ސެވިލް، ސްޕެއިން (އޭޕްރީލް 23) - ޕެނަލްޓީ ޖަހައިގެން 5-4 އިން ވެލެންސިއާ ބަލިކޮށް ރެއާލް ބެޓިސް އިން 17 އަހަރަށް ފަހު ކޮޕަ ޑެލް ރޭ (ސްޕެނިޝް ކަޕް)ގެ ތަށި އުފުލާލައިފި އެވެ.
މިރޭގެ ފައިނަލުގައި ފުރިހަމަ ވަގުތު ހަމަވިއިރު، ދެ ޓީމު އޮތީ 1-1 އިން އެއްވަރުވެފަ އެވެ. ނަތީޖާ ނެރެން ޕެނަލްޓީ ޖެހިއިރު، ބެޓިސްގެ ފަސް ޕެނަލްޓީ ވެސް ކާމިޔާބެވެ. އެކަމަކު، ވެލެންސިއާގެ ޔޫނުސް މޫސާ ޖެހި ޕެނަލްޓީ ނާކާމިޔާބުވެ، ބެޓިސް އަށް ތަށި ލިބުނީ އެވެ.
ވެލެންސިއާ އިން ފައިނަލުގެ ޖާގަ ހޯދީ ސެމީގައި އެތުލެޓިކް ބިލްބާއޯ ބަލިކޮށްފަ އެވެ. ބިލްބާއޯ ވަނީ މި ފަހަރުގެ މުބާރާތުން ބާސެލޯނާ އާއި ރެއާލް މެޑްރިޑް ކަޓުވާލައިފަ އެވެ. ބެޓިސް އިން ސެމީގައި ބަލިކުރީ ރަޔޯ ވަޔެކާނޯ އެވެ. މިއީ 2010 ވަނަ އަހަރަށް ފަހު ބާސެލޯނާ އާއި ރެއާލް ނުލައި ކުޅުނު ދެ ވަނަ ކޮޕަ ޑެލް ރޭ ފައިނަލެވެ.
ފައިނަލުގައި މިރޭ ވެލެންސިއާގެ މައްޗަށް ކުރިހޯދައި، ބެޓިސް އިން ކޮޕަ ޑެލް ރޭ މި ހޯދީ އެ ކްލަބް ތާރީހުގައި ތިން ވަނަ ފަހަރަށެވެ. މީގެ ކުރިން ހޯދީ 1977 އާއި 2005 ގަ އެވެ.
ލަ ކަރްޓޫހާ ސްޓޭޑިއަމްގައި މިރޭ ކުޅުނު ފައިނަލްގެ 11 ވަނަ މިނިޓްގައި ބެޓިސް އިން ލީޑުނެގީ ހެކްޓަ ބެޔެރިން ނެގި ހުރަހަކުން ބޯހާ އިގްލީސިއަސް ބޮލުން ޖެހި ގޯލުންނެވެ. ފުރަތަމަ ހާފު ނިމުމުގެ ކުރިން ވެލެންސިއާ އިން އެއްވަރުކުރި އެވެ. މި ގޯލު ޖެހީ އިލައިޝް މޮރީބާ ދިން ބޯޅައަކުން ހޫރޯ ޑޫރޯ އެވެ. ބެޓިސް އަށް ދެ ވަނަ ފަހަރަށް ލީޑުނަގައިދޭން ނަބީލް ފެކީރާއި އިގްލީސިއަސް، ހުއާންމީ އަދި ސާޖިއޯ ކަނަލެސް ޖެހި ބޯޅަތައް ކާމިޔާބެއްނުވި އެވެ.
ބެޓިސްގެ ވިލިއަން ހޯސޭ، ވަކީން، ޔޯސޭ ގުއަޑާޑޯ، ކްރިސްޓިއަން ޓެލޯ އަދި ހުއާން މިރަންޑާ ވަނީ ޕެނަލްޓީތައް ކާމިޔާބުކޮށްފަ އެވެ. ވެލެންސިއާ އިން ފުރަތަމަ ތިން ޕެނަލްޓީ ޖެހި ކާލޮސް ސޮލާ، އުރޯސް ރަޗިޗް އަދި ގޮންކާލޯ ގުއޭޑޭޝް ވަނީ ޕެނަލްޓީތައް ކާމިޔާބުކޮށްފަ އެވެ. އެކަމަކު، ދެން ޕެނަލްޓީ ފޮނުވާލި މޫސާ އަތުން ވީ ނާކާމިޔާބެވެ. ވެލެންސިއާގެ ހޯސޭ ގާޔާ ފަހު ޕެނަލްޓީ ކާމިޔާބުކުރި ނަމަވެސް އެ ޓީމަށް ނަތީޖާ އަނބުރާނުލެވި ބަލިވީ އެވެ.
މިއީ ބެޓިސްއާ ހަވާލުވެ ހުރި ތަޖުރިބާކާރު ކޯޗު މެނުއަލް ޕެލެގްރީނީ 2016 ވަަނަ އަހަރުގެ ފަހުން ހޯދި ފުރަތަމަ ތަށްޓެވެ. ކުރިން ރެއާލް މެޑްރިޑާއި ވިޔަރެއާލަށް ވެސް ކޯޗުކޮށްދިން ޕެލެގްރީނީ އެންމެ ފަހުން ހޯދި ތަށްޓަކީ 2016 ވަނަ އަހަރު ލިވަޕޫލް ބަލިކޮށް މެންޗެސްޓާ ސިޓީ އަށް ކާމިޔާބުކޮށްދިން 2016 ވަނަ އަހަރުގެ އިނގިރޭސި ލީގު ކަޕް އެވެ.
