ޕާކިސްތާނުން ޕޯލިއޯ ނުފެންނަތާ 15 މަހަށް ފަހު، އެ ގައުމުގެ ހުޅަނގު އުތުރުގެ ހިސާބަކުން އެ ބަލި ޖެހުނު ކުޑަކުއްޖަކު ޕެރެލައިޒްވެއްޖެ އެވެ.
ޕާކިސްތާނުން ޕޯލިއޯ ނައްތާލާ ޕްރޮގްރާމުގައި އިސްކޮށް އުޅުއްވާ ޑރ. ޝާހްޒާދް ބާއިގް ކުރެއްވި ޓްވީޓެއްގައި ވިދާޅުވީ އުތުރު ވަޒިރިސްތާނުގައި 15 މަހުގެ ފިރިހެން ކުއްޖަކަށް ޕޯލިއޯ ޖެހި ޕެރެލައިޒްވެފައިވާ ކަމަށެވެ.
"މިކަމާ ހިތާމަ ކުރާ ހާލު، އިތުރު ހިތްވަރަކާ އެކު މަސައްކަތް ކުރަން ޖެހޭ. މީގެ ސަބަބުން އަޅުގަނޑުމެންގެ އަޒުމް ވަރުގަދަކޮށް، ޕޯލިއޯގެ ސަބަބުން އެއްވެސް ކުއްޖަކު ޕެރެލައިޒް ނުވާނެކަން ކަށަވަރު ކުރަން ޖެހޭ."
ޕޯލިއޯގެ ސަބަބުން ކުޑަކުއްޖަކު ޕެރެލައިޒްވެފައިވާ އިރު، އެންމެ ފަހުން ޕާކިސްތާނުން އެ ބަލި ފެނުނީ 2021 ވަނަ އަހަރުގެ ޖެނުއަރީ މަހު އެވެ.
އެ ބަލި ނައްތާ ނުލެވި މިހާރު އޮތް ހަމައެކަނި ދެ ގައުމަކީ ޕާކިސްތާނާއި އަފްގާނިސްތާނެވެ. އެ ދެ ގައުމުގައި ވެސް ވެކްސިން ޕްރޮގްރާމް ހިންގާ ފަރާތްތަކަށް އަމާޒުކޮށް ވަރަށް ގިނައިން ހަމަލާތައް ދެ އެވެ.
