މެނީލާ، ފިލިޕީންސް (މޭ 10) - ފިލިޕީންސްގެ ރިޔާސީ އިންތިހާބުން ކުރި ހޯއްދެވީ ކުރީގެ ޑިކްޓޭޓަރު ފާޑިނަންޑް މާކޯސްގެ ދަރިކަލުން ކަމަށް ވަގުތީ ނަތީޖާއިން ދައްކައިފި އެވެ.
ވަގުތީ ނަތީޖާ ދައްކާ ގޮތުން ފާޑިނަންޑް "ބޮންގްބޮންގް" މާކޯސް ޖޫނިއާ ވަނީ 50 ޕަސެންޓަށް ވުރެ ގިނަ ވޯޓު ހޯއްދަވާފަ އެވެ. އެންމެ ކައިރިން ވާދަކުރެއްވި ލެނީ ރޮބްރޭޑޯއަށް ވުރެ ދެ ގުނަ އިތުރަށް މާކޯސް ޖޫނިއާއަށް ވޯޓު ލިބުނެވެ.
އިންތިހާބުގައި ވޯޓުލީ މީހުންގެ ތެރެއިން 16 މިލިއަން މީހުން ތާއީދު ކުރީ މާކޯސް ޖޫނިއާ އަށެވެ.
ފިލިޕީންސްގައި ރައީސް އާއި ނައިބު ރައީސް ހޮވަނީ ވަކިންނެވެ. ވަގުތީ ނަތީޖާ ދައްކާ ގޮތުން ނައިބު ރައީސް ކަމަށް ހޮވިވަޑައިގެންނެވީ މިހާރު ރައީސް ރޮޑްރިގޯ ޑުޓާޓޭގެ ދަރިކަނބަލުން އަދި ޑަވާއޯ ސިޓީގެ ކުރީގެ މޭޔަރު ސާރާ ޑުޓާޓޭ އެވެ.
ފިލިޕީންސްގައި ކުރިން ވެރިކަން ކުރެއްވި ފާޑިނަންޑް މާކޯސްގެ ސަރުކާރުގައި ހުދުމުހުތާރު ސިފަތައް ގިނަ އެވެ. ކޮރަޕްޝަން އިތުރުވެ، ރައްޔިތުންގެ އިންގިލާބަކުން އެ ސަރުކާރު ބަދަލު ކުރީ 1986 ވަނަ އަހަރު އެވެ.
ބައްޕާފުޅުގެ ވެރިކަން ކުރިއަށް ދިޔަ ގޮތާ ދެކޮޅަށް މާކޯސް ޖޫނިއާ ދުވަހަކު ވެސް ވާހަކަ ދައްކަވާފައެއް ނުވެ އެވެ. އެއާ ހިލާފަށް، ރިޔާސީ ކެމްޕެއިންގައި ވެސް އޭނާ ތަކުރާރުކޮށް މަސައްކަތް ކުރެއްވީ ބައްޕާފުޅުގެ ސަރުކާރުގެ މޫނުމަތި ރީތި ކުރުމަށެވެ.
އިންތިހާބުގެ ވަގުތީ ނަތީޖާ އިއުލާނުކޮށްފައިވާ އިރު، ދާއިމީ ނަތީޖާ އިއުލާނު ކުރާނީ މޭ 28 ވަނަ ދުވަހު އެވެ. އެހެން ނަމަވެސް، މާކޯސް ޖޫނިއާގެ ސަޕޯޓަރުން ދަނީ މަގުތަކަށް ނުކުމެ އުފާ ފާޅު ކުރަމުންނެވެ.
