ޗައިނާގެ ޗަންގްޝާ ސިޓީގެ އިމާރާތެއް ވެއްޓުނު މައްސަލައިގައި ތުހުމަތު ކުރެވޭ ނުވަ މީހުން ހައްޔަރުކޮށްފައިވާ ކަމަށް ފުލުހުން ބުނެފި އެވެ.
ހައްޔަރު ކުރި މީހުންގެ ތެރޭގައި އިމާރާތުގެ ވެރިޔާ އާއި އިމާރާތް ހެދުމަށް ޒިންމާވާ ތިން މީހުން ހިމެނެ އެވެ. އިތުރު ފަސް މީހުން ހައްޔަރު ކުރީ އިމާރާތުގެ ރައްކާތެރިކަމާ ގުޅޭ ދޮގު ރިޕޯޓެއް ތައްޔާރު ކުރި ކަމަށް ބެލެވޭތީ އެވެ.
ހުކުރު ދުވަހު ހަ ފަންގިފިލާގެ އިމާރާތް ވެއްޓެން މެދުވެރިވި ސަބަބު އަދި ސާފެއް ނޫނެވެ.
ރައީސް ޝީ ޖިންޕިން ހޮނިހިރު ދުވަހު ގޮވާލެއްވީ އިމާރާތުގެ ދަށުގައި ތާށިވި އެންމެން ސަލާމަތް ކުރެވޭނެ ގޮތަކަށް މަސައްކަތް ކުރިއަށް ގެންދިޔުމަށާއި އަވަސް ތަހުގީގެއް ހިންގުމަށެވެ.
މިހާތަނަށް ހަ މީހުން ސަލާމަތްކޮށްފައިވާ އިރު، ގިނަ އަދަދެއްގެ މީހުން ތާށިވެފައިވާ ކަމަށް ޗަންގްޝާގެ މޭޔަރު ޒެންގް ޖިއާންޒިން ވިދާޅުވި އެވެ.
އޭނާ ކުރިން ވިދާޅުވީ 18 މީހުން އިމާރާތުގެ ދަށުގައި ތާށިވެފައިވާ އިރު، އިތުރު 39 މީހުންގެ ހަބަރެއް ނުވާ ކަމަށެވެ.
ވެއްޓުނު އިމާރާތަކީ ހޮޓަލަކާއި، އެޕާޓްމަންޓްތަކާއި ސިނަމާއެއް ހިންގާ އިމާރާތެކެވެ. މީހުން ސަލާމަތް ކުރުމުގެ އޮޕަރޭޝަނަށް ގިނަ ގޮންޖެހުންތަކެއް ވަނީ ކުރިމަތިވެފަ އެވެ.
އެގޮތުން ޖާގަ ނެތުމުން ބޭނުންވާ އުޅަނދާއި އެހެނިހެން އިކުއިޕްމަންޓް ކައިރި ނުކުރެވުމާއި، ޖެހިގެން ހުރި އިމާރާތްތަކަށް ގެއްލުންވެ، ބިމާ ހަމަވުމުގެ ބިރު އެބަ އޮތެވެ.
