އިންޑިއާގައި އާދަޔާ ހިލާފަށް ހޫނުގަދަވާނެ ކަމަށް ބެލެވޭތީ މޫސުމާ ބެހޭ ޑިޕާޓްމަންޓުން އެލާޓް ނެރެފި އެވެ.
"ގައުމުގެ އެކި ހިސާބުތަކުގައި ފިނިހޫނުމިން ވަރަށް ބޮޑަށް މަތިވަމުން އެބަ ދޭ. މި އަހަރު މިކަން މި ކުރިމަތި ވަނީ އެހެން އަހަރުތަކަށް ވުރެ މާ އަވަހަށް،" ބޮޑު ވަޒީރު ނަރެންދްރަ މޯދީ މިދިޔަ ބުދަ ދުވަހު ސްޓޭޓްތަކުގެ ޗީފް މިނިސްޓަރުންނަށް ވިދާޅުވި އެވެ.
އިންޑިއާ މީޓިއޮރޮލޮޖިކަލް ޑިޕާޓްމަންޓް (އައިއެމްޑީ) އިން ލަފާކުރަނީ ހުޅަނގު އުތުރުރާއި މެދުތެރޭ އިންޑިއާގެ ހިސާބުތަކަށް މި ހަފްތާގެ ތެރޭގައި ފިނިހޫނުމިން 4-2 ޑިގްރީ ސެލްސިއަސްއިން މަތިވާނެ ކަމަށެވެ. އޭގެ ފަހުން މާ ބޮޑު ބަދަލެއް އަންނާނެ ކަމަށް ލަފައެއް ނުކުރެވެ އެވެ.
ކޮންމެ އަހަރެއްގެ ވެސް މެއި އަދި ޖޫން މަހު އާދަޔާ ހިލާފަށް ހޫނުގަދަވުމުގެ މައްސަލަ ނުވަތަ ހީޓްވޭވްސް އިންޑިއާއަށް އާދެ އެވެ. ނަމަވެސް މި އަހަރު އިންޑިއާގައި ހޫނު މޫސުން ފެށީ އެހެން އަހަރުތަކަށް ވުރެ އަވަހަށެވެ. އެގޮތުން މާޗް މަހުން ފެށިގެން ފިނިހޫނުމިން މަތިވާން ފެށި އެވެ.
މި އަހަރުގެ މާޗް މަހު އެވްރެޖް ފިނިހޫނުމިން 122 އަހަރުގެ ތެރޭގައި މަތި ނުވާ މިންވަރަށް މަތިވި އެވެ. ހީޓްވޭވްސް ފަށަން އުޅޭކަމުގެ ނިޝާންތައް ވެސް އެ މަހު ފާހަގަވާން ފެށި އެވެ.
އައިއެމްޑީގެ އިސް ސައިންޓިސްޓް ނަރޭޝް ކުމާރް ވިދާޅުވީ މިހާރު ހީޓްވޭވްސް ކުރިމަތިވެގެން އުޅެނީ އިންޑިއާ ސަރަހައްދުގެ އެޓްމޮސްފެރިކް ފެކްޓާޒްއާ ހެދި ކަމަށެވެ.
އެގޮތުން އިންޑިއާގެ ހުޅަނގުން، މެޑިޓެރޭނިއަންއާ ދިމާލުން އުފެދޭ ތޫފާންތައް ބަލިކަށިވުމުން، ހޫނު މޫސުން ފެށުމުގެ ކުރިން އިންޑިއާގެ ހުޅަނގު އުތުރާއި މެދުތެރެއަށް ވާރޭވެހުން މަދުވި އެވެ.
ދަނޑުވެރިން ބުނީ ކުއްލިއަކަށް ހޫނުމިން މަތިވުމުން، ދަނޑުވެރިކަމަށް އަސަރު ކުރާނެ ކަމަށެވެ. ޔޫކްރެއިންގެ ހަނގުރާމައާ ހެދި ކާބޯތަކެތީގެ ސަޕްލައިއަށް ބުރޫ އަރާފައި ވަނިކޮށް، އިންޑިއާގެ ދަނޑުވެރިކަމަށް އަސަރު ކުރުމުން ކާބޯތަކެތީގެ އަގު އިތުރަށް އުފުލޭނެ ކަމަށް ބެލެވެ އެވެ.
އޭގެ އިތުރުން މާ ބޮޑަށް ހޫނުވާތީ ކަރަންޓަށް ޑިމާންޑް ބޮޑުވެ، ބައެއް ސްޓޭޓްތަކުން ކަރަންޓު ކެނޑުމުގެ މައްސަލަ ގިނައިން ދިމާވާން ފެށި އެވެ. އިންޑިއާގައި ކަރަންޓް އުފައްދަން ބޭނުން ކުރާ ކޯލް ނުވަތަ ބޯޓުދެލީގެ ދަތިކަން ކުރިމަތިވުމުގެ ބިރު ވެސް އެބަ އޮތެވެ.
ބޮޑު ވަޒީރު މޯދީ ވަނީ ޖަންގަލިތަކުގައި އަލިފާން ރޯވުމުގެ ފުރުސަތު އޮތް ކަމަށް ފާހަގަކުރައްވައި، އިދާރާތަކުން ތައްޔާރަށް ތިބުމަށް އަންގަވާފަ އެވެ.
