ޑަވާއޯ، ފިލިޕީންސް (މޭ 9) - ފިލިޕީންސްގެ އިންތިހާބުގެ ވޯޓުލުން ހޯމަ ދުވަހު ފަށައިގެން ކުރިއަށް ދަނިކޮށް، ދެކުނުގެ ހިސާބެއްގައި ހުރި ވޯޓުލާ މަރުކަޒެއްގެ ތިން ސެކިއުރިޓީ ގާޑުންގެ ގަޔަށް ބަޑި ޖަހައި މަރާލައިފި އެވެ.
ފިލިޕީންސްއަކީ ބަޑި ގެންގުޅުމުގެ ފަސޭހަ އުސޫލުތަކެއް އޮންނަ ގައުމެކެވެ. އިންތިހާބުތަކާ ދިމާކޮށް އާއްމުކޮށް ހަމަނުޖެހުން ހިނގާ ކަމަށް ފާހަގަކުރެވުނު ނަމަވެސް، މި ފަހަރުގެ އިންތިހާބުގެ ކެމްޕެއިން ކުރިއަށް ދިޔައީ ވަރަށް ސުލްހަވެރިކޮށް ކަމަށް ފުލުހުން ކުރިން ބުންޏެވެ.
ސެކިއުރިޓީ ގާޑުންގެ ގަޔަށް ބަޑި ޖަހައި މަރާލީ މިންޑަނާއޯ ރަށުގެ ބުލުއަން މުނިސިޕަލިޓީގެ ވޯޓުލުން ހޯމަ ދުވަހު ހެނދުނު ފެށިތާ ކުޑައިރުކޮޅެއް ފަހުންނެވެ. އެ ތަނަކީ ޓެރަރިސްޓުންނާއި ހަތިޔާރު ހިފައިގެން އުޅޭ ގްރޫޕްތައް ގިނަ ތަނެކެވެ.
އެ ތަނުގެ ކުރީގެ މޭޔަރު އިބްރާހިމް މަންގުޑަޑަޓޫ ވިދާޅުވީ ބަޑި ޖަހަން ފެށުމާ އެކު ވޯޓުލާން ކިޔުގައި ތިބި މީހުން ސަލާމަތް ވާން ދުވި ކަމަށެވެ. ހަމަލާގައި ހަތަރު ވަނަ ގާޑަކަށް އަނިޔާވި ކަމަށް ފުލުހުންގެ ތަރުޖަމާނު މޭޖާ ރޯލްޑަން ކުންޓޮންގް ވިދާޅުވި އެވެ.
އާދީއްތަ ދުވަހުގެ ރޭ ޑާތޫ އުންސޭ މުނިސިޕަލިޓީގެ ވޯޓުލާ މަޒުކަޒެއްގެ ބޭރުގައި ފަސް ގްރެނޭޑް ވެސް ގޮއްވާލާފައިވެ އެވެ. އެ ހަމަލާގައި ނުވަ މީހުންނަށް އަނިޔާވި އެވެ.
އެ ހަމަލާދިންތާ އިރުކޮޅެއް ފަހު، އަވައްޓެތި ޝަރީފް އަގުއަކް މުނިސިޕަލިޓީގައި ވެސް ގްރެނޭޑެއް ގޮއްވާލި އެވެ. ނަމަވެސް އެ ހަމަލާގައި އެއްވެސް މީހަކަށް އަނިޔާވެފައެއް ނުވެ އެވެ. އެ ދެ އަވަށަކީ ވެސް މަގުއިންޑަނާއޯ ޕްރޮވިންސްގެ ދެ އަވަށެވެ.
އިލެކްޝަންސް ކޮމިޝަނުގެ ތަރުޖަމާނަކު ވިދާޅުވީ އެ ހަމަލާތަކާ އިންތިހާބާ ގުޅުމެއް އޮތްތޯ ބަލަމުންދާ ކަމަށެވެ.
ނައިބު ރައީސް ކަމަށް ވާދަކުރައްވާ ސާރާ ޑުޓާޓޭ ވިދާޅުވީ ހަމަނުޖެހުމުގެ ސަބަބުން އާއްމުން ވޯޓުލާން ފަސްނުޖެހޭނެ ކަމަށް އުއްމީދު ކުރައްވާ ކަމަށެވެ. މިންޑަނާއޯގެ ޑަވާއޯ ސިޓީގެ ކުރީގެ މޭޔަރު ސާރާއަކީ ރައީސް ރޮޑްރިގޯ ޑުޓާޓޭގެ ދަރިކަނބަލުންނެވެ.
ރައީސްކަން ކާމިޔާބު ކުރައްވާނެ ކަމަށް އެންމެ ބޮޑަށް ބެލެވެނީ ކުރީގެ ޑިކްޓޭޓަރު ފާޑިނަންޑް މާކޯސްގެ ދަރިކަލުންނެވެ.
