ޔޫތު މިނިސްޓްރީން ތ. ތިމަރަފުށީގައި ތަރައްގީކުރި ފުޓްސަލް ދަނޑަށް ރޭގެ ވަގުތެއްގައި ބަޔަކު ގެއްލުންތަކެއް ދީފި އެވެ.
ތިމަރަފުށި ކައުންސިލްގެ މެމްބަރަކު "އަދަދު" އަށް މިއަދު ވިދާޅުވީ ރޭގެ ވަގުތެއްގައި ދަނޑުގެ ވަށައިގެން ޖަހާފައިވާ ފެންސް ހަލާކުކޮށްގެން، ދަނޑުތެރެއަށް ވަދެ، ޓާފުން ދެ ފޫޓުގެ ބޮޑު މިނުގެ 10 ވަރަކަށް ތަން ކޮނެގެން ނަގާފައިވާ ކަމަށެވެ. އަދި ދަނޑުގެ ގޯލުގެ ދާގަނޑު ވެސް ކަފާލާފައިވާކަމަށް އޭނާ ވިދާޅުވި އެވެ.
"އެ މައްސަލަ މިހާރު ފުލުހުންގެ ސަމާލުކަމަށް ވެސް ގެނެސް، އެކަން ދަނީ ބަލަމުން. އެ ސަރަހައްދުން ވަނީ ވަޅިއެއް ވެސް ހޯދާފަ. އެކަން ކުރިކަމަށް ބެލެވޭ ބަޔަކު އަދި ނޭނގެ އެހެން ބުނާކަށް،" އެ ކައުންސިލް މެމްބަރު ވިދާޅުވި އެވެ.
އޭނާ ތުހުމަތުކުރެއްވި ގޮތުގައި އެއީ ސިޔާސީ ގޮތުން ހުރި ހިޔާލުތަފާތުވުންތަކަކާއި ދަނޑުގެ މަސައްކަތް ލަސްވެގެން ބަޔަކު އައި ރުޅީގައި ކޮށްފައިވާ ކަމެކެވެ. އެއީ ރަށު ކައުންސިލާ ދޭތެރޭ އޮތް ހިތްނުތަނަވަސްކަމުގެ ސަބަބުންނާއި ކައުންސިލުން ރައްޔިތުންގެ މަޝްވަރާއާ ނުލާ ކަންކަންކުރާކަމަށް ދައްކަން ބަޔަކު ކުރި ކަމެއް ކަމަށް ވެސް އޭނާ ތުހުމަތުކުރެއްވި އެވެ.
ތިމަރަފުށި ދަނޑަށް ބަޔަކު ގެއްލުންދީފައި. ފޮޓޯ: އަހުމަދު މަހުލޫފް
ނޫހުގައި ނަން ނުޖަހާ ގޮތަށް ވާހަކަދެެއްކެވި އެ ކައުންސިލަރު ވިދާޅުވީ، ދަނޑުގެ މަސައްކަތް ނިމިގެން އެ ދަނޑާ ކައުންސިލުން ހަވާލުވުމަށް ޔޫތު މިނިސްޓްރީން މިދިޔަ މަސްތެރޭ ކައުންސިލަށް ސިޓީއެއް ފޮނުވާފައިވާ ކަމަށެވެ. ނަމަވެސް ކައުންސިލުން ދަނޑާއި ހަވާލުނުވެ މަޑުކުރީ ދަނޑުގެ ބައެއް މަސައްކަތްތައް ނުނިމޭކަމަށް ފެންނާތީވެކަމަށް އޭނާ ވިދާޅުވި އެވެ،
"ދަނޑުގެ ޕޭވްމަންޓު ސަރަހައްދުގަ އެބަ ހުރި އަދިވެސް ގާ ނުޖަހާ ގަސް ހެދިފަ ހުރި ބައެއް ތަންތަން. އެކަހަލަ ބައެއް ކަންކަން ހުރީމަ ކޮންޓްރެކްޓަރުން ކައިރި އެހީމަ އެމީހުން ބުނީ ތިމަންނަމެންނާ ހަވާލުކުރި މަސައްކަތް ނިމިފައޭ އޮތީ، އެއީ ތިމަންނަމެންނާ ބެހޭ ކަމެއް ނޫން،" އޭނާ ވިދާޅުވި އެވެ.
ދަނޑުގެ މަސައްކަތް ނިމުމާއެކު ދަނޑު ސާފުކޮށް ބަލަހައްޓަން އެރަށުގެ އާ ރޫހު ޖަމިއްޔާއާ ވަގުތީކޮށް ހަވާލުކޮށްފައިވާކަމަށް އެ މެމްބަރު ވިދާޅުވި އެވެ. އެ ޖަމިއްޔާއިން އެ މަސައްކަތް އިއްޔެ ނޫން ކުރީ ދުވަހު ކުރުމަށްފަހު، އިއްޔެ ސާފުކުރަން އައިއިރު، ދަނޑަށް ގެއްލުންދީފައިވާކަމަށް އޭނާ ވިދާޅުވި އެވެ،
"އީދު ދުވަހު ރަށުން ހޮވާލެވޭ ޓީމަކާ ޖަމިއްޔާތަކާ މެޗެއް ކުޅޭ ގޮތަށް ހަމަޖެހިފަ ވެސް އޮތީ. ވަރަށް ދަށު ދަރަޖައިގެ އަމަލެއް މިއީ،" އޭނާ ވިދާޅުވި އެވެ.
ތިމަރަފުށިގައި ތަރައްގީކުރި ދަނޑަކީ ޑޮމެސްޓިކް ބަޖެޓުން 236،952ރ. ހަރަދުކޮށްގެން ސަރުކާރުން އެޅި ދަނޑެކެވެ. ދަނޑަށް ދިން ގެއްލުންތަކާއި ގުޅިގެން ޔޫތު މިނިސްޓަރު އަހުމަދު މަހުލޫފް ވަނީ އެފަދަ އަމަލުތަކުން ދެރަ ލިބެނީ ހަމަ ރައްޔިތުންނަށްކަމަށް ވިދާޅުވި ކޮންމެ ސަބަބަކާހުރެ ވެސް އެފަދަ ފިނޑިއަމަލުތަކުން ދުރުވުމަށް ގޮވާލައްވައިފަ އެވެ.
