އަންނަ މަހު 9-11 އަށް މާލޭގައި ކުރިއަށްގެންދާ ސައުތު އޭޝިއަން ޖޫނިއާ އެންޑް ކެޑޭޓް ޓޭބަލް ޓެނިސް ޗެމްޕިއަންޝިޕް ރާއްޖޭގެ ގައުމީ ޖޫނިއާ ޓޭބަލް ޓެނިސް ޓީމުން ބޭނުންކުރާނެ ޖާޒީ އިފްތިތާހުކުރައްވައި، މުބާރާތުގައި ވާދަކުރައްވާ ޓީމަށް ރައީސް އިބްރާހިމް މުހައްމަދު ސޯލިހު ހިތްވަރު ދެއްވައިފި އެވެ.
ސާކުގެ 6 ގައުމަކުން 85 އެތްލީޓުން ވާދަކުރާ ސަރަހައްދީ ޖޫނިއާ މުބާރާތަށް ގައުމީ ޓީމް ތައްޔާރުވަމުން އަންނަނީ މެޑަލް ހޯދުމަށް އަމާޒުގަ އެވެ. ދުރާލާ ފަރިތަކުރުންތައް ޓީމުން މާލޭގައި ކުރަމުން އައިއިރު، ޓީމާ ވަކިން ތަމްރީން ހަދަމުން ދިޔަ ފާތިމަތު ދީމާ އަލީ ވެސް ވަނީ އިއްޔެ ގައުމީ ޓީމާ ގުޅިފަ އެވެ.
މި މުބާރާތަށް ހާއްސަކޮށް ތައްޔާރުކުރި ގައުމީ ޓީމުގެ ޖާޒީ ރަސްމީކޮށް ދައްކާލާފައިވަނީ ރައީސުލްޖުމްހޫރިއްޔާގެ އޮފީހުގައި އޮތް ހާއްސަ ބައްދަލުވުމެއްގަ އެވެ. ގައުމީ ޖޫނިއާ ޓީމުގެ ކުޅުންތެރިންނާއި، ކޯޗު އަދި އެސޯސިއޭޝަންގެ އޮފިޝަލުންގެ އިތުރުން ކުޅިވަރާ ބެހޭ ވަޒީރު އަހުމަދު މަހުލޫފު ބައިވެރިވި މި ބައްދަލުވުމުގައި ގައުމީ ޓީމުގެ ފަރާތުން ވަނީ ރައީސް ސޯލިހަށް ގައުމީ ޓީމުގެ ޖާޒީ ހަދިޔާ ކުރައްވައިފަ އެވެ. ރައީސް ވަނީ މުބާރާތުގައި ފުރިހަމަ ކާމިޔާބެއް ހޯދުމަށް ޓީމަށް ހިތްވަރު ދެއްވައިފަ އެވެ.
ސައުތު އޭޝިއާގެ ޖޫނިއާ މުބާރާތުގައި ވާދަކުރާ ގައުމީ ޓީޓީ ޓީމުގެ ކުޅުންތެރިން ބޭނުންކުރާ ޖޯޒީ ރައީސް އިބްރާހިމް މުހައްމަދު ސޯލިހު އަށް ހަދިޔާކުރައްވަނީ.-- ފޮޓޯ: ރައީސް އޮފީސް
އަލަށް ތައްޔާރުކުރެވުނު ޖާޒީގެ ޑިޒައިންގައި ދިވެހި އަތްތެރިކަމުގެ އެންމެ މުހިންމު އެއް ހުނަރުކަމަށްވާ ލިޔެލާ ޖެހުމުގެ ފަރުމާއެއް ހިމަނާފައި ވާއިރު، ބޭނުންކޮށްްފައިވަނީ ގައުމީ ދިދައިގެ ތިން ކުލަ ކަމަށްވާ ފެއްސާއި ރަތާއި ހުދެވެ.
މިއީ ބައިނަލްއަގްވާމީ މުބާރާތަކަށް ހާއްސަކޮށް ގައުމީ ޓޭބަލް ޓެނިސް ޓީމަށް ހާއްސަކޮށް ޖާޒީއެއް ތައްޔާރުކުރެވުނު ފުރަތަމަ ފަހަރެވެ.
ރައީސް ވިދާޅުވީ ޓީޓީ އަކީ ރާއްޖޭގައި އިތުރަށް ކުރިއެރުވިދާނެ ކުޅިވަރެއް ކަމަށެވެ. އަދި ޓީޓީ ކުރިއެރުވުމަށް ބޭނުންވާ ފުރިހަމަ އެއްބާރުލުން ސަރުކާރުގެ ފަރާތުން ލިބޭނެ ކަމުގެ ފުރިހަމަ ޔަގީންކަން ރައީސް ވަނީ ދެއްވައިފަ އެވެ.
ރާއްޖޭގެ ޓީޓީން 2019 ވަނަ އަހަރުގެ އިންޑިއަން އޯޝަން އައިލެންޑް ގޭމްސް (އައިއޯއައިޖީ)ގައި ތާރީހީ މެޑަލްތައް ހޯދި މެޗުތައް ބައްލަވައިލެއްވުމަށް ރައީސް ސޯލިހު އެ ވަގުތު މެޗުތައް ކުުޅުނު މޮރިޝަސްގެ އިންޑޯ ކޯޓުގައި ހާޒިރުވެވަޑައިގެން ހުންނެވި އެވެ.
ޓީޓީ ޓީމުގެ ކުޅުންތެރިންނާއި އޮފިޝަލުން އަދި ޓީޓީ އެސޯސިއޭޝަންގެ އިސްވެރިންނާއި ރައީސް ސޯލިހު އަދި މިނިސްޓަރު މަހުލޫފް ފޮޓޯ އަކަށް ހުއްޓިވަޑައިގެން.-- ފޮޓޯ: ރައީސް އޮފީސް
ޓީޓީ ޓީމުގެ ޓްރެއިނިން ތަކުގައި ކްރޮއޭޝިއާގެ ދެ ކުޅުންތެރިއަކާއި ކޯޗެއް އަންނަނީ ބައިވެރިވަމުންނެވެ. އަދި މުބާރާތުން ރަނގަޅު ކާމިޔާބީތަކެއް ހޯދުމަށް ގައުމީ ޓީމަށް ހިތްވަރުދީ ސަޕޯޓު ދިނުމަށް ގިނަ ބަޔަކު ޒުވާނުންގެ މަރުކަޒުގެ އިންޑޯ ހޯލަށް އައުމަށް ކުޅިވަރާ ބެހޭ ވުޒާރާއިންނާއި މުބާރާތުގައި ވާދަކުރާ ރާއްޖޭގެ ގައުމީ ޓީމުން ވެސް އިލްތިމާސްކުރެ އެވެ.
މުބާރާތުގެ މެޗުތައް ބަލަން ޒުވާނުންގެ މަރުކަޒު އެތެރެ ކޯޓަށް ގިނަ ސަޕޯޓަރުން ވެއްދުމުގެ ގޮތުން ހަރަކާތްތައް ރޭވުމަށް ޓީޓީގެ އިސް އޮފިޝަލުންނާއި ޔޫތު މިނިސްޓްރީން އަންނަނީ ސަރުކާރުގެ އެކި މިނިސްޓްރީތަކުގެ ރެކްރިއޭޝަން ކްލަބްތަކާއި ސަރުކާރު ހިއްސާވާ ކުންފުނިތަކާ ބައްދަލުކުރަމުންނެވެ.
