޕީގެ ޗެއާޕާސަންކަމަށް ފައްޔާޒް އިންތިހާބުވުމުން އޭނާގެ ސަޕޯޓަރުން މަރުހަބާ ކިޔަނީ
އަބްދުﷲގެ އިތުރުން އެމްޑީޕީގެ އެހެން ގިނަ މެމްބަރުންތަކެއް ވެސް ތިބީ ހަމަ އެ ވިސްނުމުގަ އެވެ. ކެމްޕޭނުގެ ތެރޭގައި އެޕާޓީގައި ބައިބައިވުމެއް އުފެދުނު ކަމަށް ވެސް ބައެއް މީހުން ގަބޫލެއް ނުކުރެ އެވެ. އެމީހުން ދުށް ގޮތުގައި ކެމްޕޭންގައި އެ ދެއްކި ވާހަކަތަކަކީ ހިތުގެ އަޑިން އޮތް ރުޅިވެރިކަމަކުން ދެއްކި ވާހަކަތަކެއް ނޫނެވެ.
"އަޅުގަނޑު ގަބޫލެއް ނުކުރަން އެ ގޮތަކަށް [ރައީސް ނަޝީދާއި ރައީސް ސޯލިހްގެ ކޯޅުމެއް] އޮތް ކަމަކަށް މިއީ، އިންތިހާބެއް ވީމާ އޭގެ ވާދަވެރިކަން އެ ފެންނަނީ، އިންތިހާބަށް ފަހު ހަމަ އެކައްޗެއް ގޮތުގައި އެންމެން ވެސް ތިބޭނެ،" ކުރިން ވާހަކަ ދެއްކި އަބްދުﷲ ބުންޏެވެ.
އިއްޔެގެ އިންތިހާބުގައި ވޯޓުލެއްވުމަށް ފަހު ރައީސް އިބްރާހީމް މުހައްމަދު ސޯލިހު ވެސް ވިދާޅުވީ އިންތިހާބަށް ފަހުގައި ވެސް ޕާޓީގެ އެތެރޭގައި ހަމަޖެހުން އޮންނާނެ ކަމަށެވެ.
"އަދަދު"އަށް އިއްޔެ ދެއްވި އިންޓަވިއުއެއްގައި ރައީސް ވިދާޅުވީ އިންތިހާބެއްގައި ފެންނާނެ ހުރިހާ ކަމެއް މި އިންތިހާބުގައި ފެނިގެން ހިނގައްޖެ ކަމަށާއި އެހެން ނަމަވެސް, ޕާޓީގެ ތެރޭގައި ހަމަޖެހުން އޮންނާނެ ކަމަށެވެ. އެމަނިކުފާނު އެ އިޝާރާތްކުރެއްވީ ބެލެވޭ ގޮތުގައި މި އިންތިހާބުގައި ދެ ފަރާތުން ބަދަލުކުރި ބަހުގެ ހަމަލާތަކާ ތުހުމަތުތަކަށެވެ.
"އިންތިހާބަށް ފަހުގައި ވެސް ޕާޓީގެ އެތެރޭގައި ހަމަޖެހުން އޮންނާނެ. އެކަމާ އަޅުގަނޑު ޝައްއްކެއް ނުކުރަން،" ރައީސް ވިދާޅުވި އެވެެ.
ބަލި ގަބޫލުކުރުމެއް މަރުހަބާ ކިއުމެއް ވެސް ނެތް
އެމްޑީޕީއަކީ އިންތިހާބުތަކާ ރައްޓެހި، އިންތިހާބުތަކުގެ ނަތީޖާ ބަލައިގަންނަ ޕާޓީއެކޭ ބުނެވިދާނެ އެވެ. ރައީސް މުހައްމަދު ނަޝީދާ ވާދަކުރައްވައި 2013 ވަނަ އަހަރުގެ ރިޔާސީ އިންތިހާބު ކާމިޔާބުކުރެއްވުމުން އޭރުގެ ރައީސް އަބްދުﷲ ޔާމީނަށް ނަޝީދު މަރުހަބާ ވިދާޅުވި އެވެ. އިންތިހާބުގެ ނަތީޖާ ވަރަށް އަވަހަށް ގަބޫލުކުރެއްވުމުގެ އިތުރުން ޔާމީން ހުވައިކުރެއްވުމުގެ ރަސްމިއްޔާތަށް ވެސް އެމަނިކުފާނު ވަޑައިގެންނެވި އެވެ. ރާއްޖޭގައި ބޭއްވި ގިނަ އިންތިހާބުތަކުގައި އެމަ ނިކުފާނު ވަނީ މި ނަމޫނާ ދައްކަވައިފަ އެވެ. އެމްޑީޕީއަށް ކާމިޔާބު ނުވިޔަސް ނަތީޖާ ގަބޫލުކުރައްވައި، މަރުހަބާ ވިދާޅުވެ އެވެ.
