ގާހިރާ، މިސްރު (މޭ 8) - ސައިނާ ޕެނިންސޫލާ ކައިރިން އޮންނަ ސުއެޒް ކެނަލް ސަރަހައްދެއްގައި ޓެރަރިސްޓް ހަމަލާއެއް ހުއްޓުވަން އުޅުނު މިސްރުގެ 11 ސިފައިން ހޮނިހިރު ދުވަހު މަރުވެއްޖެ އެވެ.
މިއީ ސައިނާ އާއި އެ ތަން ވަށައިގެންވާ ހިސާބުތަކުގައި މިސްރުގެ ސިފައިން ޓެރަރިޒަމާ ދެކޮޅަށް ހިންގާ ދިގު އޮޕަރޭޝަނުގައި ސިފައިންގެ ގިނަ އަދަދެއްގެ ބަޔަކު މަރުވި ފުރަތަމަ ފަހަރެވެ.
ސިފައިން ނެރުނު ބަޔާނެއްގައި ބުނީ ޓެރަރިސްޓުންނާ ހަމަލާ ބަދަލު ކުރުމުގެ ތެރޭގައި ސިފައިންގެ ފަސް މީހުންނަށް އަނިޔާވި ކަމަށެވެ. އެ ޓެރަރިސްޓުންނާ ދެކޮޅު އޮޕަރޭޝަން އަދިވެސް ދަނީ ކުރިއަށެވެ.
ރައީސް އަބްދުލް ފައްތާހް އަލް ސިސީ ވަނީ ސިފައިންގެ މަރުތަކާ ގުޅިގެން ހިތާމަ ފާޅުކުރައްވައި، ޓެރަރިޒަމް "މުލުން ލުހެލަން" ވައުދުވެވަޑައިގެންފަ އެވެ.
އުތުރު ސައިނާގެ ބައެއް މީހުން ބުނީ ހަމަލާ ހިނގީ ސުއޭޒް ކެނަލްގެ އެންމެ އިރުން އޮންނަ އިސްމާއިލިއްޔާ ޕްރޮވިންސްގެ ގަންތަރާ އަވަށުގައި ކަމަށެވެ.
އެ ތަނުގައި ސިފައިން ތިބީ ފެން ޕަމްޕު ކުރާ ފެސިލިޓީއެއްގެ ސެކިއުރިޓީ ބެލެހެއްޓުމަށެވެ. ހަމަލާ ބަދަލު ކުރަން ފެށީ ޓެރަރިސްޓުން ސިފައިންނަށް އަމާޒުކޮށް ބަޑި ޖެހުމުންނެވެ.
ބަޑި ޖެހުމަށް ފަހު ޓެރަރިސްޓުންތައް ވަނީ އުތުރު ސައިނާގެ ސަހަރާގެ ތެރެއަށް ވަދެ ފިލާފަ އެވެ. ހޮނިހިރު ދުވަހުގެ ހަމަލާގެ ޒިންމާ އެއްވެސް ޓެރަރިސްޓް ގްރޫޕަކުން މިހާތަނަށް އުފުލާފައެއް ނުވެ އެވެ.
މިސްރުގެ ސައިނާ ޕެނިންސޫލާގައި ޓެރަރިސްޓުން ގިނަވެ، ހަމަނުޖެހުން އުފެދުނުތާ 10 އަހަރު ވެއްޖެ އެވެ. އެކަން ފެށުނީ ކުރީގެ ރައީސް މުހައްމަދު މުރްސީ 2013 ވަނަ އަހަރު މަގާމުން ދުރު ކުރި ހިސާބުންނެވެ.
ފެބްރުއަރީ 2018 ގައި ސިފައިންނާއި ފުލުހުން ގުޅިގެން އުތުރު ސައިނާއިން ޓެރަރިސްޓުން ފައްސާލުމުގެ ބޮޑު އޮޕަރޭޝަނެއް ފެށި އެވެ. މިހާތަނަށް 1000 އަށް ވުރެ ގިނަ ޓެރަރިސްޓުން މަރުވެފައިވާ ކަމަށް ބެލެވެ އެވެ.
