ކޮވިޑް ފެތުރުން ކޮންޓްރޯލް ކުރުމަށް ލޮކްޑައުން ކޮށްފައިވާ ޗައިނާގެ ޝަންހާއީ ސިޓީގެ ބައެއް އިމާރާތްތަކުގެ ބޭރުގައި، އެއްވެސް އިންޒާރެއް ދިނުމެއް ނެތި، ސަރުކާރުން ފެންސުތަކެއް ޖަހައިފި އެވެ.
ފެހި ކުލައިގެ ފެންސުތައް ޖަހާފައި ވަނީ ގެއިން ބޭރަށް ނުކުތުން މަނާކޮށްފައިވާ މީހުން ދިރިއުޅޭ އިމާރާތްތަކުގެ ބޭރުގަ އެވެ. އެކަން ކުރީ ގެތަކުގައި ދިރިއުޅޭ މީހުންނަށް ނާންގަ އެވެ.
ޝަންހާއީގެ 25 މިލިއަން މީހުން ލޮކްޑައުން ކޮށްފައި ތިބޭތާ މިހާރު ހަފްތާތަކެއް ވެއްޖެ އެވެ. ބަލިމަޑުކަމުގައި މީގެ ކުރިން ބަލި ނުފެތުރޭ ވަރަށް މިހާރު ޝަންހާއީގައި ބަލި ފެތުރިފައިވާ ކަމަށްވެ އެވެ.
ޕީޕީއީ ލައިގެން ތިބި ގިނަ މުވައްޒަފުން އިމާރާތްތަކާއި ބައެއް މަގުތައް ކައިރީގައި ފެހި ކުލައިގެ ފެންސު ޖަހާ މަންޒަރު ފެންނަ ފޮޓޯތައް ޗައިނާގެ ސޯޝަލް މީޑިއާގައި ދަނީ ވަރަށް ހަލުވިކަމާ އެކު ދައުރުވަމުންނެވެ.
ގާތްގަނޑަކަށް ދެ މީޓަރު އުސް ފެންސުތައް ހަރު ކުރީ "ބަންދުކޮށްފައިވާ ސަރަހައްދު"ގެ ގޮތުގައި ކަނޑައެޅި އިމާރާތްތަކުގެ ބޭރުގަ އެވެ. އެއީ އެ އިމާރާތުގައި ދިރިއުޅޭ މަދުވެގެން އެކަކު ކޮވިޑަށް ޕޮޒިޓިވްވުމުންނެވެ.
"ބަންދުކޮށްފައިވާ ސަރަހައްދު" ގައި ދިރިއުޅޭ އެންމެންނަށް ގެއިން ބޭރަށް ނުކުތުން މަނާ އެވެ. ކޮވިޑަށް ނެގެޓިވްވި ނަމަވެސް އެއްވެސް ލުޔެއް ނުލިބެ އެވެ.
ލޮކްޑައުން ކޮށްފައި އޮންނަތާ ހަފްތާތަކެއް ފަހުން ކުއްލިއަކަށް ފެންސުތައް ޖަހަން ފެށީ ކީއްވެ ކަމެއް ސާފެއް ނޫނެވެ.
އެޕްރީލް 23 ވަނަ ދުވަހު ނެރުނު ނޯޓިސްއެއް ސޯޝަލް މީޑިއާގައި ދައުރުވަމުންދާ އިރު، އޭގައި ބުނީ ބައެއް ސަރަހައްދުތަކުގައި "ހަރުކަށި ކަރަންޓީނެއް" ތަންފީޒު ކުރަން ނިންމާފައިވާ ކަމަށެވެ.
ޝަންހާއީގައި އާދީއްތަ ދުވަހު 21،000 ކޭސް ރިޕޯޓު ކުރި އިރު، 39 މީހުން މަރުވި އެވެ. އެއީ ބަލިމަޑުކަމުގެ ތެރޭގައި އެ ސިޓީއިން މިހާތަނަށް އެންމެ ގިނަ މީހުން މަރުވި ދުވަހެވެ.
