ބެއިޖިން، ޗައިނާ (އެޕްރީލް 30) - ޗައިނާގައި ވެއްޓުނު އިމާރާތެއްގެ ދަށުގައި 18 މީހުން ތާށިވެ، ގިނަ ބަޔަކު ގެއްލިގެން ހޯދަމުން އެބަ ދެ އެވެ.
ހުނާން ޕްރޮވިންސްގެ ޗަންޝާ ސިޓީއިން ވެއްޓުނު އިމާރާތަކީ ހޮޓަލަކާއި، އެޕާޓްމަންޓްތަކާއި ސިނަމާއެއް ހިންގާ އިމާރާތެކެވެ.
ޗަންގްޝާގެ މޭޔަރު ނޫސްވެރިންނަށް ވިދާޅުވީ 18 މީހުން އިމާރާތުގެ ދަށުގައި ތާށިވެފައިވާ އިރު، އިތުރު 39 މީހުންގެ ހަބަރެއް ނުވާ ކަމަށެވެ.
އެ 39 މީހުން ވެސް ވަނީ އިމާރާތުގެ ދަށުވެފައިވާ ކަމެއް ސާފެއް ނޫނެވެ. ނަމަވެސް އެ މީހުން ހޯދަމުންދާ ކަމަށް މޭޔަރު ވިދާޅުވި އެވެ.
މަރުވި މީހުންގެ އަދަދު މިހާތަނަށް ހާމަކޮށްފައި ނުވާ އިރު، ސިޓީގެ ކަމާ ބެހޭ އިދާރާތަކުން ބުނީ ހޮނިހިރު ދުވަހުގެ ރޭ އިމާރާތުގެ ދަށުން ފަސް މީހުން ސަލާމަތް ކުރެވުނު ކަމަށެވެ.
ދައުލަތުގެ މީޑިއާއިން ދެއްކި މަންޒަރުތަކުން ފެންނަނީ އަލިފާން ނިއްވާ ރެސްކިއު ޓީމުގެ މެމްބަރުން، ކޮންނަ ބޯޓެއްގެ އެހީގައި އިމާރާތުގެ ކޮންކްރީޓް ދުރަށް ޖައްސާ ތަނެވެ.
އިމާރާތް ވެއްޓުނު ސަބަބު ސާފު ނުވާ އިރު، ބައެއް ރިޕޯޓުތައް ބުނާ ގޮތުން އިމާރާތުގެ ފައުންޑޭޝަނަށް ހިފެހެއްޓޭ ވަރަށް ލޯޑު ބޮޑުވި އެވެ. އެއީ އަށް ފަންގިފިލާގެ އިމާރާތެކެވެ.
"އިމާރާތުގައި އުޅުނު މީހުން އެ ތަނުގެ ސްޓްރަކްޗާއަށް އެކި ވަރުގެ ބަދަލުތައް ގެނައި،" ދައުލަތުގެ ސީސީޓީވީން ބުންޏެވެ.
އިމާރާތް ވެއްޓުނު ސަބަބާ ގުޅޭ ތަހުގީގެއް ކުރަމުންދާ އިރު، ރައީސް ޝީ ޖިންޕިން ގޮވާލެއްވީ އިމާރާތުގެ ދަށުގައި ތާށިވި އެންމެން ސަލާމަތް ކުރެވޭނެ ގޮތަކަށް މަސައްކަތް ކުރިއަށް ގެންދިޔުމަށެވެ.
މިދިޔަ ޖެނުއަރީ މަހު ޗޮންގިންގްގައި ގޭސް ލީކުވެ ހިނގި ގޮވުމެއްގެ ސަބަބުން، އިމާރާތެއް ވެއްޓި ގިނަ އަދަދެއްގެ ބަޔަކު މަރުވި އެވެ.
އޭގެ އިތުރުން ޖޫން 2021 ގައި ޝިޔާން ސިޓީގައި އާއްމުން ދިރިއުޅޭ އިމާރާތްތައް ހުންނަ ކޮމްޕައުންޑެއްގައި ގޭސް ލީކުވެ ހިނގި ގޮވުމެއްގައި 25 މީހުން މަރުވި އެވެ. ހަމަ އެ މަހު މާޝަލް އާޓްސް ސްކޫލެއްގައި އަލިފާން ރޯވެ 18 މީހުން މަރުވެ ގިނަ ބަޔަކަށް އަނިޔާވި އެވެ.
