ޕާކިސްތާނުގެ ދެކުނުގައި އޮންނަ ކަރާޗީ ސިޓީގައި މީހަކު އަމިއްލައަށް މަރުވެގެން ދިން ހަމަލާއެއްގައި ޗައިނާ ބަސް ކިޔަވައިދޭ ތިން ޓީޗަރުންނާއި ޕާކިސްތާނުގެ ޑްރައިވަރަކު މަރުވެއްޖެ އެވެ.
ބޮން ގޮއްވާލާފައި ވަނީ ކަރާޗީ ޔުނިވާސިޓީގެ ކޮންފިޔުކިޔަސް އިންސްޓިޓިއުޓް ކައިރިން މިނީ ބަހެއްގައި ދަތުރު ކުރަމުން ދަނިކޮށެވެ. އެ ހަމަލާގައި އިތުރު ހަތަރު މީހުންނަށް އަނިޔާވި އެވެ.
ޕާކިސްތާން ސަރުކާރާ ވަކިވެގެން އުޅޭ ބަލޮޗް ލިބެރޭޝަން އާމީ (ބީއެލްއޭ) އިން ހަމަލާގެ ޒިންމާ ނެގުމަށް ފަހު ބުނީ އަމިއްލައަށް މަރުވެގެން ބޮން ގޮއްވާލީ އަންހެނެއް ކަމަށެވެ. ޕާކިސްތާނުގެ ނޫސްތަކުން ބުނާ ގޮތުގައި އެއީ ކަރާޗީ ޔުނިވާސިޓީގެ ދަރިވަރެކެވެ.
ބީއެލްއޭއަކީ ޕާކިސްތާނުގައި ޗައިނާއިން އިންވެސްޓް ކުރުމާ ދެކޮޅު ބަޔެކެވެ. އެ މީހުން ދެކޭ ގޮތުގައި ޗައިނާގެ އިންވެސްޓްމަންޓުތަކުން އާއްމުންނަށް އެއްވެސް ފައިދާއެއް ނުކުރެ އެވެ.
ރިޕޯޓުތައް ބުނާ ގޮތުން މިއީ ބީއެލްއޭގެ އަންހެން ޓެރަރިސްޓަކު އަމިއްލައަށް މަރުވެގެން ދިން ފުރަތަމަ ހަމަލާ އެވެ. ބީއެލްއޭގެ އިތުރުން ޕާކިސްތާނުގެ ތާލިބާނުން ވެސް ޗައިނާ ރައްޔިތުންނަށް އަމާޒުކޮށް ހަމަލާ ދެ އެވެ.
ޕާކިސްތާނުގެ އެކި ހިސާބުތަކުގައި ބިޔަ އިންފްރާސްޓްރަކްޗާ މަޝްރޫއުތައް ހިންގުމުގައި ޗައިނާއިން ބައިވެރިވެ އެވެ. ގުދުރަތީ ވަސީލަތްތައް މުއްސަނދި ބަލޮޗިސްތާން ޕްރޮވިންސްގައި ވަކިން ހާއްސަކޮށް ޗައިނާގެ އިންވެސްޓްމަންޓް ގިނަ އެވެ.
ޕާކިސްތާނުގައި ހުންނަ ޗައިނާ އެމްބަސީން ބުނީ އަންގާރަ ދުވަހުގެ ހަމަލާގައި ޗައިނާގެ ތިން މީހުން މަރުވި ކަމަށެވެ. ޕާކިސްތާން ސަރުކާރުން ވަނީ "ފިނޑި ޓެރަރިސްޓް ހަމަލާ" ކުށްވެރިކޮށްފަ އެވެ.
