ސްޓުޓްގާޓް، ޖަރުމަނު (މޭ 14) - އިންޑިއާއިން ގޮދަން ފުށް އެކްސްޕޯޓް ކުރުން މަނާ ކުރުމާ އެކު، ސިނާއީ ގޮތުން އެންމެ ކުރި އަރާފައިވާ ގައުމުތައް ހިމެނޭ ޖީ7 އިން ފާޑުކިޔައިފި އެވެ.
"ހުރިހާ އެންމެން މުދާ އެކްސްޕޯޓް ކުރުން މަނާކޮށް، މާކެޓުތައް ބަންދު ކުރަން ފަށައިފި ނަމަ މި ކާރިސާ އިތުރަށް ގޯސް ވާނެ،" ޖަރުމަނުގެ ދަނޑުވެރިކަމާ ބެހޭ މިނިސްޓަރު ޗެމް އޮޒްޑެމިރް ވިދާޅުވި އެވެ.
އާދަޔާ ހިލާފަށް ހޫނު ގަދަވެ، އުފެއްދުންތެރިކަން ދަށްވެފައި ވާތީ، ސަރުކާރުގެ ހުއްދަ ނެތި ގޮދަން ފުށް އެކްސްޕޯޓް ކުރުން އިންޑިއާއިން މަނާ ކުރީ ހޮނިހިރު ދުވަހު އެވެ.
އިންޑިއާއަކީ ދުނިޔޭގައި ދެ ވަނައަށް އެންމެ ގިނައިން ގޮދަން ފުށް އުފައްދާ ގައުމެވެ. އެ ގައުމުން ބުނީ އުފެއްދުންތެރިކަން ދަށްވުމާއި ޔޫކްރެއިން ހަނގުރާމައާ ހެދި ދުނިޔޭގެ މާކެޓުގައި އަގު އުފުލުން ފަދަ ކަންކަމާ ހެދި، ގައުމުގެ ކާބޯތަކެތީގެ ރައްކާތެރިކަމާ މެދު ކަންބޮޑުވުން އެބަ އޮތް ކަމަށެވެ.
ހޮނިހިރު ދުވަހު ޖަރުމަނުގެ ސްޓުޓްގާޓްގައި އޮތް ޖީ7 ބައްދަލުވުމުގައި ޔޫކްރެއިންގެ ދަނޑުވެރުކަމާ ބެހޭ މިނިސްޓަރު ވެސް ބައިވެރިވެވަޑައިގެންނެވި އެވެ.
އޭނާއާ ހަވާލަދީ އޮޒްޑެމިރް ވިދާޅުވީ ޔޫކްރެއިންގެ ގުދަންތަކުގައި 20 މިލިއަން ޓަނުގެ ގޮދަން ފުށް އެބަ ހުރި ކަމަށާއި އެއީ މިހާރުން މިހާރަށް އެކްސްޕޯޓް ކުރަން ޖެހޭ ސަޕްލައި ކަމަށެވެ.
ފެބްރުއަރީ 24 ވަނަ ދުވަހު ރަޝިއާ ސިފައިން ޔޫކްރެއިނަށް އަރައި ހަނގުރާމަ ފެށުމުން ކުރިން، އެ ގައުމުން ކޮންމެ މަހަކު ވެސް 4.5 މިލިއަން ޓަނުގެ ދަނޑުވެރި އުފެއްދުންތައް ބޭރު ކުރެ އެވެ.
އެއީ ދުނިޔޭގައި އުފައްދާ ގޮދަން ފުށުގެ 12 ޕަސެންޓް، ޒުވާރީގެ 15 ޕަސެންޓް އަދި ސަންފްލާވާ ތެލުގެ 50 ޕަސެންޓެވެ.
ހަނގުރާމައާ ހެދި ޔޫކްރެއިންގެ ބޮޑެތި ބަނދަރުތައް ބަންދުވެފައި ވާތީ، މިހާރު ސަޕްލައި ކުރަން ވަރަށް ދައްޗެވެ.
ޖީ7 ގައުމުތަކުން ގޮވާލީ ކާބޯތަކެތީގެ ކާރިސާއެއް އޮތް ދަނޑިވަޅެއްގައި ގޮންޖެހުންތައް ކުރިމަތި ވާނެ ފަދަ ނިންމުންތައް ނުނިންމުމަށެވެ.
"ޖީ20 ގެ މެމްބަރު ގައުމެއްގެ ގޮތުން އިންޑިއާ ޒިންމާދާރުވުމަށް އަޅުގަނޑުމެން ގޮވާލަން،" ޖީ7 ގެ ރިޔާސަތު ބަލަހައްޓަވާ ޖަރުމަނުގެ އޮޒްޑެމިރް ވިދާޅުވި އެވެ.
