ފުވައްމުލައް ސިޓީގެ މެޖިސްޓްރޭޓް ކޯޓުގެ އިސް މެޖިސްޓްރޭޓް ހަދީޖާ ލީނާގެ މައްޗަށް ކޯޓުގެ އިދާރީ މަސައްކަތްތަކާއި ގުޅިގެން ހުށަހެޅުނު ސުލޫކީ މައްސަލައެއްގެ ތަހުގީގަށްފަހު އެ މައްސަލަ އޭނާގެ މައްޗަށް ސާބިތުނުވާކަމަށް ޖުޑިޝަލް ސާވިސް ކޮމިޝަން (ޖޭއެސްސީ)އިން ނިންމައިފި އެވެ.
ލީނާގެ މައްޗަށް އެންމެ ފުރަތަމަ އެ މައްސަލަ ހުށަހެޅުނީ އޮކްޓޯބަރު 2019 ގަ އެވެ. އެ މައްސަލައަކީ އޭނާ ކޯޓުގެ އިދާރީ ކަންކަން ހިންގުމުގައި އަދާކުރަންޖެހޭ ޒިންމާތައް އަދާނުކުރާ ކަމަށް ބުނެ ހުށަހެޅުނު މައްސަލައެކެވެ.
އެގޮތުން ލީނާގެ މައްޗަށް ހުށަހެޅުނު މައްސަލައިގައި ވަނީ ކޯޓުގެ އިދާރީ ކަންކަން ހިންގުމުގައި ހަމަޖައްސަން ޖެހޭ ކަންކަން ހަމަޖައްސައި ނުދިނުމާއި، މުވައްޒަފުންނަށް އެކްސެސް ކާޑުތައް ހޯދައިދިނުން ފަދަ ކަންކަމުގައި ޒިންމާ އަދާނުކުރާ ކަމަށް ބުނެފަ އެވެ.
ނަމަވެސް އެ މައްސަލައިގެ ތަހުގީގަށްފަހު ޖޭއެސްސީން ވަނީ ލީނާގެ މައްޗަށް އެ މައްސަލަ ސާބިތުނުވާކަމަށް މިމަހުގެ 17 ވަނަ ދުވަހު އޮތް ކޮމިޝަނުގެ ބައްދަލުވުމެއްގައި ކަނޑައަޅައިފަ އެވެ. ލީނާގެ މައްޗަށް އިދާރީ ކަންކަން ހިންގުމާ ގުޅިގެން މައްސަލަ ހުށަހެޅުނީ، ކޯޓުތަކުގެ އިދާރީ ކަންކަމާއި ހިންގުން، އިސް މެޖިސްޓްރޭޓްގެ ދަށުން ކުރިޔަށް ގެންދިޔުމަށް ހަމަޖެހިފައި އޮތް އިރު އެވެ.
