މިއަހަރުގެ ޖޫން މަހު އިންތިހާބުކުރާ ކޮމަންވެލްތު ސެކްރެޓަރީ ޖެނެރަލްގެ މަގާމަށް ވާދަކުރައްވާ ޖެމެއިކާގެ ފޮރިން މިނިސްޓަރު ކަމީނާ ޖޯންސަން ސްމިތަށް ރާއްޖެއިން ތާއީދުކުރަން ނިންމައިފި އެވެ.
ޖެމެއިކާގެ ބޮޑުވަޒީރު އެންޑްރޫ މައިކަލް ހޯލްނެސްއަށް ގުޅުއްވައި ރައީސް އިބްރާހިމް މުހައްމަދު ސޯލިހު ވަނީ އިއްޔެ އެކަން ހިއްސާކުރައްވާފަ އެވެ.
ކޮމަންވެލްތަށް އާ ސެކްރެޓަރީ ޖެނެރަލަކު އިންތިހާބު ކުރާނީ ރުވާންޑާގެ ކިގަލީގައި އޮންނަ ކޮމަންވެލްތު ޤައުމުތަކުގެ ސަރުކާރުތަކުގެ އެންމެ އިސްވެރިންގެ ބައްދަލުވުމުގަ އެވެ. މިވަގުތު އެ މަގާމުގައި ހުންނެވީ ޕެޓްރީޝިއާ ސްކޮޓްލަންޑް އެވެ.
ކަމީނާ ޖޯންސަންއަށް ލިބިވަޑައިގެންފައިވާ ގިނަ ތަޖުރިބާއާ އެކު އެ މަގާމަށް އެންމެ އެކަށީގެންވާ ކެންޑިޑޭޓަކީ އޭނާ ކަމަށް ރައީ ސޯލިހު އިއްޔެ ވިދާޅުވި އެވެ. އަދި، އޭނާގެ ސެކްރެޓަރީ ޖެނެރަލްގެ ދައުރުގައި ރާއްޖެ އާއި ތަރައްގީވަމުން އަންނަ ކުދި ޖަޒީރާ ގައުމުތައް ކޮމަންވެލްތުގައި ރަނގަޅަށް ތަމްސީލުވެގެންދާނެ ކަމަށް ޔަގީންކުރައްވާ ކަމަށް ވެސް ރައީސް ސޯލިހު ފާހަގަކުރެއްވި އެވެ.
ރައީސް ސޯލިހު އާއި ޖެމެއިކާގެ ބޮޑުވަޒީރުގެ ފޯނު ކޯލުގައި އިތުރަށް ވަނީ ދެ ގައުމުގެ ގުޅުން ބަދަހިކުރުމާ ގުޅޭގޮތުން ވެސް މަޝްވަރާކޮށްފަ އެވެ. އަދި، އެމަނިކުފާނު ރާއްޖެ ވަޑައިގަތުމަށް ވެސް ރައީސް ސޯލިހު ދައުވަތު އެރުވި އެވެ.
ކަމީނާ ޖޯންސަން ސްމިތަކީ ޖެމެއިކާގެ ފުރަތަމަ އަންހެން މިނިސްޓަރ އޮފް ފޮރިން އެފެއާޒް އެންޑް ފޮރިން ޓްރޭޑްގެ މަގާމު އަދާކުރެއްވި ބޭފުޅާއެވެ. އަދި، އޭނާ ވަނީ ކެރީބިއަން ފޯރަމް (ކެރިފޯރަމް) ގެ ޗެއަރޕަރސަންގެ މަޤާމާއި، ކައުންސިލް އޮފް މިނިސްޓަރސް އޮފް ދަ އޯގަނައިޒޭޝަން އޮފް އެފްރިކަން ކެރީބިއަން އެންޑް ޕެސިފިކް ސްޓޭޓްސްގެ ރައީސްގެ މަގާމު އަދާކުރައްވާފަ އެވެ.
އޭގެ އިތުރުން، ކެރިކޮމް ކައުންސިލް އޮން ޓްރޭޑް އެންޑް ޑިވެލޮޕްމަންޓްގެ ރައީސްގެ މަގާމު ވެސް އަދާކުރެއްވި އެވެ. މިހާރު ވެސް އޭނާ ހުންނެވީ ވޯލްޑް ޓްރޭޑް އޯގަނައިޒޭޝަންގެ އެފްރިކަން ކެރީބިއަން އެންޑް ޕެސިފިކް ގްރޫޕްގެ ކޯޑިނޭޓަރުގެ މަގާމުގަ އެވެ.
އޭނާ ވަނީ ލަންޑަން ސްކޫލް އޮފް އިކޮނޮމިކްސް އިން ކޮމާޝަލް ލޯ އިން މާސްޓާސް ޑިގްރީ ފުރިހަމަކުރައްވާފަ އެވެ. އޭނާ އަކީ ޖެމެއިކާގެ ލޭބާ ޕާޓީ ތަމްސީލުކުރައްވާ ބޭފުޅެކެވެ.
