ޔޫކްރެއިންގައި ކުރަމުންދާ ހަނގުރާމަ ނިމުމަކަށް ގެންނަން މަޝްވަރާ ކުރުމަށް އިންޑިއާގެ ބޮޑު ވަޒީރު ނަރެންދްރަ މޯދީ ގޮވާލައްވައިފި އެވެ.
ޔޫރަޕަށް ކުރައްވާ ދަތުރެއްގައި މޯދީ މަޝްވަރާއަށް ގޮވާލެއްވި ނަމަވެސް، ރަޝިއާގެ އަމަލުތައް ކުށްވެރި ކުރައްވާފައެއް ނުވެ އެވެ.
އިންޑިއާއަށް ބޭނުންވާ އަސްކަރީ ގިނަ ސާމާނު އެތެރެ ކުރަނީ ރަޝިއާ އިންނެވެ. ހަނގުރާމައިގެ މައްސަލައިގައި އިންޑިއާއަށް ހުޅަނގުގެ ޕްރެޝަރު ދަނީ ކުރިމަތިވަމުންނެވެ.
"އަޅުގަނޑުމެން ވާނީ ހަނގުރާމަ މެދުކަނޑާލަން ގޮވާލާފައި. ހަމަނުޖެހުން ހައްލު ކުރަން އޮތް ހަމައެކަނި މަގަކީ މަޝްވަރާ،" ޖަރުމަނުގެ ޗާންސެލަރު އޯލާފް ޝޯލްޒްއާ ބާލިންގައި ބައްދަލުކުރެއްވުމަށް ފަހު މޯދީ ވިދާޅުވި އެވެ.
"މި ހަނގުރާމައިން އެއްވެސް ބަޔަކަށް މޮޅު ލިބޭނެ ކަމަކަށް އަޅުގަނޑުމެން ނުދެކެން. ސުލްހައަށް މި ގޮވާލަނީ އެހެންވެ،" މޯދީ ވިދާޅުވި އެވެ.
"ޔޫކްރެއިންގައި އުފެދިފައިވާ އިންސާނީ ކާރިސާގެ އިތުރުން، ތެލުގެ އަގުތައް ޕްރެޝަރަށް ވެއްޓުމާއި، ކާބޯތަކެތީގެ ސަޕްލައިއަށް އަސަރު ކުރުމުން ދުނިޔޭގެ ކޮންމެ އާއިލާއަކަށް ވެސް ބުރަ ވާނެ."
އިންޑިއާ އާއި ޔޫރަޕިއަން ޔޫނިއަން (އީޔޫ)އާ ދެމެދު މިނިވަން ވިޔަފާރީގެ އެއްބަސްވުމެއް ގާއިމް ކުރަން ދަނީ މަސައްކަތް ކުރަމުންނެވެ. ޖަރުމަނުން ވަނީ އެކަމަށް ތާއީދު ކުރާކަން ހާމަކޮށްފަ އެވެ.
އޭގެ އިތުރުން އަންނަ މަހު އޮންނަ ޖީ7 ގައުމުތަކުގެ ލީޑަރުންގެ ސަމިޓުގައި ބައިވެރިވުމުގެ ދައުވަތު ޖަރުމަނުން ވަނީ މޯދީއަށް ދެއްވާފަ އެވެ.
ޖަރުމަނުގެ އިތުރުން ޑެންމާކަށް ވެސް މޯދީ ވަޑައިގަންނަވާނެ އެވެ. އެ ގައުމުގައި މޭ ތިން ވަނަ ދުވަހުން ފެށިގެން ދެ ދުވަހަށް އޮންނަ އިންޑިއާ-ނޯޑިކް ސަމިޓުގެ ތެރެއިން މޯދީ އާއި ޑެންމާކް، އައިސްލޭންޑް، ފިންލޭންޑް، ސްވިޑަން އަދި ނޯވޭގެ ބޮޑު ވަޒީރު ބައްދަލުކުރައްވާނެ އެވެ.
އޭގެ ފަހުން ފްރާންސަށް ވަޑައިގެން ރައީސް އިމޭނުއެލް މެކްރޯންއާ ބައްދަލުކުރައްވާނެ ކަމަށް އިންޑިއާ ސަރުކާރުން ނެރުނު ބަޔާނެއްގައި ވެ އެވެ.
