ޗައިނާގެ ވެރިރަށް ބެއިޖިންގައި ކޮވިޑް ކޭސްތައް ގިނަ ވާތީ އެއް ފަހަރާ އެތައް މިލިއަން ބަޔަކު ޓެސްޓު ކުރަން ނިންމައިފި އެވެ.
ފާއިތުވި ހަފްތާ ބަންދުގައި ޗާއޯޔާންގް ޑިސްޓްރިކްޓުން 26 މީހުން ޕޮޒިޓިވްވި އެވެ. އެއީ މިހާރު ކުރިމަތިވެގެން އުޅޭ ރާޅުގައި އަދަދުތައް އެންމެ މަތިވި ފަހަރެވެ.
ބެއިޖިންގެ އެންމެ އާބާދީ ބޮޑު އެ ޑިސްޓްރިކްޓުގެ 3.5 މިލިއަން މީހުން ބައްޔަށް ޓެސްޓު ކުރަން މިހާރު ވަނީ ނިންމާފަ އެވެ.
ބެއިޖިން ލޮކްޑައުން ކުރުމުގެ ބިރު އޮތުމުން އެތައް ބަޔަކު ވަނީ ފިހާރަތަކުގެ ބޭރުގައި ކިޔު ހަދައިފަ އެވެ. ސަރުކާރުން ބުނީ ކާބޯތަކެތީގެ ދަތިކަން ކުރިމަތި ނުވާނެ ކަމަށެވެ.
ޑިމާންޑް މަތިވުމުން ފިހާރަތައް ހުޅުވާފައި ހުންނަ ވަގުތު އިތުރުކޮށްފައިވާ އިރު، ޗައިނާގެ ސޯޝަލް މީޑިއާގައި ބައެއް މީހުން ބުނީ ފިހާރަތަކުން މުދާ ހުސްވަމުންދާ ކަމަށެވެ.
ޗައިނާގެ ފިހާރައެއްގައި އޮތް ދިގު ކިޔޫއެއް. -- ފޮޓޯ: ސަޕްލައިޑް
ޗައިނާ ދައުލަތުން ހިންގާ ދަ ގްލޯބަލް ޓައިމްސް ނޫހުން ބުނީ އެއްގަމު މަހާއި، ބިސް އަދި ތަރުކާރީގެ ސަޕްލައި އިތުރު ކުރަން ސަރުކާރުން ކުންފުނިތަކަށް އަންގާފައިވާ ކަމަށެވެ.
ލޮކްޑައުން ކުރުމާއި އެހެން ފިޔަވަޅުތައް އެޅުމާ މެދު ގޮތެއް ނިންމާނީ ޗާއޯޔާންގް ޑިސްޓްރިކްޓުގެ އެންމެން ޓެސްޓު ކުރުމުން ނުކުންނަ ނަތީޖާއަށް ބެލުމަށް ފަހު ކަމަށް އެ ނޫހުގައި ވެ އެވެ.
ޗައިނާގެ ތަޖުރިބާކާރުން ލަފާ ކުރާ ގޮތުގައި ކުރިއަށް އޮތް ދުވަސްތަކުގައި ބެއިޖިންގައި ކޮވިޑް ކޭސްތައް އަދިވެސް އިތުރު ވާނެ އެވެ.
ޗައިނާގެ ޝަންހާއީ ސިޓީ ވެސް 25 މިލިއަން މީހުންނާ އެކު ލޮކްޑައުންކޮށްފައި އޮންނަތާ ގިނަ ދުވަސްތަކެއް ވެއްޖެ އެވެ. މިހާރު ކުރިމަތިވެގެން އުޅޭ ރާޅުގައި އެ ސިޓީއިން 138 މީހުން މަރުވެފައިވާ އިރު، 400،000 އަށް ވުރެ ގިނަ ކޭސް ރިޕޯޓުކޮށްފައިވެ އެވެ.
ޝަންހާއީގެ އިތުރުން ޗައިނާގެ 30 މިލިއަން މީހުންނާ އެކު 20 އަށް ވުރެ ގިނަ ސިޓީ މި ވަގުތު އޮތީ ލޮކްޑައުންކޮށްފަ އެވެ. އެހެން ގައުމުތަކާ ހިލާފަށް ޗައިނާއިން ގެންގުޅެނީ ކޮވިޑް އެއްކޮށް ނައްތާލުމުގެ ސިޔާސަތެކެވެ.
