މައުލޫމާތު ހޯދައި ލިބިގަތުމުގެ ހައްގުގެ ދަށުން، "ރައިޓް ޓު އިންފޮމޭޝަން" ނުވަތަ އާރްޓީއައި ފޯމެއް ހުށަހެޅި މީހަކަށް ޖަވާބު ދިނުން ލަސްކުރި އިންޑިއާގެ އިންފޮމޭޝަން އޮފިސަރަކު، އަދަބެއްގެ ގޮތުން 250 ސްކޫލް ދަރިވަރުންނަށް މެންދުރުގެ ކެއުން ދޭން ޖެހިއްޖެ އެވެ.
އުއްތަރް ޕްރަދޭޝްގެ ގާޒީޕޫރް ޑިސްޓްރިކްޓްގެ އިންފޮމޭޝަން އޮފިޝަރު ޗަންދްރިކަ ޕްރަސާދްއަށް އެ އަދަބު ދިނީ އުއްތަރް ޕްރަދޭޝް ސްޓޭޓުގެ އިންފޮމޭޝަން ކޮމިޝަނުންނެވެ.
ޕްރެސް ޓްރަސްޓް އޮފް އިންޑިއާ (ޕީޓީއައި) ނޫހުގައިވާ ގޮތުން ބުޕެންދްރަ ކުމާރް ޕާންޑޭ ނަމަކަށް ކިޔާ މީހަކު އާރްޓީއައި ފޯމު ހުށަހެޅީ ގާޒީޕޫރް ޑިސްޓްރިކްޓުގެ ނޫންރާ އަވަށުގައި ހިންގާ ތަރައްގީގެ މަޝްރޫއަކާ ގުޅޭ މައުލޫމާތު ހޯދުމަށެވެ.
ނަމަވެސް އަވަށުގެ ތަރައްގީއާ ބެހޭ އޮފިސަރާއި އިންފޮމޭޝަން އޮފިސަރު ވަނީ ގާނޫނުގެ ދަށުން ކަނޑައަޅާފައިވާ މުއްދަތުގެ ތެރޭގައި ޖަވާބު ދޭން ފެއިލްވެފަ އެވެ. ދެހާސް ސޯޅަ ވަނަ އަހަރު އަމަލު ކުރަން ފެށި އާރްޓީއައި ގާނޫނުގެ ދަށުން، ފޯމު ހުށަހަޅާތާ 30 ދުވަހުގެ ތެރޭގައި ޖަވާބު ދޭން ޖެހެ އެވެ.
އިންފޮމޭޝަން އޮފިސަރުން ގާނޫނާ ހިލާފުވެއްޖެ ނަމަ، އިސްލާހީ ފިޔަވަޅު އެޅުމުގެ ބާރު އިންފޮމޭޝަން ކޮމިޝަނަށް ލިބެ އެވެ.
ޕާންޑޭ ހުށަހެޅި ފޯމަށް އެއްވެސް ޖަވާބެއް ނުލިބުމުން، އޭނާ ވަނީ ކޮމިޝަނަށް މައްސަލަ ހުށަހަޅާފަ އެވެ. ކޮމިޝަނުން މައްސަލަ ބެލުމަށް ފަހު ނިންމީ ގާނޫނާ ހިލާފުވެފައިވާ ކަމަށެވެ.
"އަޅުގަނޑުމެން އާއްމުކޮށް ދެނީ 25،000 ރުޕީޒް (326 ޑޮލަރު) ގެ ޖޫރިމަނާއެއް،" އިންފޮމޭޝަން ކޮމިޝަނަރު އަޖޭ ކުމާރް އުޕްރެޓީ ވިދާޅުވި އެވެ.
ނަމަވެސް އެއީ އިންފޮމޭޝަން އޮފިސަރު ގަސްތުގައި ކުރި ކަމެއް ނޫން ކަމަށާއި މައްސަަލަ ޖެހުނީ އަވަށުގެ ތަރައްގީއާ ބެހޭ ކުރީގެ އޮފިސަރު ގޯޕާލް ސިންގްގެ ސަބަބުން ކަމަށް އޭނ ާވިދާޅުވި އެވެ. އެހެންވެ، ގޯޕާލް ވަނީ 25،000 ރުޕީޒްއިން ޖޫރިމަނާކޮށްފަ އެވެ.
އިންފޮމޭޝަން އޮފިސަރު އަދަބެއްގެ ގޮތުން 250 ސްކޫލް ދަރިވަރުންނަށް މެންދުރުގެ ކެއުން ދޭން އެންގި އިރު، 25،000 ރުޕީޒްއަށް ވުރެ ހަރަދު އިތުރު ނުކުރުމަށް ވެސް އެންގި އެވެ. އަދި ކުދިންނަށް ކާންދޭ މަންޒަރުގެ ވީޑިއޯ ނެގުމަށް ފަހު ފޮނުވަން އެންގި އެވެ.
