ކޮލޮމްބޯ، ސްރީލަންކާ (މޭ 9) - ސްރީލަންކާގެ ރައީސް ގޮތަބަޔާ ރާޖަޕަކްސަގެ އިސްތިއުފާއަށް ގޮވާލައި ކުރިއަށްގެންދާ މުޒާހަރާގެ ބައިވެރިންނަށް އޭނާގެ ސަޕޯޓަރުން މިއަދު ހެނދުނު ހަމަލާ ދިނުމާއި ގުޅިގެން މުޒާހަރާތައް ބޮޑެތި ހަމަނުޖެހުންތަކަށް ބަދަލުވެ އެ ގައުމުގެ ހާލަތު ވަރަށް ބޮޑަށް ގޯސްވެއްޖެ އެވެ.
މިއަދު ހެނދުނު އޭއެފްޕީން ވަނީ ދަގަނޑު ހޮޅިބުރި އާއި ލަޓިބުރި ފަދަ ތަކެތި ބޭނުންކޮށްގެން ރައީސް އޮފީސް ބޭރުގައި ޓެންޓު ޖަހައިގެން ސުލްހަވެރިކަމާ އެކު މުޒާހަރާ ކުރަމުންދިޔަ ރައްޔިތުންނަށް ގޮތަބަޔާގެ ސަޕޯޓަރުން ހަމަލާ ދީފައިވާ ކަމަށް ރިޕޯޓުކޮށްފަ އެވެ.
އެއަށްފަހު، ސަރުކާރަށް ތާއިދުކުރާ މީހުންނާއި މުޒާހަރާގެ ބައިވެރިންނާ ދެމެދު ހަމަނުޖެހުންތައް އުފެދި ބައެއް ތަންތަނުގައި ވަނީ ހުޅުޖަހާފަ އެވެ. އޭގެ ތެރޭގައި ވެރިކަންކުރާ އެސްއެލްޕީޕީގެ މަޖިލިސް މެމްބަރުންގެ ގެތައް ހިމެނެ އެވެ. ކުރީގެ ކެބިނެޓު ވަޒީރުން ވެސް އޭގެ ތެރޭގައި ހިމެނޭއިރު އެމީހުން ދުއްވާ ވެހިކަލްތަކަށް ވެސް ވަނީ ގެއްލުން ދީފަ އެވެ.
އެސްއެލްޕީޕީގެ މަޖިލިސް މެމްބަރެއް ކަމަށްވާ އަމަރަކީރިތި އަތުކޮރަލާ ވަނީ މިއަދުގެ ހަމަނުޖެހުންތަކުގެ ތެރެއިން މަރުވެފަ އެވެ. ލަންކާގެ މީޑިއާތައް ބުނާ ގޮތުން އޭނާގެ ކާރުގައި ދިޔަ އޭނާއާއެކު ދިޔަ ބަޔަކު މުޒާހަރާގެ ބައިވެރިން ގަޔަށް ބަޑި ޖެހުމަށްފަހު އެތަނުން ފިލަން އޭނާ ދިޔައީ ކައިރީގައި ހުރި އިމާރާތަކަށެވެ.
އަދި، އެތައް ބަޔަކު އެ އިމާރާތް ވަށައިލުމުން ގަޔަށް ބަޑި ޖަހައި އޭނާ އަމިއްލައަށް މަރުވީ ކަމަށް ލަންކާގެ ފުލުހުން ބުނެފައިވެ އެވެ.
އޭގެ އިތުރުން، ބޮޑުވަޒީރުކަމުން އިސްތިއުފާ ދެއްވި މަހިންދަ ރާޖަޕަކްސަ އަދި ރައީސް ގޮތަބަޔާގެ ބައްޕަ ޑީއޭ ރާޖަޕަކްސަގެ ހަނދާނުގައި ހަދާފައި ހުރި ބިނާއެއް ވެސް ވަނީ ބިމާ ހަމަކޮށްފަ އެވެ.
ލަންކާގެ އިދިކޮޅު ޕާޓީތަކުންނާއި މުޒާހަރާގެ ބައިވެރިން ގެންދަނީ އިސްތިއުފާ ދެއްވި މަހިންދަ ހައްޔަރުކުރުމަށް ގޮވާލަމުންނެވެ. އޭނާގެ ރަސްމީ ގެކޮޅު ކައިރީގައި ވެސް ވަރުގަދަ މުޒާހަރާތަކެއް ދަނީ ކުރަމުންނެވެ. އެ މީހުން ގެންދަނީ ގޭޓު ވައްޓާލައި އެތެރެއަށް ވަނުމަށް މަސައްކަތް ކުރަމުންނެވެ.
މި ހަމަނުޖެހުންތައް ހުއްޓުވުމަށް ލަންކާގެ ފުލުހުން ކުރަމުންދާ މަސައްކަތަށް އެއްވެސް ވަރެއްގެ ކުރިއެރުމެއް މިހާތަނަށް ލިބިފައެއް ނުވެ އެވެ. ކަރުނަ ގޭހާއި ޕްރެޝަރުގައި ފެން ޖަހައިގެން ވެސް މުޒާހަރާތައް މައިތިރި ނުކުރެވި ހަމަނުޖެހުންތަކަށް ވަނީ ބަދަލުވެފަ އެވެ.
މިހާތަނަށް މި ހަމަނުޖެހުންތަކުގައި 100 އަށްވުރެ ގިނަ މީހުންނަށް އަނިޔާވެފައިވާ ކަމަށް ރިޕޯޓުކޮށްފައިވެ އެވެ. މަރުވި މީހުންގެ ޔަގީން އަދަދެއް މިހާތަނަށް ލަންކާގެ މީޑިއާތަކުން ރިޕޯޓުކޮށްފައެއް ނުވެ އެވެ.
މުޅި ސްރީ ލަންކާގައި މާދަމާ ހެނދުނު 10 ޖަހަންދެން ކާފިއު އިއުލާނުކޮށްފައިވާއިރު މިއަދު ކޮލޮމްބޯގައި ވަކި މުއްދަތެއް ނެތް ގޮތަށް ކާފިއު ހިންގަން އޮތީ ނިންމާފަ އެވެ.
