ޔެންގޯން، މިޔަންމާ (އެޕްރީލް 27) - މިޔަންމާގެ ކުރީގެ ލީޑަރު އަންގް ސަން ސޫކީގެ މައްޗަށް ކޮރަޕްޝަންގެ ކުށް ސާބިތުވެ، ފަސް އަހަރުގެ ޖަލު ހުކުމެއް އިއްވައިފި އެވެ.
މިޔަންމާގެ ވެރިކަމުން ސޫކީ ދުރުކުރީ 2021 ވަނަ އަހަރުގެ ފެބްރުއަރީ މަހު ހިންގީ އަސްކަރީ ބަގާވާތަކުންނެވެ. އޭގެ ފަހުން އެކަމަނާ ހުންނަވަނީ ބަންދުކޮށްފަ އެވެ.
ސޫކީއާ ދެކޮޅަށް ގިނަ ޖިނާއީ ދައުވާތަކެއް އުފުލާފައިވާ އިރު، އެ ހުރިހާ ދައުވާއެއް ސާބިތުވެއްޖެ ނަމަ 100 އަހަރަށް ވުރެ ދިގު ޖަލު ހުކުމެއް އަންނާނެ އެވެ.
މިދިޔަ ބުރާސްފަތި ދުވަހު ސާބިތުވި ކޮރަޕްޝަން މައްސަލައިގައި އެކަމަނާއަށް ތުހުމަތު ކުރަނީ ރިޝްވަތުގެ ގޮތުގައި 600،000 އެމެރިކާ ޑޮލަރު އަދި ރަން ނެންގެވި ކަމަށެވެ.
ކޮރަޕްޝަނާއި، މަކަރާއި ހީލަތް ހެދުމާއި، ދައުލަތުގެ ސިއްރުތަކާ ބެހޭ ގާނޫނާ ހިލާފުވުން ފަދަ ގިނަ މައްސަލަތަކެއްގެ ޝަރީއަތް އަދިވެސް ކުރިއަށް އެބަ އޮތެވެ.
އުމުރުން 76 އަހަރުގެ ސޫކީއަށް މީގެ ކުރިން ސާބިތުވީ ސިފައިންނާ ދެކޮޅަށް ރުޅިވެރިކަން އުފެއްދުމާއި، ކޮވިޑްގެ އުސޫލާ ހިލާފުވުމާއި، ޓެލެކޮމިއުނިކޭޝަން ގާނޫނާ ހިލާފުވި ކަމަށެވެ. އެ މައްސަލަތަކުގައި އިއްވީ ހަ އަހަރުގެ ޖަލު ހުކުމެކެވެ.
އަސްކަރިއްޔާއިން ގާއިމްކުރި ހާއްސަ ކޯޓެއްގައި ކުރިއަށް ގެންދާ އަޑުއެހުންތަކަށް ނޫސްވެރިންނަށް ނުވަދެވެ އެވެ. އަދި ސޫކީގެ ވަކީލުން ނޫސްވެރިންނަށް މައުލޫމާތު ދިނުން ވެސް މަނަ އެވެ.
މިޔަންމާގައި ހިންގި ބަގާވާތާ ދެކޮޅަށް ރައްޔިތުން ނުކުމެ އަޑު އުފުލަން ފެށުމުން މިހާތަނަށް 1،700 އަށް ވުރެ ގިނަ މީހުން މަރުވެ، 13،000 އަށް ވުރެ ގިނަ މީހުން ހައްޔަރުކޮށްފައިވެ އެވެ.
