އިނގިރޭސިވިލާތުގެ "ޑިޕްލޮމެޓް މެގަޒިން" އިން ހޮވާ އޭޝިއާ ބައްރުގެ އެންމެ މޮޅު ޑިޕްލޮމެޓަކަށް ރާއްޖެއިން އިނގިރޭސިވިލާތަށް ކަނޑައަޅުއްވާފައި ހުންނަވާ ސަފީރު، ޑރ. ފަރަހްނާޒް ފައިސަލް ހޮވިއްޖެ އެވެ.
ކޮންމެ އަހަރަކު ވެސް ބާއްވާ "ޑިޕްލޮމެޓް އެވޯޑްސް" ގައި އޭޝިއާގެ އެންމެ މޮޅު ޑިޕްލޮމެޓުކަން ޑރ. ފަރަހްނާޒް އަށް ލިބިވަޑައިގެންނެވީ އޭޝިއާ އަދި އޯޝޭނިއާގެ ގައުމުތަކުގެ ޑިޕްލޮމެޓުންނާ ވާދަކުރުމަށްފަހު އެވެ.
އޭނާއަށް މި އެވޯޑު ލިބިވަޑައިގަތުމާ ގުޅިގެން ރާއްޖޭގެ ފޮރިން މިނިސްޓަރު އަބްދުﷲ ޝާހިދު ވަނީ މަރުހަބާ ވިދާޅުވެފަ އެވެ.
"ރާއްޖޭގެ މަސްލަހަތު ހިމާޔަތްކޮށް ކުރިއެރުވުމަށް [ފަރަހަނާޒް] ކުރައްވަނީ ފުރިހަމަ މަސައްކަތްތަކެއް،" ޝާހިދު ވިދާޅުވި އެވެ.
ޑރ. ފަރަހްނާޒް އާ މި އެވޯޑު ހަވާލުކޮށްދެއްވީ އިނގިރޭސިވިލާތުގެ ޑިޕްލޮމެޓިކް ކޯގެ މާޝަލް ކަމަށްވާ ވިލިއަމް އެލިސްޓާ ހެރިސަން އެވެ.
މިއީ އިނގިރޭސިވިލާތުގައި ހުންނަވާ ސަފީރުކަމުގެ މަގާމު ޑރ. ފަރަހްނާޒް އަދާކުރައްވާ ދެވަނަ ފަހަރެވެ. މީގެ ކުރިން ވަނީ 2009 އިން 2012 އަށް އެ މަގާމު ފުރުއްވާފަ އެވެ. އެ މަގާމަށް ދެވަނަ ފަހަރަށް އޭނާ އައްޔަނުކުރެއްވީ ރައީސް އިބްރާހިމް މުހައްމަދު ސޯލިހު އެވެ. އެއީ އެޕްރީލް 18، 2019 ގަ އެވެ.
އޭގެ ކުރިން ޑެންމާކް، ފިންލެންޑް، ފްރާންސް، ނޯވޭ، ސްޕެއިން އަދި ސްވިޑްން އަށް ރާއްޖެއިން ކަނޑައަޅާފައި ހުންނަވާ ނޮން-ރެޒިޑެންޓް އެމްބެސެޑަރުގެ މަގާމު ވެސް އޭނާ އަދާކުރެއްވި އެވެ.
މި އެވޯޑު ދިން "ޑިޕްލޮމެޓް މެގަޒިން" އަކީ 1947 އިން ފެށިގެން ނެރެމުން އަންނަ މަޖައްލާއެކެވެ. މިއީ ފޮރިން ސާވިސްގެ ހަބަރާއި ޑިޕްލޮމެޓުންނާ ގުޅޭ ތަފާތު އެކި މައުލޫމާތުތައް ހިމަނައިގެން ނެރޭ މަޖައްލާއެކެވެ.
