ސިންގަޕޫރު (އެޕްރީލް 27) - ސިކުނޑީގެ ނުކުޅެދުންތެރިކަމެއް ހުރި މެލޭޝިއާގެ މީހެއްގެ މައްޗަށް ސިންގަޕޫރުގައި މަރުގެ ހުކުމް ތަންފީޒްކޮށްފި އެވެ.
ނަގައެންތްރަން ކޭ ދަރްމަލިންގަމް ސިންގަޕޫރުން ހައްޔަރު ކުރީ 2009 ވަނަ އަހަރު، މަސްތުވާތަކެތީގެ ބާވަތެއް ކަމަށްވާ ހެރޮއިން އެތެރެ ކުރަން އުޅެނިކޮށެވެ.
ސިންގަޕޫރަކީ މަސްތުވާތަކެއްޗާ ގުޅޭ ގާނޫނުތައް އެންމެ ހަރުކަށި އެއް ގައުމެވެ. ދަރްމަލިންގަމް މަރަން ހުކުމް ކުރީ 2010 ވަނަ އަހަރު އެވެ.
ނަމަވެސް އޭނާއަކީ ސިކުނޑީގެ ނުކުޅެދުންތެރިކަމެއް ހުރި މީހެއް ކަމަށް ވާތީ، މަރުގެ ހުކުމް އިއްވައި ތަންފީޒު ކުރުން ގޯސް ކަމަށް ބައިނަލްއަގްވާމީ ފަރާތްތަކުން ބުނަން ފެށި އެވެ.
އެގޮތުން އދ. އާއި އީޔޫގެ ފިއްތުންތައް ސިންގަޕޫރަށް ކުރިމަތިވި އެވެ. ދަރްމަލިންގަމް ހުކުމުން ސަލާމަތްވުމަށް ފާއިތުވި 10 އަހަރު ގާނޫނީ ގިނަ މަސައްކަތްތަކެއް ކުރި އެވެ. އަދި ސިންގަޕޫރުގެ ރައީސް މައާފު ދެއްވާ ފަރާތްތަކުގެ ތެރޭގައި ހިމެނުމަށް އެދި ހުށަހެޅި އެވެ.
ހުކުމް ތަންފީޒު ކުރަން އެންމެ ފުރަތަމަ މަސައްކަތް ކުރީ މިދިޔަ ނޮވެމްބަރު މަހު އެވެ. ނަމަވެސް ގާނޫނީ މަސައްކަތްތަކެއް ކުރަމުން ދާތީ ފަސްކުރަން ޖެހުނެވެ.
ނަމަވެސް އުމުރުން 34 އަހަރުގެ ދަރްމަނިލްގަމްގެ އާއިލާއިން ބުނީ ބުދަ ދުވަހުގެ ހެނދުނު އޭނާގެ މައްޗަށް މަރުގެ ހުކުމް ތަންފީޒުކޮށްފައިވާ ކަމަށެވެ.
އުމުރުން 21 އަހަރުގައި ދަރްމަލިންގަމް ސިންގަޕޫރުން ހައްޔަރު ކުރީ 43 ގްރާމްގެ ހެރޮއިންއާ އެކު އެވެ. އޭނާގެ އާއިލާއިން ބުނާ ގޮތުގައި އޭނާގެ އައިކިއު ނުވަތަ ވިސްނުމުގެ ގާބިލްކަން ހުންނަނީ 69 ގަ އެވެ. އެއީ ސިކުނޑީގެ ނުކުޅެދުންތެރިކަމެއް ހުރި ކަމަށް ބެލޭ މިންވަރެކެވެ. އޭގެ އިތުރުން އެއީ ބަޔަކު އޭނާ ލައްވާ ކުރުވި ކަމެއްގެ ގޮތުގައި ވެސް އާއިލާއިން ސިފަކުރެ އެވެ.
ނަމަވެސް ސިންގަޕޫރުގެ ކަމާ ބެހޭ އިދާރާތަކުން ބުނީ ކުށް ކުރި އިރު، މި ކުރެވެނީ ކޮން ކަމެއްކަން އޭނާއަށް ސާފުވާ ކަމަށެވެ.
ސިންގަޕޫރުގައި ދެ އަހަރުގެ މެދުކެނޑުމަކަށް ފަހު މަރުގެ ހުކުމް ތަންފީޒު ކުރަން ފެށީ މިދިޔަ މަހު އެވެ. އެގޮތުން އެންމެ ފުރަތަމަ މަރުގެ ހުކުމް ތަންފީޒު ކުރީ ވެސް މަސްތުވާތަކެތި އެތެރެ ކުރި މީހަކަށެވެ.