އެކަމަކު އިއްޔެ ބޭއްވި އެތެރޭގެ އިންތިހާބު ކާމިޔާބުކުރެއްވި ބޭފުޅުންނަށް އެމަނިކުފާނު އަދިވެސް މަރުހަބާ ވިދާޅެއް ނުވެ އެވެ. އެމަނިކުފާނުގެ ތާއީދު އޮތް ކެންޑިޑޭޓް އިމްތިޔާޒް ފަހުމީގެ ބަހެއް ލިބޭތޯ "އަދަދު"އިން ރޭ ވެސް މަސައްކަތް ކުރީމެވެ. އޭނާއަށާއި އޭނާގެ ތަރުޖަމާނު އަދި އުނގޫފާރު ދާއިރާގެ މެމްބަރު މުހައްމަދު ވަހީދަށް އެތައް ފަހަރަކު ގުޅިނަމަވެސް އެއިން ބޭފުޅަކު ފޯނެއް ނުނަންގަވަ އެވެ.
އިންތިހާބާ ގުޅޭ ގިނަ ޝަކުވާތަކެއް އެމްޑީޕީގެ އިންތިހާބާ ގުޅޭ ކޮމިޓީއަށް އިންތިގެ ޓީމުން އިއްޔެ ހުށަހެޅި އެވެ. އެހެން ނަމަވެސް އިންތިހާބުވި ބޭފުޅުންނަށް މަރުހަބާ ވިދާޅުނުވުމާ އެކަމާ ގުޅުވޭކަށް އަދި ނެތެވެ. އެއީ އިއްޔެގެ ވޯޓުގެ ނަތީޖާ ބަލައިނުގަންނަކަން ސީދާ އިއުލާނުކުރައްވާފައި ނުވާތީ އެވެ.
އެހެންވީމާ މި އިންތިހާބަށް ފަހު ވެސް އެމްޑީޕީ ބައިބައިނުވެ އޮންނާނެ ކަމަށް އެޕާޓީގެ އާއްމު މެމްބަރުން ކުރި އުއްމީދާ އެއްގޮތަށް އެޕާޓީ ކުރިއަށްދާނެ ކަމާ މެދު މިހާރު މިވަނީ އެމްޑީޕީގެ އެއްބައިވަންތަކަން އަލުން އިއާދަވެދާނެތޯ ސުވާލު އުފެދިފަ އެވެ.
މިއާ އެކު އުފެދޭ އެހެން ގިނަ ސުވާލުތަކެއް ވެސް އެބަހުއްޓެވެ. މި އިންތިހާބަށް ފަހު ބަލިވި ޓީމުން މޮޅުވި ޓީމަށް މަރުހަބާ ކިޔައި، އެެއްބައިވަންތަ ނުވެވި ވަނިކޮށް، ރިޔާސީ ޓިކެޓް ދޭނެ ބޭފުޅެއް ނިންމަން ޕްރައިމަރީއެއް ބާއްވަން ޖެހިއްޖެ ނަމަ ދެނ ވާނީ ކިހިނެތް ހެއްޔެވެ؟ އެ ފަދަ ޕްރައިމަރީއަކަށް ފަހު ރިޔާސީ އިންތިހާބުގެ ކެމްޕޭން އެއް ޕާޓީއެއްގެ ގޮތުގައި ކުރެވޭނެ ހެއްޔެވެ؟ އެގޮތަށް މަސައްކަތް ނުކުރެވި އެމްޑީޕީއަށް ރިޔާސީ އިންތިހާބު ކާމިޔާބުކުރުމުގެ ފުރުސަތު އޮތީ ކިހާވަރަކަށް ހެއްޔެވެ؟ މިފަދަ ގިނަ ސުވާލުތަކުގެ ޖަވާބު އެެމްޑީޕީގެ އާއްމު މެމްބަރުން ބޭނުންވާނެ އެވެ.
