ލުބްނާނުން އާ ޕާސްޕޯޓުގެ ސްޓޮކް ހުސްވެ، ޕާސްޕޯޓް އާ ކުރުމުގެ ހިދުމަތް މެދުކަނޑާލައިފި އެވެ.
ލުބްނާންގައި ޕާސްޕޯޓް ދޫކުރުމުގެ ހިދުމަތް ދޭ ޖެނެރަލް ސެކިއުރިޓީ އިދާރާއިން ބުނީ 2020 ވަނަ އަހަރުން ފެށިގެން ޕާސްޕޯޓް އާ ކުރަން އެދޭ މިންވަރު 10 ގުނަ އިތުރުވެފައިވާ ކަމަށެވެ.
އޭގެ ސަބަބުން ޕާސްޕޯޓް ދޫކުރާ ސެންޓަރުތަކަށް ޕްރެޝަރު ބޮޑުވެ، އާ ޕާސްޕޯޓްގެ ސްޓޮކް ހުސްވެފައިވާ ކަމަށް އެ އިދާރާއިން ބުންޏެވެ.
ލުބްނާނަށް މީގެ ކުރިން ކުރިމަތި ނުވާ ވަރުގެ ބޮޑު މާލީ ކާރިސާއެއް މިހާރު ކުރިމަތިވެފައިވާ އިރު، ގިނަ އަދަދެއްގެ މީހުން ދަނީ ގައުމު ދޫކޮށް ދާން މަސައްކަތް ކުރަމުންނެވެ.
ޕާސްޕޯޓްގެ ސްޓޮކް ހުސްވެފައިވާ އިރު، އެކަމަށް ބޭނުންވާ ފައިސާ އަދިވެސް ހަމަޖެހިފައެއް ނުވެ އެވެ. ނަމަވެސް ޖެނެރަލް ސެކިއުރިޓީއިން ބުނީ މިހާތަނަށް އެޕޮއިންޓްމަންޓް ކަށަވަރުވެފައިވާ އެންމެންނަށް ޕާސްޕޯޓް ލިބޭނެ ކަމަށެވެ.
ޕާސްޕޯޓް ދޫކުރުމުގެ ހިދުމަތް އަލުން ފެށޭނީ، ޕާސްޕޯޓްގެ ސްޓޮކް އާ ކުރުމުގެ މަސައްކަތް ހަވާލުކޮށްފައިވާ ކުންފުންޏަށް ފައިސާ ދެއްކުމުންނެވެ. ނަމަވެސް ފައިސާ ދެއްކޭނެ ދުވަހެއް ނޭނގޭތީ، ހިދުމަތް އަލުން ފެށޭނެ ދުވަހެއް ވެސް ނޭނގޭ ކަމަށް ޖެނެރަލް ސެކިއުރިޓީން ބުނެ އެވެ.
މި މަހު ޝާއިއު ކުރި އަރަބް ބެރޯމީޓާ ސާވޭއެއްގައިވާ ގޮތުން ލުބްނާންގެ އާބާދީގެ 50 ޕަސެންޓު މީހުން މަސައްކަތް ކުރަނީ ގައުމު ދޫކޮށް ދިޔުމަށެވެ.
